UEFA na Premier League byamaganye amakipe 12 akomeye yemeye kujya muri European Super League

Yanditswe na Eric Tony Ukurikiyimfura
Kuya 18 Mata 2021 saa 10:54
Yasuwe :
0 0

Impuzamashyirahamwe y’Umupira w’Amaguru i Burayi (UEFA) ku bufatanye na shampiyona eshatu zikomeye kuri uwo mugabane, yamaganye yivuye inyuma icyemezo cy’amakipe 12 akomeye arimo atandatu yo mu Bwongereza, yemeye kujya mu mushinga mushya w’irushanwa rya European Super League.

Arsenal, Chelsea, Liverpool, Manchester City, Manchester United na Tottenham ni amwe mu makipe 12 yamaze kwemera kwitabira irushanwa rya European Super League nk’uko byatangajwe n’ikinyamakuru The Times.

Andi makipe akomeye yemeye kwitabira iri rushanwa arimo Atlético Madrid, FC Barcelone na Real Madrid zo muri Espagne, Milan AC, Inter Milan na Juventus zo mu Butaliyani.

Mu itangazo yashyize hanze kuri iki Cyumweru tariki ya 18 Mata 2021, UEFA yavuze ko izakoresha “ingamba zose” zishoboka mu guhagarika uyu mushinga w’irushanwa “rishingiye ku nyungu za bamwe”.

Abafita amazina akomeye mu mupira w’amaguru i Burayi ntibishimiye uyu mushinga w’irushanwa rya European Super League.

Mu makipe bivugwa ko yamaze kwemera kuryitabira nta n’imwe iragira icyo ibivugaho, ariko byitezwe ko hasohoka itangazo rijyanye nabyo kuri iki Cyumweru.

UEFA yari yatangiye gutekereza uburyo bwo kuvugurura uko Champions League ikinwa, igatangira kwitabirwa n’amakipe 36 guhera mu mwaka wa 2024 ndetse bizemezwa ku wa Mbere.

Kuri iki Cyumweru, yasohoye itangazo yateguye ifatanyije n’amashyirahamwe y’imikino mu Bwongereza, muri Espagne no mu Butaliyani, Premier League, La Liga ndetse na Serie A.

Izi mpande zose zavuze ko zizakomeza “gukorera hamwe” mu kugerageza guhagarika itangizwa rya European Super League ndetse “Amakipe azaryitabira azahagarikwa mu yandi marushanwa yaba ayo ku rwego rw’Isi, i Burayi no mu bihugu byabo, abayakinira ntibazaba bemerewe gukinira ibihugu byabo.”

UEFA yashimiye kandi amakipe yo mu Budage no mu Bufaransa ko yanze kwitabira European Super League.

Inkuru bifitanye isano: Umushinga wa European Super League watesheje umutwe FIFA na UEFA uteye gute?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .