Umukino wa Champions League wabaye imbarutso y’ikwirakwira rya Coronavirus mu Butaliyani na Espagne

Yanditswe na Eric Tony Ukurikiyimfura
Kuya 25 Werurwe 2020 saa 06:47
Yasuwe :
0 0

Umuyobozi w’Umujyi wa Bergamo mu Butaliyani, Giorgio Gori, yavuze ko umukino Atalanta yakiriyemo Valence C.F muri UEFA Champions League ari wo wabaye imbarutso y’ikwirakwira ry’icyorezo cya Coronavirus mu Butaliyani na Espagne.

Ibihugu byombi ni byo byugarijwe na Coronavirus kurusha ibindi mu Burayi.

Umukino wa 1/8 cya UEFA Champions League, Atalanta yakiriyemo Valence kuri San Siro tariki ya 19 Gashyantare, warebwe n’abafana ibihumbi 44 mu Mujyi wa Milan.

Giorgio Gori avuga ko uwo mukino ari cyo kintu gikomeye cyatumye Umujyi wa Bergamo wibasirwa cyane mu gihugu, aho abantu 6728 bemejwe ko banduye Coronavirus.

Ikinyamakuru Marca cyatangaje ko uyu muyobozi abinyujije ku rubuga rwa Facebook, yavuze ko “Uwo mukino ari wo nkomoko y’icyorezo mu Butaliyani.”

Yagize ati “Icyo gihe ntitwari tuzi ibyabaga.Niba virusi yari imaze gukwirakwira, abafana ibihumbi 40 bagiye i San Siro baranduye. Nta muntu n’umwe wari uzi ko virusi yari imaze gukwirakwira muri twe.”

Yakomeje agira ati “Benshi barebye umukino begeranye, muri iryo joro habaye gukoranaho [hagati yabafana]."

Atalanta yari yakiriye uwo mukino wa Champions League i San Siro muri Milan kuko stade yayo iri kuvugururwa.

Abafana bayo kandi bashobora kuba barakwirakwije Coronavirus i Bergamo ubwo bavaga i Milan bishimiraga intsinzi y’ibitego 4-1.

Abafana ba Valencia nabo bashobora kuba barakwirakwije Coronavirus iwabo nyuma yo kuva mu Butaliyani.

Nyuma y’umunsi umwe uwo mukino ubaye, hari umugabo wagaragayeho Coronavirus i Lombardi mu gihe nyuma y’iminsi itatu, tariki ya 22 Gashyantare 2020, u Butaliyani bwemeje abantu ba mbere bishwe na Coronavirus.

U Butaliyani ni cyo gihugu kimaze kugira abantu benshi bahitanywe n’iki cyorezo cyatangiriye i Wuhan, mu Bushinwa.

Abantu barenga 6820 bamaze gupfa mu Butaliyani bazize Coronavirus mu gihe 2991 ari bo bamaze gupfa muri Espagne.

Umuganga wo muri Bergamo yagarutse ku bitekerezo by’umuyobozi w’ako gace, amushinja amakosa kuri uwo mukino wa Champions League wabaye intandaro y’ikwirakwira rya Coronavirus.

Aganira na Paddy Agnew, umunyamakuru wa Off The Ball, uyu muganga yagize ati “Umwe mu baganga bakuru bo mu bitaro bya Giovanni XXIII i Bergamo yemeza ko [uwo mukino] wari imbarutso y’ikwirakwira ry’icyorezo."

“Ibyabaye ni uko abafana ba Atalanta ibihumbi 40 bagendeye hamwe, bajya ku mukino ndetse na nyuma yaho bishimira hamwe mbere yo kujya mu rugo.”

Yongeyeho ati “Icyo batigeze bamenya ni uko benshi muri bo banduye, kubera ko icyo gihe [tariki ya 19 Gashyantare] mu Butaliyani nta muntu wari wagapfuye kubera Coronavirus. Nyuma y’ibyumweru bitatu, abantu 3033 bapfuye mu cyumweru kimwe i Bergamo.”

Kuri ubu ikipe yose ya Atalanta iri mu kato nyuma y’uko umunyezamu Marco Sportiello yanduye coronavirus.

Ni mu gihe mu cyumweru gishize, Valencia yavuze ko abarenga kimwe cya gatatu cy’abakinnyi bayo ndetse n’abatoza, banduye Coronavirus kuva bavuye mu Butaliyani.

Ibikorwa byose by’umupira w’amaguru w’ababigize umwuga mu Burayi byarahagaritswe kubera Coronavirus mu gihe Euro 2020 yimuriwe mu 2021.

Umukino wahuje Atalanta na Valence CF mu Butaliyani ufatwa nk'imbarutso y'ikwirakwira rya Coronavirus muri icyo gihugu no muri Espagne
Abakinnyi ba Atalanta bashimira abafana babo nyuma y'intsinzi y'ibitego 4-1
Meya wa Bergamo mu Butaliyani, Giorgio Gori, avuga ko uyu mukino ari wo watumye u Butaliyani bwibasirwa na Coronavirus
Umukino wo kwishyura wabereye muri Espagne mu ntangiriro za Werurwe, wabaye mu muhezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .