Emery Mvuyekure yahishuye uburyo yanze ruswa ya miliyoni 1.8 Frw ngo yitsindishe igitego

Yanditswe na Eric Tony Ukurikiyimfura
Kuya 18 Gashyantare 2020 saa 05:06
Yasuwe :
0 0

Umunyezamu w’ikipe y’Igihugu ‘Amavubi’, Emery Mvuyekure usanzwe ukinira Tusker FC yo muri Kenya, yahishuye ko yanze kwakira ibihumbi 200 by’amashilingi ya Kenya kugira ngo yitsindishe igitego.

Mvuyekure yabitangaje mu kiganiro yagiranye n’ikinyamakuru PD Online cyo muri Kenya, aho yavuze ko hari umuntu (atashatse gutangaza) wamusabye kwitsinda igitego mu minota ya nyuma akamwemerera ibihumbi 200 by’amashilingi ya Kenya, ni ukuvuga agera kuri miliyoni 1 n’ibihumbi 880 Frw.

Ubutumwa uwiyise “Fixer” yandikiye Emery Mvuyekure ku mukino wa Tusker na Chemilil Sugar bwagiraga buti “Aha hari akantu gato tugusaba, uze kureka umupira ujye mu izamu ku munota wa nyuma w’umukino, turaza kukwishyura neza."

Uyu munyezamu umaze amezi 14 muri Kenya, yavuze ko yanze gufata aya mafaranga kuko umutima we wari kuzakomeza kumucira urubanza kandi na none bikaba byari kwangiza ubunyamwuga bwe.

Ati “Ni iki cyari gukurikiraho? Mfashe ayo mafaranga, ubunyamwuga bwanjye bwari kuba ubuhe? Ku bwanjye ntabwo nashobora kubana n’icyo cyasha.”

Uyu mukino wabaye mu ntangiriro z’ukwezi gushize, warangiye Tusker FC inyagiye Chemelil Sugar ibitego 7-0.

Aya magambo ya Mvuyekure Emery yaje nyuma y’iminsi mike FIFA ihannye abakinnyi bane bo muri Kenya bagaragayeho kugira uruhare mu kugena uko imikino irangira.

Mvuyekure uvuga ko yirinda gukoresha telefoni amasaha ane mbere y’umukino, yanenze abakinnyi bagenzi be bemera kurya aya mafaranga, asaba ababishinzwe kujya babikoraho iperereza.

Emery Mvuyekure w’imyaka 30, yakiniye amakipe atandukanye mu Rwanda arimo APR FC na Police FC.

Mvuyekure Emery ukinira Tusker FC yo muri Kenya, yavuze ko yanze gufata agera kuri miliyoni 1.88 Frw ngo yitsindishe igitego
Mvuyekure mu myitozo y'Amavubi hamwe na Iragire Saidi na Iradukunda Bertrand
Emery Mvuyekure (hagati) ni umwe mu banyezamu bakunda kwitabazwa mu ikipe nkuru y'Igihugu nubwo nta mukino arongera gukina kuva mu 2014
Kimenyi Yves ari kumwe na Mvuyekure Emery ubwo Amavubi yari i Maputo muri Mozambique mu Ukwakira 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .