Umuherwe wa 10 muri Afurika aziyamamariza kuyobora CAF

Yanditswe na Eric Tony Ukurikiyimfura
Kuya 9 Ugushyingo 2020 saa 09:27
Yasuwe :
0 0

Patrice Motsepe uri mu baherwe ba mbere muri Afurika aziyamamariza kuyobora Impuzamashyirahamwe y’Umupira w’Amaguru muri Afurika (CAF), aho azahangana n’abarimo Ahmad Ahmad uri gusoza manda ye.

Patrice Motsepe ni umwe mu bakire bo muri Afurika, aho urubuga rwa The Forbes rugaragaza ko ari ku mwanya wa 10 n’umutungo ungana na miliyari 2.4$.

Uyu mugabo uyobora Mamelodi Sundowns yo muri Afurika y’Epfo yatwaye CAF Champions League mu 2016, yabaye uwa gatatu uvuze ko aziyamamariza kuyobora CAF nyuma ya Ahmad Ahmad uri ku buyobozi n’Umunya-Côte d’Ivoire, Jacques Anouma.

Kwiyamamaza kwa Motsepe byemerejwe mu kiganiro n’abanyamakuru cyabaye kuri uyu wa Mbere, cyayobowe na Perezida w’Ishyirahamwe rya ruhago muri Afurika y’Epfo (SAFA), Danny Jordaan na Minisitiri wa Siporo muri icyo gihugu, Nathi Mathethwa.

Patrice Motsepe ntiyabonetse ngo abyivugire we ubwe kuko ari mu kato nyuma yo kwandura COVID-19 nk’uko byemejwe na Jordaan.

Mu bandi bashyigikiye uyu mugabo harimo Umunya-Nigeria Amaju Pinnick na we byavugwaga ko ashobora kwiyamamaza.

Abifuza kwiyamamariza kuyobora CAF, bafite kugeza ku wa Kane nk’umunsi wa nyuma wo gutanga kandidatire zabo.

Amatora y’umuyobozi mushya wa CAF mu myaka ine iri imbere, azaba mu nama y’Inteko Rusange izaba muri Werurwe 2021 i Rabat muri Maroc.

Patrice Motsepe uri mu baherwe 10 ba mbere muri Afurika, aziyamamariza kuyobora CAF
Motsepe asanzwe ari nyir'ikipe ya Mamelodi Sundowns yo muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .