Ulimwengu Jules agiye gutangwaho akayabo n’ikipe yo mu Bushinwa

Yanditswe na Eric Tony Ukurikiyimfura
Kuya 22 Ukwakira 2019 saa 01:04
Yasuwe :
0 0

Rutahizamu wa Rayon Sports ukomoka mu Burundi, Ulimwengu Jules agiye kugurwa n’ikipe yo mu Bushinwa izamutangaho akayabo k’ibihumbi $50, ni ukuvuga asaga miliyoni 46 Frw.

Ulimwengu Jules yamaze kugera iwabo i Bujumbura mu Burundi, aho azava yerekeza mu Bushinwa kurangizanya n’iyi kipe.

Uyu mukinnyi w’imyaka 21 nta mukino arakinira Rayon Sports muri uyu mwaka nyuma yo kwamburwa indangamuntu y’u Rwanda kuko ari mu bakinnyi bayibonye mu buryo bunyuranyije n’amategeko ndetse kuri ubu akaba atari yakabonye ibyangombwa bimwemerera gukorera mu Rwanda nk’Umunyamahanga.

Umuvugizi wa Rayon Sports, Nkurunziza Jean Paul yabwiye IGIHE ko uyu mukinnyi agiye kugurishwa mu ikipe yo mu Bushinwa yamaze kumvikana na Gikundiro.

Ati "Ni byo, murabizi ko Jules Ulimwengu yari umukinnyi wacu kandi n’ubu aracyari we kuko ntibirarangira. Nk’uko Ubuyobozi bwa Rayon Sports bukunda kubibwira abakinnyi bubashakira uburyo babaho neza yaba no mu makipe baba bagiyemo. Rayon Sports ifite ikipe yayegereye ndetse ibiganiro bigenda neza, byose byumvikanwaho.”

“Murabizi ko Ulimwengu yari yagizwe Umunyamahanga muri ya nkundura yabaye mu minsi ishize, ubu ari i Bujumbura, azahava yerekeza mu Bushinwa aho agomba kujya ariko ari Rayon Sports imwohereje kugira ngo ajye gukinira iyo kipe. Ni umukinnyi uzagurwa amafaranga menshi akaza muri Rayon Sports, ariko na we akabona menshi.”

Jules Ulimwengu yari asigaje umwaka umwe w’amasezerano muri Rayon Sports nyuma yo kuyigeramo muri Mutarama uyu mwaka, avuye muri Sunrise FC na yo yagezemo mu mpeshyi y’umwaka ushize avuye muri Les Jeunes Athletiques yo mu Burundi.

Mu mwaka umwe yari amaze akinira mu Rwanda, yatsinze ibitego icyenda mu mikino 13 yakiniyemo Sunrise FC mu gihe muri Rayon Sportsyatsinze ibitego 11 bya Shampiyona n’ibitego bitanu mu Gikombe cy’Amahoro.

Ulimwengu Jules ari mu bakinnyi bambuwe indangamuntu y'u Rwanda bashinjwa kuyibona mu buryo bunyuranyije n'amategeko
Uyu rutahizamu wa Rayon Sports ukomoka mu Burundi, agiye gutangwaho ibihumbi $50 n'ikipe yo mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza