U Rwanda rwashyizwe mu gakangara ka kabiri muri tombola ya CHAN 2020

Yanditswe na Eric Tony Ukurikiyimfura
Kuya 16 Gashyantare 2020 saa 10:22
Yasuwe :
0 0

Impuzamashyirahamwe y’Umupira w’Amaguru muri Afurika (CAF), ryashyize ahagaragara uburyo amakipe azaba agabanyije mu dukangara muri tombola y’amatsinda ya Shampiyona Nyafurika ihuza abakinnyi bakina imbere mu bihugu byabo (CHAN 2020) izabera muri Cameroun guhera tariki ya 4 kugeza ku ya 25 Mata 2020.

Iyi tombola iteganyijwe kuri uyu wa Mbere tariki ya 17 Gashyantare 2020 saa 18:00 mu Ngoro y’Imikino yose iri mu Mujyi wa Yaoundé muri Cameroun, aho izayoborwa na Samson Adamu ushinzwe amarushanwa muri CAF, ari kumwe n’abanyabigwi b’Abanya-Cameroun; Stephen Tataw na Salomon Olembé.

Kuri iki Cyumweru tariki ya 16 Gashyantare 2020 nibwo CAF yatangaje uko amakipe azaba agabanyije mu dukangara muri iri rushanwa. Cameroun izaryakira, yashyizwe mu ka mbere hamwe na Maroc yatwaye iriheruka, Libya yatwaye irya 2014 na Zambia.

Amavubi y’u Rwanda agiye gukina CHAN ku nshuro ya kane, yashyizwe mu gakangara ka kabiri karimo Repubulika Iharanira Demokarasi ya Congo yatwaye CHAN ya 2016 yabereye i Kigali, Guinée na Mali.

U Rwanda rwakiriye CHAN 2016, rugiye gukina iri rushanwa rihuza abakinnyi bakina imbere muri za shampiyona zabo ku nshuro ya gatatu yikurikiranya ndetse n’iya kane muri rusange nyuma yo kwitabira CHAN 2011 yabereye muri Sudani.

Inshuro ebyiri gusa (2009 na 2014) ni zo u Rwanda rutitabiriyemo iri rushanwa.

Mu nshuro eshatu Amavubi amaze gukina iri rushanwa, inshuro imwe nibwo yarenze amatsinda, asezererwa na Repubulika Iharanira Demokarasi ya Congo ku bitego 2-1 muri ¼ cya CHAN 2016 yabereye mu Rwanda.

Mu kwitegura irushanwa ry’uyu mwaka, u Rwanda ruzakina imikino ibiri ya gicuti na Cameroun (tariki ya 24 Gashyantare) na Congo Brazzaville (tariki ya 28 Gashyantare), ibihugu byombi rushobora guhurira nabyo mu itsinda rimwe kuko biri mu dukangara dutandukanye.

Uko ibihugu bigabanyijwe mu dukangara:

Agakangara ka mbere: Cameroun, Maroc, Libya na Zambie.

Agakangara ka kabiri: DR Congo, Guinée, Mali n’u Rwanda

Agakangara ka gatatu: Uganda, Congo Brazzaville, Namibie na Burkina Faso.

Agakangara ka kane: Zimbabwe, Niger, Togo na Tanzania.

U Rwanda rushobora gutombora Cameroun na Congo Brazzaville muri CHAN 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza