00:00:00 IGIHE NETWORK KN KINYARWANDA EN ENGLISH FR FRANCAIS

Tony Football na Isonga zigaragaje hasozwa umwiherero wo gukarishya impano

Yanditswe na Byiringiro Osée Elvis
Kuya 4 November 2024 saa 08:18
Yasuwe :

Abana bo muri Porogarame Isonga na Tony Football bigaragaje ubwo hasozwaga umwiherero w’iminsi ine, wateguwe mu rwego rwo gukarishya impano z’abakiri bato.

Uyu mwiherero wabereye mu Karere ka Huye witabiriwe n’abana 516 barimo 268 b’abakobwa n’abahungu 248 baturutse mu bigo bisanzwe bibarizwamo Porogarame Isonga n’abandi batumiwe nk’amakipe y’abato ya APR mu bahungu n’abakobwa, Irerero rya Paris Saint-Germain n’irya Bayern Munich ndetse na Tony Football Academy.

Wakozwe mu mikino itandatu ariyo umupira w’amaguru, Amagare, gusiganwa ku maguru, Basketball, Volleyball na Handball.

Mu mikino ya nyuma yabaye ku Cyumweru tariki 3 Ugushyingo 2024, yasize mu mupira w’amaguru Tony Football yigaragaje cyane, inyagira Paris Saint-Germain ibitego 4-1, mu gihe mu bakobwa APR FC na yo yatsinze PSG igitego 1-0.

Muri Handball, Isonga A yatsinze Isonga B ibitego 22 kuri 14, mu gihe mu bakobwa Isonga A yatsinze ESC Nyamagabe ibitego 25-23. Hirwa Cyusa Derrick na Masengesho Rosine wa Kiziguro SS babaye abakinnyi beza b’irushanwa.

Mu gusiganwa ku maguru, Cyizere Samuel na Abizera Sonia Elohe ba GS Sina Gerard bitwaye bahize abandi.

Mu magare, Masengesho Yvonne wa GS Ntinda, Shema Emmanuel wa Mukarange VTC, Jogovayire Lisa wa Catholic School Rwamagana na Ntwari Reponse wa GS Muhoza I bitwaye neza mu byiciro bitandukanye.

Mu bakinnyi bigaragaje cyane muri iyi mikino ndetse banahembwe, mu mupira w’amaguru Kapiteni wa Tony Football, Dushime Claude na Atete Shalon wa IPM Mukarange bahize abandi.

Muri Volleyball yabaye Kundwa Happy wa Groupe Scolaire Officiel de Butare na Tuyishime Clarisee wa ISF Shangi.

Muri Basketball higaragaje Nkuzwenimana Jean Luc na Atete Raissa ba Lycée de Kigali. Handball yabaye Hirwa Cyusa Derrick wa ES Kigoma na Masengesho Rosine wa Kiziguro SS.

Mu gusiganwa ku maguru, Cyizere Samuel na Abizera Sonia ba GS Sina Gerard, mu gihe Amagare abitwaye neza ari Shema Emmanuel wa Mukarange VTC na Masengesho Yvonne wa GS Kabare.

Aba bakinnyi bose buri umwe yahembwe amafaranga y’ishuri y’igihe cya kabiri n’icya gatatu by’uyu mwaka w’imikino ndetse n’amakipe ahabwa ibikombe n’ibikoresho bitandukanye.

Minisitiri wa Siporo, Nyirishema Richard wari umushyitsi mukuru mu muhango wo gusoza uyu mwiherero, yatangaje bishimiye uko iki gikorwa cyagenze asezeranya gukomeza gukurikira izi mpano.

Yagize ati “Yari gahunda nziza yo gushaka impano ariko ntabwo uzishaka mu minsi ine, ariyo mpamvu dushimira abantu bazifasha mbere y’aho kuko twe ubu twari twazihurije mu marushanwa kuko nibwo zibasha kwitinyuka. Tuzakomeza kuzikurikirana kugira ngo zizagere ku rwego rwiza.”

Uyu mwiherero ni umwe muri gahunda igamije gutegura Imikino Olempiki y’Urubyiruko (Youth Olympic Games 2026) izabera i Dakar muri Sénégal mu 2026.

Tony Football yegukanye umwanya wa mbere mu mupira w'amaguru
APR WFC yahize abandi mu bakobwa
Isanga A ishyikirizwa igihembo muri Handball
Isonga A yongeye kwigaragaza muri Handball y'abakobwa
Abahize abandi muri Volleyball bashimirwa
Lycée de Kigali yigaragaje muri Basketball y'abakobwa
Abayobozi batandukanye bitabiriye iki gikorwa
Handball ni umwe mu mikino u Rwanda rufitemo impano
Minisitiri wa Siporo, Nyirishema Richard ashyikiriza igihembo Tuyishime Clarisse wahize abandi muri Volleyball
Masengesho Rosine wahize abandi muri Handball mu bakobwa
Masengesho Yvonne wa GS Kabare ashyikirwa igihembo na Perezeda wa FERWACY, Ndayishimiye Samson
Kundwa Happy yahize abandi muri Volleyball ahembwa amafaranga y'ishuri
Kundwa Happy yahize abandi muri Volleyball ahembwa amafaranga y'ishuri
Cyusa Derrick wahize abandi muri Handball ashyikirizwa igihembo
Minisitiri wa Siporo, Nyirishema Richard yishimiye uko iki gikorwa cyagenze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .