StarTimes yashyize igorora abakunzi ba Europa League

Yanditswe na Eric Tony Ukurikiyimfura
Kuya 19 Gashyantare 2020 saa 09:38
Yasuwe :
0 0

Irushanwa rya Europa League rifatwa nka murumuna wa UEFA Champions League, rizakomeza ejo ku wa Kane, tariki ya 20 Gashyantare 2020, aho umukino wa 1/16 ubanza utegerejwe na benshi ari uzahuza Olympiacos yo mu Bugereki hamwe na Arsenal yo mu Bwongereza.

Arsenal yatsindiwe ku mukino wa nyuma wa Europa League mu mwaka ushize, izakirwa na Olympiacos nyuma yo kwisengera Newcastle ikayitsinda ibitego 4-0 ku Cyumweru muri Shampiyona, ubwo Mesut Özil yatsindaga igitego cye cya mbere muri uyu mwaka w’imikino.

Iyi kipe yo mu Bugereki imaze iminsi ihagaze neza mu rugo muri Europa League, yatsinze Burnley mu gushaka itike yo gukina iri rushanwa iranayisezerera.

Umunyezamu wa Arsenal, Bernd Leno, yizeye ko we na bagenzi be bazitwara neza imbere ya Olympiacos nyuma yo kugorwa n’imikino y’amatsinda.

Ati “ Dufite imikino ikomeye cyane muri Europa League, ni imikino myinshi ikomeye kuko mu mwaka ushize w’imikino twabonye ko muri ¼ cya Europa League no muri ½ uhura n’amakipe aba avuye muri Champions League.”

“Bose baba bahataniye gutwara igikombe kandi umukino wa nyuma [wa Europa League] wari ukomeye cyane. Turashaka kongera kugera ku mukino wa nyuma. Dufite icyizere ko dushobora kwegukana igikombe uyu mwaka.”

Amakipe abiri ya mbere muri buri tsinda rya Europa League, yiyongereyeho amakipe umunani yabaye aya gatatu muri Champions League, bituma iri rushanwa ribonekamo amazina akomeye nka Ajax, Porto na Inter Milan.

Manchester United, yatwaye Europa League mu 2017, izaba yerekeje mu Bubiligi mu mukino izakirwamo na Club Brugge guhera saa Moya n’iminota 55 (19:55). Amashitani atukura yakinnye na Chelsea ku wa Mbere atsinda ibitego 2-0, bivuze ko azaba afite iminsi itatu gusa yo kuruhuka.

Umutoza wayo, Ole Gunnar Solsjkær yajyaga aha umwanya abakinnyi badasanzwe bakina muri Europa League mu gihe kuri ubu iyi kipe ikomeje gushaka uko yabona umwanya mwiza muri Premier League.

Ikipe ya gatatu yo mu Bwongereza isigaye mu irushanwa ni Wolverhampton Wanderers, izaba iri mu rugo kuri Stade Molineux , ikazakira Espagnol Barcelone yo muri Espagne.

Wolves yongeye gukina amarushanwa y’Uburayi bwa mbere kuva mu mwaka w’imikino wa 1980/01 ubwo yasezererwaga na PSV Eindhoven muri UEFA Cup, ikomeje gushaka uko yagera kure.

Kuri ubu, Wolves iri mu makipe ahagaze neza muri Premier League, aho ikurikye Manchester United ya karindwi, ikaza imbere ya Arsenal ku rutonde rwa Shampiyona.

Mu 1972, Wolves yakoze amateka yo kugera ku mukino wa nyuma wa UEFA Cup, ihatsindwa na Tottenham Hotspur.

Kenny Hibbitt wari muri iyo kipe yageze kuri uyu mukino wa nyuma, avuga ko nta mukino woroha muri iyi yo gukuranamo.

Ati “Kugera muri iyi mikino yo gukuranamo ni kimwe mu bintu byiza uba ugezeho, atari gusa ku mutoza ahubwo ku ikipe yose muri rusange. Espagnol ni ikipe nziza. Nta mukino wa 1/16 woroha.”

Abakunzi b’Umupira w’Amaguru muri Afurika bafite amahirwe yo kureba iyi mikino yose iri kuba mu mashusho meza ya HD ku mashene ya ruhago ya StarTimes ifite uburengazira busesuye bwo kwerekana iri rushanwa.

Umukino Arsenal izakirwamo na Olympiacos ni umwe mu ya Europa League izerekanwa na StarTimes ku wa Kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza