Umuhungu wa Wayne Rooney yasinye muri Manchester United

Yanditswe na IGIHE
Kuya 18 Ukuboza 2020 saa 05:58
Yasuwe :
0 0

Umuhungu wa Wayne Rooney, Kai, yasinye amasezerano mu ikipe y’abato ya Manchester United, atera ikirenge mu cya se wakiniye iyi kipe imyaka 13.

Ku wa Kane, Rooney yashyize ifoto ku mbuga nkoranyambaga, igaragaza umuhungu we w’imyaka 11, umukuru mu bahungu be bane, asinya amasezerano muri iyi kipe yakiniye.

Yayikurikije amagambo agira ati “Umunsi wo kwishimira. Kai asinyira Manchester United. Komeza ukore cyane muhungu wanjye.”

Wayne Rooney w’imyaka 38, kuri ubu utoza Derby County by’agateganyo, yageze muri Manchester United mu 2004, avuye muri Everton.

Yakiniye Manchester United mu gihe cy’imyaka 13, atsinda ibitego 253 mu mikino 559, aho yakuyeho agahigo kari gafitwe na Sir Bobby Charlton ko gutsinda ibitego byinshi, muri Mutarama 2017.

Umugore we, Coleen Rooney, yanditse kuri Instagram ati “Ijoro ridasanzwe… Ni ibyishimo Kai. Ndagukunda kandi ntewe ishema nawe. Komeza ukore cyane.”

Mu myaka yakiniyemo Manchester United, Rooney yatwaye ibikombe bitanu bya Premier League, League Cup eshatu, FA Cup imwe, Europa League Cup imwe na Champions League imwe.

Yayivuyemo mu 2017 asubira muri Everton yakuriyemo mbere yo kujya gukina muri DC United yo muri Leta Zunze Ubumwe za Amerika, na yo ayivamo ajya muri Derby.

Wayne Rooney n'umugore we, Coleen, bifotozanya n'umuhungu wabo ari gusinya amasezerano
Kai w'imyaka 11, azajya akina mu ikipe y'abato ya Manchester United
Kuri ubu, Rooney ni we wasigaranye ikipe ya Derby nk'umutoza
Rooney akikiye umuhungu we, Kai, mu 2011
Wayne Rooney na Kai muri Gicurasi 2013
Wayne Rooney aganiriza umuhungu we mbere y'umukino wa Tottenham mu 2015
Kai yicaye ku ntebe y'abasimbura ya Manchester United hagati ya Juan Mata na Marcos Rojo muri Kanama 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .