StarTimes yagarukanye na La Liga aho FC Barcelone ifite imikino ibiri ikomeye

Yanditswe na IGIHE
Kuya 15 Ukuboza 2020 saa 05:14
Yasuwe :
0 0

Shampiyona y’Icyiciro cya Mbere muri Espagne, La Liga, izakomeza muri iki cyumweru ahateganyijwe imikino itandukanye irimo iy’ibirarane kuri Real Madrid na FC Barcelone.

Nubwo FC Barcelone yagowe n’intangiriro z’uyu mwaka w’imikino, kuva mu 2008 yagiye isoreza mu myanya ibiri ya mbere muri La Liga ndetse yatwaye iyi Shampiyona inshuro umunani muri 12 kuva icyo gihe.

Iyi kipe iheruka gutsindwa na Juventus ibitego 3-0 muri Champions League, yatsinzwe imikino ine mu 10 ibanza muri Shampiyona.

Nyuma y’imikino ibiri ya Shampiyona, FC Barcelone yayoboye urutonde nyuma yo kubona intsinzi ebyiri, aho yinjije ibitego birindwi, yo itinjizwa, ariko kuva icyo gihe ibintu byarahindutse bigenda mu wundi mujyo ndetse kuri ubu ikeneye amanota kugira ngo ikomeze kuba hafi y’andi makipe ari imbere.

Muri iki cyumweru, ifite imikino ibiri y’ingenzi, aho izahura na Real Sociedad ku wa Gatatu ndetse na Valence C.F ku wa Gatandatu. Iyi mikino yombi izabera i Camp Nou.

Umutoza wayo, Ronald Koeman, yavuze ko ikipe ye ikina neza nubwo itari mu myanya ya mbere kugeza ubu, aho ifite amaota 17 ku mwanya wa munani, irushwa icyenda na Atlético Madrid ndetse na Real Sociedad.

Ati “Turi ikipe yaremye uburyo bwinshi kurusha izindi muri shampiyona kandi ibyo ndabishimira abakinnyi. Dufite abakinnyi nka Messi, Pedri [Pedro González López] na Griezmann. Bakeneye umwanya wo gukiniramo n’ubwisanzure mu kibuga. Muri ubu buryo bw’imikinire yacu, dukora ku buryo bibona cyane.”

“Turi mu bihe bibi nk’ikipe, atari gusa muri siporo. Hari ibindi bintu byinshi. Ntabwo byahinduka mu minsi ibiri, urakomeza ugakora.”

Real Sociedad ni imwe mu makipe ahagaze neza magingo aya ndetse iri ku mwanya wa mbere mu gihe Valence C.F isanzwe iri mu makipe akomeye, aho yegukanye shampiyona inshuro esheshatu.

Umutoza wa Valence C.F, Javi Gracia, afite ikipe irimo abakinnyi bato kurusha abandi muri La Liga ndetse babiri muri bo- Umunya-Koreya y’Epfo ukina hagati, Kang-in Lee, na Yunus Musah wujuje imyaka 18 mu mpera z’ukwezi gushize.

Uyu musore ukiri muto wavukiye i New York, ababyeyi be bakomoka muri Ghana. Musah yabaye mu Butaliyani imyaka 10 mbere yo kujya mu Ikipe y’abato ya Arsenal. Yagiye muri Valence mu 2019, atangira kuyikinira muri Nzeri afite imyaka 17.

Nubwo yakiniye u Bwongereza mu makipe y’abato, yahisemo gukinira Leta Zunze Ubumwe za Amerika ndetse yahamagawe inshuro ebyiri mu kwezi gushize, abanzamo ku mikino ya gicuti ya Pays de Galles na Panama.

Abakunzi b’umupira w’amaguru muri Afurika bazabasha gukurikira iyi mikino yombi FC Barcelone izakina iri kuba ku mashene ya StarTimes nk’ikigo kiyoboye ibindi mu ikoranabuganga ryo gusakaza amashusho ya televiziyo kuri uyu mugabane ndetse kikagira uburenganzira bwihariye bwo kwerekana Shampiyona ya La Liga.

StarTimes izerekana imikino ya La Liga irimo ibiri FC Barcelone izakina muri iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .