00:00:00 IGIHE NETWORK KN KINYARWANDA EN ENGLISH FR FRANCAIS

Umubano we na Juvénal, ’betting’ n’ahazaza he muri Kiyovu Sports... André Landeut yiniguye (Video)

Yanditswe na Eric Tony Ukurikiyimfura
Kuya 29 Ukuboza 2022 saa 08:43
Yasuwe :

Umuyobozi ushinzwe Siporo muri Kiyovu Sports, Alain-André Landeut, yavuze ko atigeze ahagarikwa n’iyi kipe ndetse akiri umutoza wayo ahubwo ashobora kwitabaza inzego zirimo FIFA kubera kubuzwa gukora inshingano ze.

Landeut yagizwe Umutoza wa Kiyovu Sports mu mpera za Nyakanga 2022, ahabwa amasezerano y’imyaka itatu yatangiranye n’uyu mwaka w’imikino wa 2022/23.

Nyuma y’umukino Kiyovu Sports yatsinzwemo na Gasogi United ku wa 28 Ugushyingo, Umuyobozi wayo, Mvukiyehe Juvénal, yavugiye mu itangazamakuru ko yahagaritse umutoza ndetse na we abimubwira mu magambo.

Landeut yabajije ubuyobozi bw’iyi kipe ibaruwa imuhagarika, ntibwayimuha kubera ko butari bwiteguye kumwishyura amezi ane ateganywa mu masezerano impande zombi zumvukanye kugira ngo habeho kumusezerera.

Nko gushaka igisubizo cyihuse ariko kigendanye no kwikiza uyu mutoza, Kiyovu Sports yamenyesheje Landeut ko ahinduriwe inshingano agasubizwa ku za Manager Sportif [ushinzwe Siporo] yasinyiye.

Uyu mugabo w’Umubiligi ufite inkomoko muri Repubulika Iharanira Demokarasi ya Congo yifashishije umwunganizi mu mategeko we, yandikira Kiyovu Sports ayimenyesha ko kumubuza gutoza ari ukumubuza gukora inshingano yasinyiye.

Mu masezerano y’impande zombi IGIHE yabonye, harimo ko Alain-André Landeut wasinye nka Manager Sportif ari we ushinzwe kugena abagize ikipe n’abayisohokamo baba abatoza n’abakinnyi ndetse akaba ari na we ugena imyitozo.

Mu kumuhindurira inshingano, Mateso Jean de Dieu agasigarana ikipe, Kiyovu Sports yashatse ngo akurikirane ibijyanye n’ikipe y’abagore ndetse n’abakiri bato.

Mu kiganiro kirekire cyihariye twagiranye, Landeut wishyurirwa inzu i Gikondo akaba yarahawe n’imodoka, yabwiye IGIHE ko akiri mu kazi nk’umutoza ariko ategereje ko hari umuyobozi wa Kiyovu Sports bazicarana akamenya niba akomeza inshingano cyangwa agasesa amasezerano mu buryo bushobora guma Kiyovu Sports yisanga mu birego imbere ya FIFA dore ko kuri ubu amezi abaye abiri iyi kipe idahemba abakozi bayo.

Uyu mugabo ugira ukuri kwinshi nk’uko na we abyivugira, yahishuye ko yari yaboneye Kiyovu Sports umufatanyabikorwa, ikipe ya Manisaspor, yari kugurishwa abakinnyi babiri n’Urucaca, ariko umubano w’impande zombi wajemo agatotsi nyuma y’uko hagiye hanze amakuru ko yahagaritswe.

Mu mezi atanu umaze muri Kiyovu Sports watwaye ‘Made in Rwanda Cup’ mu Ukwakira, wabyakiriye gute?

Twakinnye na Rayon Sports saa Kumi n’ebyiri, ndabyibuka neza. Saa Moya n’iminota 45 twari dutsinze umukino, saa Mbiri baduha igikombe. Natashye iwanjye saa Cyenda za mu gitondo.

Tuva kuri Stade ya Kigali twatangiriwe n’abantu benshi i Nyamirambo, hari ibyishimo, buri wese yari yishimye. Bampaye igikombe ngo ngihe Juvénal [Mvukiyehe], abafana bari bahari, komite yari ihari, nari muri bus, umuhanda wari wuzuye abantu kugeza saa Cyenda za mugitondo.

Naravuze nti umunsi twatwaye Igikombe cy’Amahoro bizaba bimeze bite? Ahubwo se nidutwara Shampiyona bizaba bimeze bite? Irushanwa rito rya gicuti abantu bakishima gutya?

Mwari mwatangiye neza Shampiyona, ariko nyuma y’imikino itatu mutsindwa na Sunrise FC i Kigali, byapfiriye he?

Twatakaje umukino wa mbere dukina na Sunrise FC, mu cyumweru twagizemo ibibazo. Icyo gihe sinari wa mutoza wakoze ku bijyanye na tekinike n’andi mayeri yo mu kibuga, buri munsi nari mu bibazo bindi. Abakinnyi bazaga kundeba bati ‘ntabwo nabonye agahimbazamusyi kanjye, ‘recruitement’ sinayibonye, ntabwo nahembwe n’ibindi. Nabaye umuhuza w’ibiro n’ikibuga.

Nakoze amakosa amwe, uretse ko atari amakosa ahubwo ari amahitamo kubera ko hari abatari bishimye kubera ko batishyuwe ibyo bagombwa, binsaba kudakinisha bamwe mu bakinnyi b’ingenzi barimo Abeddy, mpa umwanya abarimo Mutyaba.

Ubwo nageraga muri Kiyovu Sports, nari mfite ikipe iri hejuru. Ntawasimburwaga, ariko icyo gihe nabonye ko hari abatari ku rwego rwo hejuru, ko hari ababanzamo utakina utabafite nka Abeddy. Ntiwakina utamufite, narabimubwiye. Mutyaba ntabwo ari ku rwego nk’urwa Abeddy.

Njye nkunda gukorana cyane n’abakinnyi bakiri bato. Imikinire yanjye ijya kumera nk’iy’Abadage, isaba umuntu wirukanka, ushyira ku gitutu ikipe duhanganye.

Hajemo no gutsindwa indi mikino nk’uwa Gasogi United, bivugwa ko umutoza [wowe] yahinduye ikipe kubera ‘betting’, ibyo urabivugaho iki?

Icyo ni ikintu namenye ngeze mu Rwanda. Nk’uko nabivuze mbere, u Rwanda ni igihugu cyiza ariko imitekerereze ntabwo ari myiza. Undebye urabona meze nk’umutu ukora ‘betting’? Mutekereza ko umuntu yasize umuryango i Brussels aje gukora uburiganya bwa ‘betting’ hano?

Ndakubwira nkomeje, mu Rwanda haba imitekerereze ipfuye cyane. Abantu baravuga cyane, barahimba, barabeshya bakanateranya bitari ngombwa. Ni icyaha gikomeye gushinja umuntu nta bimenyetso.

Mu Rwanda hari inzego zitandukanye zirimo izishinzwe iperereza. Mwe mubigira urwenya, mukina n’ubuzima, abantu bakina n’ubuzima. Ni ngombwa kubaha igihugu cyiza cy’u Rwanda. Niba bivugwa ko habaye ‘betting’, RIB igomba kubikurikirana basanze ari byo Shampiyona yahagarara.

Hari umunsi wabonye abakinnyi bawe bakina ibitandukanye n’ibyo wabasabye mu kibuga?

Ibyo narabibonye. I Gisenyi dukina na Rutsiro FC, twakinnye umukino mwiza uri hejuru mu gice cya mbere dutsinda 2-0. Njye nk’umutoza w’umunyamwuga, ndakubwira ukuri, mu rwambariro nabwiye abakinnyi ngo ni 2-0 ariko ntibirarangira, tugomba gushaka 3-0 cyangwa 4-0 tukarangiza umukino.

Mwubahe uwo muri gukina, mwitondere inyamaswa yakomeretse ishobora gukanguka, hasigaye iminota 45 ntibirarangira. Nabisubiyemo, ndasakuza nti twagiye basore… Gusa reka nkubwize ukuri, hari icyo nabonye, ndi umunyamahanga simvuga Ikinyarwanda, birashoboka ko ibyo navuze byumviswe ukundi cyangwa hakavugwa ibindi.

Twatangiye igice cya kabiri dukinira inyuma, ndabazi nti ibyo ni ibiki? Navuze ko mukinira imbere, muri gukinira inyuma. Muzamuke, muzamuke, kuki mutuma babasanga mu kibuga cyanyu? Kuki abakinnyi basanzwe bakina bihuta bari kugenda gahoro? Ni iki cyabaye? Badutsinze [batwishyuye] ibitego bibiri. Umukino urangiye nanze kubwira nabi abakinnyi, nahamagaye Perezida ngo amfashe kubabwira.

Nyuma y’umukino wa Gasogi United, wahagarikiwe ku kibuga. Wabyakiriye gute?

Nyuma y’umukino, urabona hariya muri ‘parking’ y’urwambariro rw’abakinnyi, Perezida yaraje arambwira ati ‘njye nawe byarangiye’. Nti ‘eeh? Ni umugore wanjye se?’ Byarangiye? Nk’aho ari umugabo utandukanye n’umugore? Abantu bagomba kumenya uko bitwara. Niba byarangiye ubahiriza amasezerano.

Iyo unyeretse ikinyabupfura nanjye ndakubaha. Wanyereka ububandi, nanjye nkakubera ibandi.

Ni he hari ibaruwa isinye igaragaza ko ndi umutoza wahagaritswe? Ntayo nabonye. N’unshakira amakipe ntayo yabonye, ni unyunganira mu mategeko na we ntayo. Nagiye kuri ‘internet’ mbona ngo umutoza Landeut yahagaritswe. Hari aho mwigeze mubona umutoza wahagaritswe?

Sinigeze mpagarikwa nk’uko byatangajwe mu bitangazamakuru byose. Bahindanyirije izina ryanjye ubusa. Sinigeze nirukanwa. Umuntu muvugana none, byemewe n’amategeko ndi Umutoza wa Kiyovu Sports. Bashobora kumbuza kujya ku mikino yabo, ariko mu mategeko ni amakosa. Ni ukumbuza gukora akazi kanjye kuko sinigeze mpagarikwa cyangwa ngo nirukanwe. Ndi mu kazi.

Guhindurirwa inshingano byaje gute? Warabyemeye?

Baratangaje ngo ntakiri umutoza, ni Manager [Sportif], ariko n’ubundi nari nsanzwe ndi Manager! Mfite inshingano ebyiri. Muri Kiyovu Sports nasinye amasezerano nka Manager Sportif n’Umutoza mukuru. Ibyo ni ibintu abantu mu Rwanda batazi, ni uburyo bwa kinyamwuga batazi.

Ubwo nahuraga na Juvénal i Brussels, yansobanuriye umushinga, ambwira ko hakenewe umutoza ndetse n’Umuyobozi wa tekinike wafasha ikipe kugera ku rwego mpuzamahanga. Yarebye ‘CV’ yanjye abona ko byose mbyujuje. Namusabye ko abikora nko mu Bwongereza, akagira Manager. Muri njye, yateye ibuye rimwe yica inyoni ebyiri.

Inshingano za Manager Sportif harimo kugena imyitozo ikorwa n’ikipe, kugena abagize ikipe, kugena abasohoka n’abinjira mu ikipe n’abatoza b’ikipe.

Umupira wacu ntabwo winjiza, ariko dushobora gushaka uburyo ikipe ibaho. Nanjye naje gufasha Perezida gushaka uburyo ikipe yabona ubushobozi.

Njye nabonye abafatanyabikorwa, nabonye ikipe yo muri Turikiya ishaka kuba umufatanyabikorwa wa Kiyovu Sports, Manisaspor, biteguye kuza, nabatumiye ubwanjye nyuze kuri Perezida ngo baze barebe banarebe abakinnyi bafite impano. Nemeranyije na bo ko tuzabagurisha abakinnyi babiri muri. Yego hari igurisha ry’abakinnyi babiri nagiyemo nka Manager.

Nshaka uburyo nakwinjiriza amafaranga ikigo cyanjye. Ni umurimo utoroshye kuko ntidufite amafaranga.

Ubwo bufatanye buracyahari?

Mu by’ukuri, ni iki ubona iyo ufunguye internet? Iyo wanditse Kiyovu Sports, iyo wanditse izina rya Alain-André Landeut, ni iki ubona? Umuntu wampuje n’iyi kipe yo muri Turikiya tuziranye mu myaka 20 ishize, yarampamagaye ngo ni iki cyabaye? Ndamubwira nti ntacyo nzi. Aravuga ati ‘ikipe yawe ntabwo ari iyo kwizerwa’. Byabaye nk’ibisubiye inyuma gato.

Twagize amahirwe tubona imbuga zo gutangiraho amakuru ariko ntabwo tuzikoresha mu bifite inyungu, tuzikoresha nabi. Ni byo navuze kare, ni ukuvuga ‘betting’, ni ukuvuga ‘match-fixing’, ni ukuvuga ubuzima bwite bw’umuntu n’ibindi byose. Ni cyo gituma umupira w’u Rwanda udatera imbere, ni yo mpamvu ugira isura mbi. Hari impano, ariko imitekerereze nidahinduka muzakomeza kubona AC Milan ikinisha Umunya-Sénégal cyangwa Umunye-Congo ariko nta Munyarwanda ujyayo.

Gusa n’abakinnyi bagira ikibazo cy’imyitwarire no kutakira ibintu uko bimeze. Ni byo Perezida Juvénal yavuze ngo umutoza yabwiye nabi abakinnyi. Njye ndi umusirikare, ngomba kubwiza ukuri umukinnyi. Niba uri umukinnyi ukomeye ukaba utantsindira umukino nta mpamvu yo kugutaho igihe.

Mugenzi wanjye Adil yagize ikibazo nk’icyo muri APR, Adil muzi ari mu Bubiligi, ni umutoza ukomeye. Narumvise ngo abakinnyi bavuze ko ababwira nabi mu myitozo. Abakinnyi si inshuti zawe, mfite uburenganzira bwo kubwira umukinnyi ibyo nshaka. Na Perezida asaba umutoza intsinzi, umutoza agasaba umukinnyi umusaruro.

Ntubona ko icyemezo cyo kuguhindurira inshingano cyari icyo kugushyira hanze?

Biragaraga ko icyo cyemezo cyari kigamije kunshyira hanze. Bashakaga kunyirukana ariko bazi uko bampaye akazi. Iyo utanga akazi hari icyo bigusaba, no kwirukana hari icyo bisaba.

Barambwiraga ngo duhagaze nabi, turi ku mwanya wa kabiri ngo turi ahabi? Bakavuga ngo umusaruro ni mubi? Uyu munsi Kiyovu Sports ni iya kangahe? Ifite amanota 30 inganya na AS Kigali [ya mbere], kuva dutangiye Shampiyona ntitwigeze turenga umwanya wa gatatu ariko buri gihe bambwiraga ko Shampiyona igiye kandi haracyari imikino 15 yo kwishyura.

Ni nde wababwiye ko ushobora gutwara Shampiyona mu Ukuboza? Abantu barashaka kujya muri ‘Guinness des Records? Njye abakinnyi banjye barambwiye, barimo Janvier Benedata, Yves Kimenyi na Serumogo bati ‘umutoza twatakaje umukino ariko si ikosa ryawe. Ni ikosa ryacu.’ Serumogo yabwiye bagenzi be ko dutakaje umukino ariko bitararangira.”

Mu gihe kitageze ku mwaka, umaze gufata ibyemezo bingahe…Nirukanye umutoza wanjye, ejo bwacya uti oya oya ni umutoza wacu. Ndeguye, oya oya ndacyahari. Na none ngo ndeguye, mu Ukuboza ngo ndeguye, ntabwo neguye. Njye ndababwiza ukuri, iyo mikorere irananiza. Ni ngombwa kubaho ugirirwa icyizere mu buzima.

Ntabwo ushobora kuvuga ko weguye ngo nurangiza ukomeze kugaragara mu buyobozi ufata ibyemezo.

Uyu munsi umubano wawe na Juvénal uhagaze gute?

Juvénal ni umuyobozi wanjye, ni Perezida wa Kiyovu Sports wampaye akazi, ariko nyuma yaho nabonye ko ari inshuti. Ni yo mpamvu rimwe ntamuvugisha nk’umuyobozi wanjye ahubwo nk’inshuti.

Iyo hari aho akoze nabi ndamubwira nti ukoze ibidakwiye, nanjye nakora ikosa akambwira ko atari byiza. Navuga ko twari tubanye neza kandi ni umugabo ukwiye gushyigikirwa kuko ni we muyobozi nzi muri Kiyovu Sports.

Hari abantu babifata nabi ariko njye komite sinyizi. Naraje ndabaza nti Umunyamabanga ari he? Ntawe uhari muri Kiyovu. Niba ari uko bimeze ni nk’imodoka idafite moteri. Yakora gute? Ni Juvénal wakoraga byose.

