Umukino wa Rayon Sports na Bugesera FC ni wo uhenze mu mateka ya Shampiyona y’u Rwanda

Yanditswe na Eric Tony Ukurikiyimfura
Kuya 21 Ukwakira 2019 saa 02:55
Yasuwe :
0 0

Ibiciro byo kwinjira ku mukino uzahuza Rayon Sports na Bugesera FC ku munsi wa kane wa Shampiyona byamaze kujya ahagaragara, aho itike ya menshi izaba igura ibihumbi 30 Frw.

Uyu ni wo mukino wa mbere ugiye kugurishwaho itike ihanitse muri Shampiyona y’Umupira w’Amaguru mu Rwanda.

Rayon Sports izakira Bugesera FC kuri Stade ya Kigali i Nyamirambo kuri uyu wa Kabiri saa 18:00 nk’uko byemejwe mu nama yahuje amakipe yombi na FERWAFA ku wa Gatanu.

Nk’uko byatangajwe n’Ubuyobozi bwa Rayon Sports, ibiciro byo kwinjira kuri uyu mukino ni 2000 ahasanzwe hose, 5,000 ahatwikiriye, ibihumbi 15 Frw iruhande rw’imyanya y’icyubahiro n’ibihumbi 30 Frw mu myanya y’icyubahiro (VIP).

Uyu mukino winjiye mu yahenze mu mateka ya ruhago mu Rwanda, aho indi mikino yaherukaga kugira ibiciro biri hejuru gutya harimo uwo Rayon Sports yakiriyemo Enyimba FC mikino Nyafurika mu mwaka ushize, aho na wo itike ya menshi yari ibihumbi 30 Frw.

Indi mikino Rayon Sports yaherukaga kwishyuzwamo ibiciro bijya kungana n’ibi uwo yanganyijemo na Al-Hilal igitego 1-1 muri Kanama n’uwo yatsinzemo Yanga SC mu mwaka ushize, aho itike ya menshi yari ibihumbi 25 Frw.

Umukino u Rwanda rwahuyemo na Côte d’Ivoire muri Nzeri 2018 na wo wishyuwemo ibihumbi 25 Frw ku itike ihenze.

Uwo u Rwanda rwahuyemo na Repubulika Iharanira Demokarasi ya Congo muri CHAN 2016, uwahuje APR FC na Rayon Sports ku mukino wa nyuma w’igikombe cy’Amahoro 2016, yombi yari ifite itike ihanitse ingana n’ibihumbi 20,000 mu myanya y’icyubahiro.

Ubwo Rayon Sports yaherukaga kwakira umukino wa Shampiyona muri uyu mwaka w’imikino, ikina na AS Kigali ku munsi wa kabiri wa Shampiyona, itike ya menshi yari ibihumbi 10 Frw.

Rayon Sports kuri ubu iri ku mwanya wa gatatu n’amanota arindwi, inganya na APR FC, ariko zigatandukanywa n’ibitego zizigamye. Amakipe yombi arushwa inota rimwe na Mukura Victory Sports ya mbere.

Rayon Sports yiteze abafana benshi ku mukino izakiramo Bugesera FC kuri uyu wa Kabiri, ukabera ku matara y'i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza