StarTimes ikomeje kwerekana Bundesliga, Bayern Munich irakoza imitwe y’intoki ku gikombe

Yanditswe na Eric Tony Ukurikiyimfura
Kuya 3 Kamena 2020 saa 10:28
Yasuwe :
0 0

Nyuma yo gukura intsinzi kuri Dortmund ikananyagira Fortuna Düsseldorf ibitego 5-0 mu mpera z’icyumweru gishize, Bayern Munich iri gusatira igikombe cya munani yikurikiranya muri Shampiyona y’u Budage.

Mu mpera z’iki cyumweru turimo, Bayer Leverkusen ni yo byitezwe ko hari icyo ishobora gukora igakoma mu nkokora uru rugendo rwa Bayern Munich.

Ikipe y’umutoza Peter Bosz, imaze iminsi ifite umusaruro uvanze, aho yatsinze Werder Bremen ibitego 4-1 na Borussia Mönchengladbach ibitego 3-1, ariko ikaba yaratsinzwe na Wolfsburg mbere yo gutsinda Freiburg igitego 1-0 ku wa Gatandatu.

Kai Havertz w’imyaka 20, ni umwe mu bakinnyi beza ba Bayer Leverkusen. Ahagaze neza muri uyu mwaka w’imikino ndetse yifuzwa n’amakipe akomeye i Burayi.

Nyuma yo gutsinda igitego cyahesheje intsinzi ye kuri Freiburg, akaba n’umukinnyi wa mbere wo munsi y’imyaka 21 watsinze ibitego 35 muri Bundesliga, Havertz yasimbuwe kubera imvune.

Umutoza we, Peter Bosz, yizeye ko azaba ameze neza ku mukino wa Bayern Munich uzaba ku wa Gatandatu.

Ati “Ameze neza. Ntabwo nzi neza uko imvune ye iteye, ariko ndizera ko azaba ameze neza.”

Bosz yungukiye ku kuba imikino ibera mu muhezo, akinisha Florian Wirtz w’imyaka 17 mu gihe nta gitutu cy’abafana ashobora guhura nacyo.

Bayern Munich bazahura, iherutse kuzuza imikino umunani yikurikiranya yose iyitsinda. Yinjijemo ibitego 28, itsindwa bitanu.

Mu mukino uheruka kuyihuza na Düsseldorf, rutahizamu Robert Lewandowski yatsinzemo igitego cya 29 muri uyu mwaka w’imikino bituma asigara abura kimwe ngo yuzuze ibitego 30 yatsinze mu mwaka w’imikino wa 2015/16 n’uwa 2016/17. Mu mikino itanu isigaye, afite amahirwe menshi yo gutsinda ibindi bitego.

Borussia Dortmund, ikipe imwe igifite icyizere ko yafata Bayern Munich iyirusha amanota arindwi, yo izaba yakiriye Hertha Berlin ku wa Gatandatu, ibizi ko gutsikira gato bizashyira iherezo ku cyizere cyo kwegukana igikombe.

Mu mpera z’icyumweru, na none StarTimes izerekana shampiyona y’u Budage, Bundesliga, iri kuba ku mashene yayo y’umupira w’amaguru nk’ikigo rukumbi kibifitiye uburenganzira muri Afurika.

StarTimes ikomeje kwerekana Bundesliga mu gihe Bayern Munich iri gusatira igikombe cya munani yikurikiranya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .