Tony Hernandez yasezeye kuri Mukura VS

Yanditswe na Eric Tony Ukurikiyimfura
Kuya 2 Nzeri 2020 saa 04:06
Yasuwe :
0 0

Umunya-Espagne Tony Hernandez watozaga Mukura Victory Sports, yandikiye ubuyobozi avuga ko atazayigarukamo nyuma y’umwaka umwe yayitoje.

Hernandez yari umutoza muri Mukura Victory Sports guhera muri Nyakanga 2019, aho yabanje kungiriza umutoza mukuru Mathurin Olivier Ovambe.

Nyuma yo kwirukanwa k’umutoza mukuru mu Ukwakira, Hernandez yahawe gusigarana ikipe, ayifasha gusoza Shampiyona iri ku mwanya wa kane, irushwa amanota 19 na APR FC yatwaye igikombe.

Ubwo ingendo z’indenge zari zisubukuwe mu ntangiriro za Kanama uyu mwaka, yagiye mu biruhuko iwabo muri Espagne.

Bivugwa ko uyu mutoza ashobora kwerekeza muri Real de Minas yo muri Honduras nk’uko itangazamakuru ryo muri icyo gihugu ryabayanditse.

Visi Perezida wa Mukura Victory Sports, Sakindi Eugène, yemereye IGIHE ko bamaze gutandukana n’uyu mutoza wanditse asezera.

Ati “Yatwandikiye, ibaruwa twamaze kuyibona. Yavuze ko atazagaruka ndetse yanashimye uburyo yabanye n’umuryango wa Mukura Victory Sports.”

Sakindi yakomeje avuga ko kuri ubu bagiye gutangira gushaka undi mutoza nubwo nta byinshi yashatse kubitangazaho.

Bivugwa ko Masudi Djuma ari we ushobora kugirwa umutoza wa Mukura Victory Sports mu gihe kandi andi makuru IGIHE yamenye ari uko uzagirwa umutoza azaba ari Umunyarwanda.

Mu mikino 21, Tony Hernandez yatojemo Mukura Victory Sports, yayihesheje amanota 36.

Tony Hernandez yagizwe umutoza mukuru wa Mukura Victory Sports mu Ukwakira 2019 nyuma yo kwirukanwa kwa Olivier Ovambe
Hernandez yamaze gusezera kuri Mukura VS, avuga ko atazagaruka mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .