Uko amakipe azahura muri ¼ na ½ cya UEFA Champions League byamenyekanye

Yanditswe na Eric Tony Ukurikiyimfura
Kuya 10 Nyakanga 2020 saa 01:21
Yasuwe :
0 0

Kuri uyu wa Gatanu, Impuzamashyirahamwe y’Umupira w’Amaguru ku Mugabane w’u Burayi (UEFA) yakoresheje tombora y’uburyo amakipe azahura mu byiciro bibiri bisigaye gukinwa kugira ngo umwaka w’imikino wa 2019/20 urangire.

Iyi tombora yabereye i Nyon mu Busuwisi, yakozwe mu rwego rwo guha umwanya uhagije amakipe, wo kwitegura imikino izasubukurwa muri Kanama uyu mwaka nyuma y’uko irushanwa risubitswe rigeze muri 1/8 kubera icyorezo cya Coronavirus.

Tombora yabaye yasize mu mikino ya kimwe cya kane izaba hagati ya tariki ya 12 n’iya 15 Kanama 2020, ikipe izakomeza hagati ya Manchester City na Real Madrid, izahura n’izakomeza hagati ya Juventus na Lyon muri kimwe cya kane (1/4).

Champions League yakomwe mu nkokora na Coronavirus kuva tariki ya 11 Werurwe, ubwo imikino ya kimwe cy’umunani yari igeze hagati. Manchester City yagombaga kwakira Real Madrid mu mukino wo kwishyura wari kuba tariki ya 17 Werurwe nyuma y’uko yari yatsindiye muri Espagne ibitego 2-1.

Bayern Munich yari yatsinze Chelsea ibitego 3-0, Juventus itsindwa na Lyon igitego 1-0 mu gihe FC Barcelone yari yanganyije na Napoli igitego 1-1.

Amakipe ya Paris Saint-Germain, Atalanta, Atlético Madrid na RB Leipzig yari yamaze kubona itike ya kimwe cya kane.

Uko tombora ya 1/4 yarangiye:

  • Real Madrid na Manchester City vs Lyon na Juventus
  • RB Leipzig vs Atlético Madrid
  • Napoli na FC Barcelone vs Chelsea na Bayern Munich
  • Atalanta vs Paris St-Germain

Muri kimwe cya kabiri, ikipe izava hagati RB Leipzig na Atletico Madrid izahura n’izava hagati ya Atalanta na Paris St-Germain mu gihe n’andi makipe asigaye azahura hagati yayo.

Imikino yose isigaye muri kimwe cya kane na kimwe cya kabiri izajya ikinwa ari umwe (nta mukino wo kwishyura), izabera ku bibuga bibiri byo muri Lisbon- Estadio da Luz na Estadio Jose Alvalade.

Umurwa Mukuru wa Portugal, Lisbon, uzakira imikino ya kimwe cya kane, iya kimwe cya kabiri n’umukino wa nyuma, yose izakinwa hagati ya tariki ya 12 n’iya 23 Kanama uyu mwaka.

Imikino ya kimwe cy’umunani yo kwishyura yari isigaye, izakinirwa aho yagombaga kubera cyangwa muri Portugal kuri Estádio do Dragão y’i Porto na Estádio D. Afonso Henriques y’i Guimarães hagati ya tariki ya 7 n’iya 8 Kanama.

Real Madrid yari yatsinzwe na Manchester City mu mukino ubanza wa 1/8

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .