00:00:00 IGIHE NETWORK KN KINYARWANDA EN ENGLISH FR FRANCAIS

Umukunzi wa Cristiano Ronaldo yamuhaye impano y’arenga miliyoni 300 Frw

Yanditswe na IGIHE
Kuya 26 Ukuboza 2022 saa 05:17
Yasuwe :

Umukunzi wa Cristano Ronaldo, Georgina Rodríguez, yamuhaye impano ya Noheli ubwo yamuguriraga imodoka yo mu bwoko bwa Rolls Royce ifite agaciro k’arenga miliyoni 300 Frw.

Ronaldo w’imyaka 37, ari mu biganiro n’Ikipe ya Al-Nassr yo muri Arabie Saoudite ndetse bivugwa ko ari hafi gusinya amasezerano ya miliyoni 175£ ku mwaka.

Mu gihe iby’ayo masezerano bitararangira, Ronaldo akunze kugaragara kuri Instagram ari hamwe n’umuryango we. Kuri iyi nshuro, umufasha we yamuhaye impano y’imdoka ya Rolls Royce ibarirwa agaciro k’ibihumbi 250£.

Ronaldo ntiyorohewe n’amezi ashize kuko umubano we n’Umutoza wa Manchester United, Erik ten Hag, utabaye mwiza, birangira atandukanye n’iyi kipe ku bwumvikane nyuma y’ikiganiro cyavugishije benshi yakoranye na Piers Morgan aho yemeje ko atubaha uyu mutoza.

Uyu mukinnyi umaze gutwara Ballon d’Or eshanu, yahise akomereza mu Ikipe y’Igihugu ya Portugal yakinnye Igikombe cy’Isi muri Qatar, ariko ntiyakinishwa n’umutoza Fernado Santos uko abishaka.

Portugal yasezerewe itarenze ¼ nyuma yo gustindwa na Maroc igitego 1-0. Muri uwo mukino, Ronaldo yinjiye mu kibuga asimbuye ndetse ntiyabasha gutuma igihuge cye cyishyura igitego cyari cyatsinzwe mu gice cya mbere.

Nubwo Ronaldo yari amaze iminsi muri ibyo bihe bitamworoheye, amashusho yashyizwe na Georgina Rodríguez kuri Instagram agaragaraza uyu mukinnyi amwenyura nyuma yo kumuha impano y’imodoka nshya.

Yagaragaye kandi yicaye mu mwanya w’uyitwara, ari kumwe n’abandi bagize umuryango we.

Si ubwa mbere Georgina aha imodoka Ronaldo kuko ubwo uyu mukinnyi yizihizaga isabukuru y’imyaka 35 mu 2020, umukunzi we yamuhaye Mercedes G Wagon y’ibihumbi 600£.

Cristiano Ronaldo atunze imodoka zigera kuri 20 za miliyoni 17£ (hafi miliyari 22 Frw) zirimo iza Ferrari, Lamborghini, McLaren, Rolls-Royce ebyiri, Porsche 911 Turbo S, Koenigsegg CCX, Bentley Continental, Range Rover, za Audis na Mercedes zitandukanye.

Izihenze muri zo ni Bugatti Centodieci yamutwaye miliyoni 8,5£ (asaga miliyari 11 Frw), Ferrari Monza ya miliyoni 1,4£, Bugatti Veyron Grand Sport ya miliyoni 1,7£ na Bugatti Chiron ya miliyoni 2,15£.

Georgina yahaye Ronaldo imodoka y'arenga miliyoni 300 Frw
Cristiano Ronaldo yashimiye umukunzi we ku bw'impano yamuhaye
Ronaldo yagaragaye amwenyura nyuma yo guhabwa imodoka
Ronaldo n'umuryango we bataha imodoka nshya yahawe n'umukunzi we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .