00:00:00 IGIHE NETWORK KN KINYARWANDA EN ENGLISH FR FRANCAIS

UEFA Champions League: PSG yatsikiye, Chelsea na Juventus ziramwenyura

Yanditswe na Byiringiro Osée Elvis
Kuya 6 Ukwakira 2022 saa 10:09
Yasuwe :

Ikipe ya Paris Saint Germain yatsikiriye muri Portugal ihanganyiriza na Benfica igitego 1-1, Chelsea FC itsinda AC Milan ibitego 3-0 mu gihe Juventus yabonye amanota atatu ya mbere mu mikino y’umunsi wa gatatu wa UEFA Champions League.

Iyi mikino yo mu matsinda yabereye ku bibuga bitandukanye ku mugoroba wo ku wa Gatatu, tariki ya 5 Ukwakira 2022.

Umukino Chelsea yakiriyemo AC Milan ni wo wari uw’umunsi, watangiye iyi kipe yo mu Mujyi wa Londres isatira bikomeye, kuko ku munota wa kane gusa Mason Mount yari amaze guhusha igitego, aho umupira yateye umunyezamu wa AC Milan, Ciprian Tatarusanu yawushyize muri koruneri.

Chelsea FC yongeye guhusha igitego ku munota wa 22, ku mupira wavuye kuri Coup Franc ariko Thiago Silva awuteye n’umutwe usanga Tatarusanu ahagaze neza, akiza izamu rye.

Ntibyatinze kuko iyo koruneri ari yo yabyaye igitego cya mbere cya Chelsea, cyatsinzwe na Wesley Fofana ku munota wa 24 nyuma y’akavuyo kenshi kabaye imbere y’izamu.

AC Milan yagowe n’igice cya mbere, mu minota itatu y’inyongera nibwo yageze imbere y’izamu rya Chelsea ryari ririnzwe na Kepa Arrizabalaga, ariko uburyo yabonye nta musaruro bwabyaye.

Iminota 45 ya mbere y’uyu mukino yarangiye Chelsea FC itsinze AC Milan igitego 1-0.

Mu gice cya kabiri, Chelsea FC yakomeje kugaragaza amashagaga bigaragara ko iri hejuru ya AC Milan, kuko nyuma y’iminota 10 gusa Pierre-Emerick Emiliano François Aubameyang yatsinze igitego cya kabiri ku mupira wahinduwe imbere y’izamu na myugariro w’Umwongereza, Reece James.

Bidatinze, ku munota wa 61 Reece James w’imyaka 22 yatsinze igitego cya gatatu ku mupira yahawe na Raheem Sterling. Ni nako umukino warangiye, Chelsea itsinze AC Milan ibitego 3-0.

Undi mukino wabaye muri iri tsinda E, FC Salzburg yatsinze Dinamo Zagreb igitego 1-0, cyatsinzwe n’Umusuwisi Noah Arinzechukwu Okafor ku munota wa 71 kuri penaliti.

  Manchester City ikomeje gukanga Isi

Mu Itsinda G, Manchester City yo mu Bwongereza yanyagiye Fc Copenhagen ibitego 5-0. Rutahizamu Erling Braut Haaland yongera kunyeganyeza inshundura inshuro ebyiri.

Abakunzi b’umupira w’amaguru muri rusange bakomeza kwibaza uzahagarika uyu musore w’imyaka 22 y’amavuko.

Ibindi bitego byinjijwe na Riyad Karim Mahrez na Julián Álvarez ndetse na D. Khocholava witsinze igitego.

Muri iri tsinda kandi Seville FC yatsindiwe mu rugo na Borussia Dortmund ibitego 4-1.

Undi mukino wari witezwe kuri uyu munsi ni Paris Saint Germain yari yasuye Benfica Lisbon, uza kurangira amakipe yombi aguye miswi ku gitego 1-1.

Ku munota wa 22 ni bwo Lionel Messi yatsindiye PSG ariko iki gitego kiza kwishyurwa ku munota wa 41 binyuze kuri Danilo Luís Hélio Pereira witsinze.

Igitego Lionel Messi yatsinze Benfica cyatumye iba ikipe ya 40 uyu mugabo yinjije igitego mu mateka ye.

Muri iri tsinda H, Juventus yabonye amanota atatu ya mbere itsinze Maccabi Haifa ibitego 3-1.

Juventus yo mu Butaliyani yatsindiwe n’Umufaransa Adrien Rabiot-Provost winjije bibiri n’Umunya-Serbia Dušan Vlahović, mu gihe Maccabi Haifa yatsindiwe n’Umunya-Israel, Dean David.

Mu wundi mukino wari utegerejwe na benshi ni uwo mu Itsinda F, aho Real Madrid ibitse igikombe cya Champions League giheruka yatsinze Shakhtar Donetsk ibitego 2-1.

Iyi kipe yo muri Espagne yabonye intsinzi ibifashijwemo na Rodrygo na Vinicius Junior mu gihe Shakhtar Donetsk yatsindiwe n’Umunya-Ukraine, Oleksandr Zubkov.

Muri iri tsinda kandi RB Leipzig yo mu Budage yatsinze Celtic ibitego 3-1.

Kuri uyu wa kane tariki ya 6 Ukwakira 2022, ku Mugabane w’u Burayi harakinwa imikino ya Europa League.

Imwe mu mikino iteganyijwe muri Europa League

  Arsenal vs Bodoe/Glimt [21:00]

  AS Roma vs Real Betis [21:00]

  Omonia Nicosia vs Manchester United [18:45]

  Monaco vs Trabzonspor [18:45]

Benfica yabaye ikipe ya 40 muri Champions League Lionel Messi yatsinze igitego
Pierre Emerick Aubameyang na Reece James bitwaye neza mu mukino Chelsea yatsinzemo AC Milan
Aubameyang azwiho kwishimira igitego atera siporo
Uhereye ibumoso: Rodrygo Silva de Goes, Federico Santiago Valverde Dipetta na Vinicius Jr ba Real Madrid bitwaye neza mu mukino batsinzemo Shakhtar Donetsk
Erling Braut Haaland yatsinze ibitego bibiri mu mukino ikipe ye yanyagiyemo FC Copenhagen
Manchester City imaze kwerekana ko ari imwe mu makipe akomeye muri ruhago y'Isi
Adrien Rabiot yatsinze ibitego bibiri afasha Juventus kubona amanota atatu ya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .