Ni umukino wabaye kuri iki Cyumweru, tariki ya 29 Nzeri 2024, ubera kuri Kigali Pelé Stadium, imbere y’abafana bari bake muri iyi stade cyane ko hari habaye undi mukino wari ukomeye waberaga mu Karere ka Rubavu.

Umukino watangiranye imbaraga ku mpande zombi ariko Police FC yari yakiriye ndetse inafite abafana bake ku kibuga bayishyigikiye iwinjiramo mbere inasatira izamu rya Vision FC.

Mu minota 15 ya mbere, Police FC yari yamaze kubona amahirwe akomeye inshuro ebyiri imbere y’izamu ariko inanirwa kuyabyaza umusaruro kugeza Vision itangiye gutinyuka na yo igasatira.

Ku munota wa 32, Vision FC yageze imbere y’izamu igerageza kuba yafungura amazamu mbere ariko Ndizeye Samuel aritambika akiza izamu.

Impera z’igice cya mbere cyaranzwe n’imvura nyinshi cyarangiye amakipe yombi anganyije 0-0. Yanze guhita kugeza hashize iminota 45 ubwo abasifuzi na bamwe mu bakinnyi b’amakipe yombi bagiye gusuzuma ikibuga.

Umupira wanze kugenda kuko amazi yari menshi mu kibuga, bafata umwanzuro wo guhita bawusubika kuko bitari bigishobotse ko ukomeza.

Nubwo umukino utarangiye ariko Ikipe ya Polisi y’u Rwanda yakomeje kuyobora urutonde rwa Shampiyona by’agateganyo n’amanota 10.

Abakinnyi ba Vision FC bajya inama mbere y'umukino

Mbere y'uko umukino utangira, ba kapiteni ndetse n'abasifuzi babanje kujya inama

Abakinnyi 11 Police FC yabanje mu kibuga

Abakinnyi 11 Vision FC yabanje mu kibuga

Umunyezamu wa Police FC Niyongira Patience aganira na bagenzi be

Musanga Henry wa Police FC ku mupira ashaka bagenzi be

Igice cya mbere amakipe yombi yahanganye

Imvura yabaye nyinshi mu mpera z'igice cya mbere

Ikibuga cyuzuye amazi

Byari bigoye ko umukino wakomeza n'amazi yari amaze kujya mu kibuga

Umupira wagwaga mu mazi ugahagama

Myugariro wa Police FC, Ndizeye Samuel, agerageza gutera umupira

Abakinnyi basabwe gusuzuma ikibuga

Abafana ba Police FC bakomeje gufana nubwo imvura yari nyinshi

Faustin Ndikumana agerageza kureba niba umupira watembera neza mu kibuga

Amafoto: Rusa Willy Prince