Twabonanye na Perezida mbere ya Noheli ambwira ko agiye mu Bubiligi, ndamubwira nti urugendo rwiza. Nanjye nagombaga kugenda ariko mfite abana hano, nagombaga gutegura imyitozo, gushaka imikino ya gicuti no gushaka abakinnyi twakongeramo mbere y’imikino yo kwishyura.

Nyuma nabonye ku mbuga nkoranyambaga ko Juvénal yasezeye ariko ni n’aho havuga ko akiri Perezida. Ntabwo ari ibya kinyamwuga.

Ko Juvénal yeguye, nta bandi bayobozi ba Kiyovu Sports muravugana?

Aka kanya numbwira ngo Juvénal ntakiri Perezida, ndaza kuvugana nande? Telefoni yanjye ngiyi, ndahamagara nde? Ni nde muyobozi wa Kiyovu Sports? Bavuga Régis [Visi Perezida wa mbere Ndolimana] ariko nta nimero ye ngira. Urumva bisanzwe? Nta nimero ya Régis ngira.

Régis ndamuzi, naramubonye mbona muzi, najyaga mwumva kuri radio, ni général mu gisarikare? Uriya muhungu ni we wansemuriye mumenya gutyo. Umugabo yaje ku myitozo aravuga ngo ndi Visi Perezida, kuko yahaye buri wese ibihumbi 50 Frw? Sinzi uyobora Kiyovu ubu, komite sinyizi. Ndashaka kuyibona.

Njye nubaha amasezerano, hari amakipe anshaka ariko nkayabwira nti mube muretse. Ntegereje kureba tariki ya 1 Mutarama [2023] uko bimeze niba nzabona umuyobozi uhagarariye Kiyovu Sports yaba Juvénal, Régis cyangwa Jacques tukagira ibyo dushyira ku murongo.

Nataboneka, mfite uburenganzira bwo gushyiraho igihe, nyuma y’icyo gihe amasezerano agafatwa nk’atarubahirijwe, bityo bikaba byateza ibibazo Kiyovu Sports muri FIFA, TAS n’ahandi. Kiyovu Sports si njye, si kanaka, ugiye i Nyamirambo wayibona. Ese abafana bakwiye ikipe iri mu bibazo nk’ibyo?

Waba waraganiriye n’amakipe ya Azam yo muri Tanzania na Tusker yo muri Kenya nk’uko byavuzwe?

Njye ku giti cyanjye ntabwo navuganye nabo. Banyuze ku bashakira abatoza amakipe. Hari uwanyoherereje ubutumwa kuri WhatsApp ambwira ibya Enyimba FC, ndamubwira nti aho biragoye bitewe n’imikorere ya Federrasiyo yaho. Uyu munsi ndi umukozi nkaba Manager n’Umutoza wa Kiyovu Sports kandi ndi umunyamwuga.

Ni ubuhe butumwa waha abafana n’abayobozi ba Kiyovu Sports?

Niba mukunda Kiyovu Sports koko, nubwo mwaba mubona hari ibibazo, itsindwa imikino, muyihore hafi. Hari ikipe nabonye mu Bubiligi yitwa Antwerp, yagize ibibazo iramanuka ariko abafana bayo baravuze bati nubwo yajya mu cyiciro cya 10, turahari.

Ikipe y’umupira w’amaguru ni iyande? Ni iy’abafana. Njye ndi umutoza, ndi umugenzi, ndi umukozi. Niba mpari ndahari ariko nzagenda.

Ikipe si iya Perezida, si iy’umutoza, si iy’umukinnyi. Umufana ashobora kukubwira ati ngiye kukubwira abakinnyi 11 bo mu 1996.

Narebye umukino w’icyo gihe Kiyovu Sports ikina n’ikipe yo muri Uganda kuri Stade y’i Nyamirambo. Uyu munsi ikipe irahari, hari umufana wari uhari icyo gihe uyu munsi wakubwira abakinnyi bari bahari icyo gihe akanakubwira abanda bahari uyu munsi.

Umutoza nabona uhora hafi y’ikipe, azagerageza kuguha ibyiza ukwiye. Ku bayobozi, nababwira ngo mu bihe bikomeye ni ho abagabo bagaragarira.

Graphique: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .