Aya makipe agiye guhurira kuri uyu mukino yombi asanzwe muri Shampiyona y’u Bwongereza, ariko ikaba itarayagendekeye neza kuko ari mu myanya mibi. Man United iri ku mwanya wa 16 na Spurs iri ku wa 17, ibintu bitari bisanzwe dore ko izi kipe zombi zakundaga kuza mu myanya y’imbere.

Muri Premier League kandi, aya makipe yombi yatsinzwe imikino ibiri iheruka. Tottenham yatsinzwe na Aston Villa na Crystal Palace, mu gihe Manchester United yatsinzwe na Chelsea na West Ham.

Sevilla yo muri Espagne na Fulham yo mu Bwongereza, ni yo makipe yaherukaga gukina umukino wa nyuma ari mu myanya mibi, aho zari ku mwanya wa 12 muri Shampiyona yazo.

Ni umukino uza kuba ukomeye kuko Tottenham iri gushaka igikombe ikumbuye cyane kuko igiheruka mu 2008 ubwo yegukanaga Carabao Cup, ndetse n’igikombe cyo ku Mugabane w’i Burayi iheruka mu 1984.

Ibi biratandukanye kuri Manchester United iheruka gutwara iki gikombe mu mwaka w’imikino wa 2016/17, mu gihe imbere mu gihugu iheruka icya FA Cup mu 2024.

Mbere y’uko impande zombi zihura, abatoza bagize ibyo batangaza mbere y’umukino, aho Ruben Amorim wa Manchester United yavuze ko yifuza gusubira mu marushanwa mpuzamahanga kandi uyu ari wo mukino uzamufasha.

Ati “Kubona itike ya UEFA Champions League ni cyo cya mbere kuri twe, kuko gukina Europa League ntabwo bihagije. Ubu ni uburyo bwo gutegura umwaka wacu utaha.”

Ni mu gihe Ange Postecoglou wa Tottenham uza kuyitoza umukino wa 100 yagize ati “Uyu ni umukino ufite icyo uvuze ku bakinnyi, abafana ndetse nanjye. Buri kimwe cyose tuzagikora kuri uyu mukino kandi birashoboka. Ndamutse ntanatsinze kandi ndabizi ko nzakomeza gushakira ikipe ibikombe.”

Mu nshuro eshanu Amorim amaze kugera ku mukino wa nyuma, yatsinze imikino itatu anganya ibiri mu gihe gisanzwe cy’umukino, mu gihe Postecoglou yakinnye itandatu agatsindamo itanu, agatsindwa umwe.

Abakinnyi 11 bashobora kubanza mu kibuga ruhande rwa Manchester United barimo Andre Onana, Victor Lindelöf, Harry Maguire, Leny Yoro, Noussair Mazraoui, Casemiro, Manuel Ugarte, Patrick Dorgu, Bruno Fernandes, Alejandro Garnacho na Rasmus Højlund.

Abo Tottenham ishobora gukoresha ni Guglielmo Vicario, Pedro Porro, Cristian Romero, Micky van de Ven, Destiny Udogie, Rodrigo Bentancur, Yves Bissouma, Wilson Odobert, Brennan Johnson, Son Heung-min na Dominic Solanke.

Bruno Fernandes ahanzwe amaso ku ruhande rwa Manchester United

Heung-min Son ni umwe mu bitezwe ku ruhande rwa Spurs

Ikipe yegukana igikombe, irabona itike yo kuzitabira UEFA Champions League