00:00:00 IGIHE NETWORK KN KINYARWANDA EN ENGLISH FR FRANCAIS

Abatoza b’imikino ngororamubiri basabwe kurema abakinnyi bundi bushya

Yanditswe na Iradukunda Olivier
Kuya 22 Ukuboza 2022 saa 07:45
Yasuwe :

Abatoza b’Imikino Ngororamubiri mu Rwanda basabwe kubyaza umusaruro ubumenyi bungukiye mu mahugurwa bahawe, bagafasha abakinnyi kuzamura urwego ku buryo babasha kwitwara neza no gutsinda amarushanwa mpuzamahanga.

Ibi babibwiwe ubwo hasozwaga amahugurwa yatanzwe n’Umuyobozi ushinzwe amasomo mpuzamahanga mu Mpuzamashyirahamwe y’Imikino Olempike mu Budage (DOSB), Dr. Winfried Spanaus washimye urwego rw’abo yahuguye kuva tariki ya 7 kugeza ku ya 21 Ukuboza 2022.

Muri aya mahugurwa yamaze ibyumweru bibiri, abatoza 15 bayitabiriye bahawe ubumenyi ndetse bafata n’umwanya wo kubushyira mu bikorwa aho banakoze ikizamini kigaragaza urwego rwabo.

Perezida w’Ishyirahamwe ry’Imikino Ngororamubiri mu Rwanda [RAF], Lt Col (Rtd) Kayumba Lemuel, yavuze ko gahunda zo guhura abatoza zizahoraho kuko hagamijwe kubona abakinnyi beza bashoboye guhatana kandi byose bikaba bisaba abatoza beza.

Ati “Amahugurwa azahoraho ariko ntabwo ari aya gusa, hari n’andi tuzakoresha yisumbuye kuri aya, turashaka kujya ku cyiciro cy’imyaka itanu. Turashaka ko abatoza bacu bafasha abakinnyi kuba beza, bakabarema bushya.”

Yakomeje agira ati “Nabibabwiye nti ‘ubumenyi tubahaye ntabwo ari ubwanyu’, bagomba kujya kubuha abakinnyi n’abandi batoza. Intego yacu ni ukubona ‘Athlétisme’ yacu ivuye aho iri, igeze ku rundi rwego. Abandi ntacyo baturusha.”

Nyiraneza Joselyne, umugore rukumbi uri mu bahuguwe, yavuze ko aya mahugurwa yabunguye byinshi mu bijyanye no gutegura abakinnyi ku buryo bizeye ko bizaba igisubizo ku bajyaga bagorwa no gusoza amasiganwa atandukanye.

Ati “Twungutse ubumenyi butandukanye ku bantu biruka intera iringaniye n’intera ndende, mu mitoreze no mu bijyanye n’imirire y’abakinnyi. Iyo umukinnyi wamuteguye ku gihe, ukamuha ibisabwa, uko byagenda kose aratsinda. Tugiye kubibyaza umusaruro, twari dusanzwe dutoza ariko hari icyo batwunguye.”

Mutigana Jean Damascène utoza amakipe ya Rulindo mu bagabo n’abagore, akaba amaze imyaka 16 muri uyu mwuga, na we yashimangiye ko ubumenyi bahawe bugiye guhindura byinshi mu Mikino Ngororamubiri mu Rwanda.

Ati “Impamba dukuyemo ni nini ugereranyije n’igihe tumaze dutoza n’uburyo twatozaga, ubona ko hari ikintu kinini dukuyemo. Hari igihe umuntu atoza ibintu byagirira umukinnyi akamaro cyangwa akamutoza ibishobora kumwangiza. Urumva iyo umuntu afite ubumenyi bukeya, hari ibyo adakora neza.”

Isozwa ry’aya mahugurwa ryari ryitabiriwe n’abayobozi b’Ishyirahamwe ry’Imikino Ngororamubiri mu Rwanda [RAF], Fidèle Kajugiro Sebarinda wari uhagarariye Komite Olempike y’u Rwanda n’Umujyanama wa Ambasaderi w’u Budage mu Rwanda, Peter Primus.

Abahuguwe ni Hirwa Isaë, Ntirisanganwa Emmanuel, Buregeya Aimable, Bizimana Manasseh, Mutiganda Jean Damascène, Bagina Robert Thimothy, Nyiraneza Joselyne, Ndagijimana Donatien, Nkurikiyimana Fabien, Kanyabugoyi Anicet, Nduwayezu Bruno, Nshimiyimana Théogène, Niyodusenga Jean Bosco, Dusengimana Thaddée na Mushimiyimana Pascal.

Umujyanama wa Ambasaderi w'u Budage mu Rwanda, Peter Primus ari kumwe na Perezida wa RAF, Lt Col (Rtd) Kayumba Lemuel
Dr. Winfried Spanaus wahuguye aba batoza b'Abanyarwanda
Abitabiriye aya mahugurwa bahawe impamyabumenyi
Abatoza 15 ni bo bahuguwe ku bijyanye no gusiganwa intera ndende n'iringaniye, ni ukuvuga guhera kuri metero 1500 kugeza kuri 'marathon'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .