Thomas Tuchel yagizwe umutoza mushya wa Chelsea

Yanditswe na Eric Tony Ukurikiyimfura
Kuya 26 Mutarama 2021 saa 09:13
Yasuwe :
0 0

Chelsea FC yo mu Cyiciro cya Mbere mu Bwongereza, yemeje Umudage Thomas Tuchel nk’umutoza wayo mushya ku masezerano y’amezi 18.

Tuchel yari amaze ukwezi kumwe atandukanye na Paris Saint-Germain yo mu Bufaransa, aho yayihesheje ibikombe bibiri bya Shampiyona, Igikombe cy’Igihugu, n’icya League Cup mu myaka ibiri n’igice yayitojemo.

Uyu mugabo w’imyaka 47, yasimbuye Umwongereza Frank Lampard wirukanywe ku wa Mbere, nyuma y’amezi 18, kubera umusaruro mubi, aho yatsinze umukino umwe muri itanu ya Shampiyona yaherukaga gutoza.

Thomas Tuchel yabaye umutoza wa 11 uhawe akazi muri Chelsea nyuma y’uko iguzwe na Roman Abramovich mu 2003.

Byitezwe ko uyu mutoza mushya azemererwa kureba umukino wa Premier League, Chelsea izakiramo Wolves ku wa Gatatu saa Mbiri z’ijoro, ariko akaba azajya mu kato mu gihe cy’iminsi itanu.

Lampard w’imyaka 42, wakiniye Chelsea imyaka 14, akaba ari na we wayitsindiye ibitego byinshi mu mateka, yatoje umukino we wa nyuma ku Cyumweru, itsinda Luton Town ibitego 3-1 muri FA Cup.

Yari yahawe amasezerano y’imyaka itatu ubwo yasimburaga Maurizio Sarri wirukanywe muri Nyakanga 2019, ayifasha gukina Champions League ibaye iya kane muri Shampiyona ndetse anayigeza ku mukino wa nyuma wa FA Cup mu mwaka we wa mbere.

Gutsinda Leeds United ibitego 3-1 mu ntangiriro z’Ukuboza, byashyize Chelsea ku mwanya wa mbere muri Premier League, ariko intsinzwi eshanu zabonetse mu mikino umunani yakurikiyeho muri Shampiyona zatumye iyi kipe yambara ubururu yisanga ku mwanya wa cyenda.

Tuchel wahawe kumusimbura, nta mezi atanu ashize agejeje Paris Saint-Germain ku mukino wa nyuma wa Champions League ndetse yatoje amakipe arimo Mainz na Borussia Dortmund zo mu Budage.

Afite umwihariko wo kugira umusaruro mwiza wo gutsinda, aho muri Mainz yagize 39%, muri Dortmund agira 63% naho muri Paris Saint-Germain agira 75%.

Thomas Tuchel yagizwe umutoza mushya wa Chelsea

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .