Stade ya Gicumbi yemerewe kongera kwakira imikino ya shampiyona (Amafoto)

Yanditswe na Eric Tony Ukurikiyimfura
Kuya 19 Gashyantare 2020 saa 07:05
Yasuwe :
0 0

Ikibuga cya Gicumbi FC cyari kimaze iminsi kivugururwa, cyemerewe kongera kwakira imikino y’amarushanwa ategurwa n’Ishyirahamwe ry’Umupira w’Amaguru mu Rwanda (FERWAFA).

Mbere y’uko Shampiyona y’Umupira w’Amaguru mu Rwanda mu mwaka w’imikino wa 2019/20 itangira mu Ukwakira 2019, FERWAFA yasuye ibibuga byose amakipe yatanze azakiriraho imikino yayo. Stade ya Gicumbi FC iri mu bibuga byasanzwe bitujuje ibisabwa.

Kuva icyo gihe, Gicumbi FC yakiriraga imikino yayo kuri Stade Mumena i Nyamirambo mu Mujyi wa Kigali, ariko ikaba yari yasabwe na FERWAFA kugira ibyo itunganya ku kibuga cyayo maze ikongera kuhakirira.

Mu minsi ishize, IGIHE yanditse ko imirimo yo kuvugurura iki kibuga igeze kure ndetse hari amahirwe menshi yo kongera kwemererwa kwakira imikino.

Bimwe mu byahinduwe kuri iki kibuga harimo kongeramo ubwatsi mu gice kinini cyari kimeze nk’imbuga ndetse hanashyirwamo umucanga.

Hubatswe uruzitiro rutandukanya ikibuga n’igice cy’abafana mu gihe ahari igice gitwikiriye ariko kigatwarwa n’umuyaga, hashyizwe urukuta rushya ku buryo hazajya hubakwa amahema yicarwamo n’abaje kureba umukino.

Kuri uyu wa Gatatu tariki ya 19 Gashyantare 2020, FERWAFA yatangaje ko iki kibuga cyamaze gukomorerwa ndetse Gicumbi FC igiye kujya ihakinira imikino yo mu rugo.

Iki cyemezo cyafashwe nyuma y’uko hari Akanama ka FERWAFA kasuye iki kibuga mu ntangiriro z’iki cyumweru.

Gicumbi FC ya nyuma, ku mwanya wa 16 n’amanota 12, izagaruka mu kibuga mu ntangiriro z’ukwezi gutaha, yakirwa na Espoir FC.

Umukino izakiramo Sunrise FC tariki ya 7 Werurwe 2020, ku munsi wa 22 wa Shampiyona, ushobora kuba uwa mbere izongera gukinira ku kibuga cyayo.

Inkuru bifitanye isano: Ishusho ya Stade ya Gicumbi mbere yo kongera kwakira imikino ya Shampiyona

Gicumbi FC yemerewe kongera kwakirira imikino yayo i Gicumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .