Umukino wa Arsenal na Chelsea waciye agahigo ko kurebwa n’abantu benshi mu 2019/20

Yanditswe na Eric Tony Ukurikiyimfura
Kuya 2 Kanama 2020 saa 06:59
Yasuwe :
0 0

Umukino wa nyuma wa FA Cup wahuje Arsenal na Chelsea ku wa Gatandatu, warebwe n’abagera kuri miliyoni 8.2 uca gahigo ko kurebwa n’abantu benshi mu mwaka w’imikino wa 2019/20 nk’uko imibare ibigaragaza.

Uyu mukino wabereye kuri Stade Wembley mu muhezo, ugatsindwa na Arsenal ku bitego 2-1, warebwe n’umubare uri hejuru ungana na miliyoni 8.2 kuri shene ya BBC One mu gihe abasangije abandi amashusho bagera ku kigero cya 46.1%.

Bisobanuye ko hafi kimwe cya kabiri cy’abatuye Ubwami bw’u Bwongereza bafite televiziyo, barebye uyu mukino wa nyuma.

Imibare y’abawukurikiye igaragaza ko yarenze abarebye umukino wa ½ wahuje Manchester United na Chelsea ku wa 19 Nyakanga, wo warebwe n’abagera kuri miliyoni 7.3.

Imikino itanu iyoboye iyindi mu yarebwe n’abantu benshi kuri televiziyo muri uyu mwaka, yose ni iya FA Cup yerekanywe kuri BBC.

Kuri ubu abafana ntibemerewe kujya ku bibuga bitewe n’icyorezo cya Coronavirus cyibasiye Isi, bisobanuye ko abakunzi b’amakipe n’abandi bakunda imikino bagomba kuyireba kuri televiziyo.

Umukino wa nyuma wa FA Cup wabaye ku wa Gatandatu, wabereye mu muhezo, witabirwa n’umubare muto w’abantu batarenze 300 barimo abakinnyi, abatoza, abayobozi b’amakipe, itangazamakuru n’abandi bake.

Urutonde rw’imikino itanu yarebwe n’abantu benshi kuri televiziyo muri uyu mwaka w’imikino, rugaragaza ko itatu muri yo yakiniwe mu muhezo.

Uwo Chelsea yatsinzemo Liverpool muri Werurwe mu ijonjora rya gatanu rya FA Cup (warebwe n’abantu miliyoni 6.8) n’uwo Liverpool yanganyijemo na Shrewbury Town muri Mutarama (ukarebwa na miliyoni 6.1) ni yo yitabiriwe n’abafana iri mu yarebwe cyane mu yerekanwe kuri televiziyo.

Umukino werekanywe na Sky Sports ukarebwa n’abantu benshi ni uwo Liverpool yanganyijemo na Everton ubusa ku busa muri Kamena, warebwe n’abantu miliyoni 5.5.

Uwarebwe na benshi mu mateka ni uwo u Bwongereza bwahuyemo n’u Budage bw’Iburengerazuba mu Gikombe cy’Isi cyo mu 1966, warebwe n’abantu miliyoni 32.3.

Imikino itanu yarebwe n’abantu benshi muri uyu mwaka w’imikino:

  1. FA Cup- umukino wa nyuma: Arsenal vs Chelsea milliyoni 8.2 (BBC)
  2. FA Cup- muri ½ : Manchester United vs Chelsea, miliyoni 7.3 (BBC)
  3. FA Cup: Chelsea vs Liverpool, miliyoni 6.8 (BBC)
  4. FA Cup: Norwich City vs Manchester United, miliyoni 6.4 (BBC)
  5. FA Cup: Shrewsbury Town vs Liverpool, miliyoni 6.1 (BBC)
Bamwe mu bafana ba Arsenal barebeye umukino kuri televiziyo hanze ya Stade Wembley
BBC yerekanye uyu mukino wa nyuma wa FA Cup wabereye i Wembley

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .