00:00:00 IGIHE NETWORK KN KINYARWANDA EN ENGLISH FR FRANCAIS

Shampiyona ya U-20, ibyuho muri ruhago n’uko yazahuka: DTN wa FERWAFA Gérard Buscher yakanze ahababaza

Yanditswe na Eric Tony Ukurikiyimfura
Kuya 12 Mutarama 2023 saa 07:34
Yasuwe :

Kuri bamwe, Ruhago Nyarwanda babona ko ikura nk’isabune bitewe n’uburyo umusaruro ukomeza kubura haba ku Ikipe y’Igihugu Nkuru ndetse n’amakipe mato haba mu bagabo n’abagore.

Nubwo bimeze gutyo ariko, hashize amezi ane Ishyirahamwe ry’ Umupira w’Amaguru mu Rwanda (FERWAFA) riteye intambwe yo gushaka uburyo umupira w’amaguru wakongera kugira umusingi n’ijambo ku rwego mpuzamahanga, riha akazi Umufaransa Gérard Buscher nk’Umuyobozi Mushya wa Tekinike, ku masezerano y’imyaka ibiri ashobora kongerwaho indi ibiri.

Uyu mugabo w’imyaka 61, yakiniye amakipe menshi yo mu Bufaransa arimo Nice, Nantes, Brest, Montpellier, Matra Racing na Valenciennes.

Gérard wakiniye Ikipe y’Igihugu y’u Bufaransa mu 1986-87, iyo muganira wumva hari uburyo amaze kugira ishusho rusange ya Ruhago y’u Rwanda dore ko ngo ukwezi kwe wa mbere yakumaze ayigaho, aganira n’abantu batandukanye bayibamo.

Urugendo rwe nk’umutoza, Gérard yarutangiriye muri Nice mu 2005. Uyu mugabo kandi yatoje amakipe menshi yo muri Tunisie arimo CA Bizertin, AS Marsa, Stade Gabesien na CS Hammam-Lif aherukamo mu 2019. Birumvikana ko hari icyo azi ku mupira wa Afurika.

By’umwihariko, mu 2021 yabaye umutoza w’umusigire n’Umuyobozi wa Tekinike muri Mauritanie ari naho yaherukaga gukora ndetse ni ho yavuye ubwo yari amaze guhamagarwa na Perezida wa FERWAFA, Nizeyimana Mugabo Olivier, no kwemezwa na mwenewabo Richard Tardy [watoje Amavubi U-17] ko mu Rwanda ari ahantu heza yakorera.

Mu byo Gérard Buscher yitezweho harimo kuzahura umupira w’amaguru w’u Rwanda, binyuze mu gutanga imirongo ngenderwaho no guteza imbere impano nyinshi.

Mu kiganiro kirekire cyihariye yagiranye na IGIHE, yadusangije byinshi ku mushinga afitiye Ruhago Nyarwanda nyuma yo kubona uko iteye, ibyuho biyirimo n’ahakenewe umwotso kugira ngo u Rwanda na rwo rwongere kugaragara mu marushanwa mpuzamahanga nk’uko bimeze kuri Mauritanie uyu munsi, nyamara icyo gihugu cyarandagazwaga n’Amavubi mu myaka 15 ishize.

Yagaragaje ko hari umushinga yatangiye ugomba kumara imyaka ibiri mu gice cyawo cya mbere, ariko byose bisaba amikoro. Muri uyu mwaka 2023, FERWAFA yateganyijwe ko amakipe y’Igihugu yose azakoresha miliyari 2,5 Frw naho agera kuri miliyari 3,4 Frw akazashyirwa mu bikorwa byo kuzamura ruhago n’impano z’abakiri bato.

Hashize amezi ane Gérard Buscher agizwe Umuyobozi wa Tekinike muri FERWAFA

Mu mezi ane umaze inaha, u Rwanda warubonye gute?

Sinabonye umwanya uhagije wo gusura ahantu hatandukanye [mu Rwanda], ubwo nageraga hano hagati muri Nzeri. Icyo nakoze ni ugushaka uburyo mpura n’abafite aho bahuriye n’umupira w’amaguru mu Rwanda, ndeba abana bitoza barimo abatarengeje imyaka 10, 13, 15, abahungu n’abakobwa.

Nagerageje guca hose mu byiciro bigize umupira w’u Rwanda, byamfashe ukwezi. Nyuma natangiye kureba mu kazi ibyari bihari, uko umupira wa hano ukora, uko abantu bakora kuko na byo byari ingenzi.

Mfite inararibonye kuko natoje ahantu hatandukanye ku Isi, buri gihugu, buri federasiyo iba itandukanye n’iyindi, abantu baba batandukanye, urumva ko byantwaye ukwezi.

Nyuma yaho natangiye gutegura umushinga uzakorwa mu myaka ibiri kongeraho indi ibiri, ikaba imyaka ine.

Umushinga wa mbere w’imyaka ibiri ibanza ufite inkingi enye zirimo kwita ku mupira w’amaguru rusange ni ukuvuga shampiyona z’abana, gushyiraho gahunda z’ibigo bizamura impano n’ibindi.

Hari kandi gukora amahugurwa atandukanye, gukurikirana ibijyanye n’amakipe y’Igihugu kubera ko ku rwego rw’abato ni ingenzi nk’uko bimeze mu bakuru no mu bagore aho tuzashyira imbaraga kuko hari nka gahunda igamije guteza imbere impano z’abakiri bato dufite ku Munsi Mpuzamahanga w’Abagore.

Ngera hano muri Nzeri, nasanze nta makipe y’Igihugu y’abato ahari, nta batoza bayo bahaba, shampiyona z’abari hagati y’imyaka 15 na 17 nta zari zihari yewe na U-20.

Nta mahugurwa [y’abatoza] yari ahari kuva hafi mu 2017, nafashe gahunda zabyo nzohereza muri CAF na FIFA. Nagaragaje ko hari impamyabushobozi zakorewe mu myaka 12 na 15 ishize, bambwira ko hakwiye gukorerwa izindi zigezweho.

Nyuma y’ukwezi kumwe natangiye gutegura amahugurwa ya CAF D, CAF C na CAF B. Hari kandi no gusubiramo ku bari barakoreye CAF D na C.

Nongereyemo kandi impamyabushobozi nshya ku batoza b’abanyezamu n’indi ku bongerera ingufu abakinnyi.

Ku rwego rwa shampiyona z’abato, kuri ubu zamaze gutangira, hari ubufatanye bwabayeho n’Ishyirahamwe ry’Imikino mu Mashuri (FRSS) kubera ko amakipe ntafite abo bakinnyi bato.

Amashuri asanzwe ahura hose mu Rwanda, mu turere aherereyemo, bimeze neza. Aho habamo abatarengeje imyaka 13, imyaka 15 na 17, birakorwa.

Muri Nzeri 2023, tuzongeramo Shampiyona y’abakuru batarengeje imyaka 20. Bizaba bimeze nko mu Bwongereza, izaba imeze nka Shampiyona y’Icyiciro cya Mbere.

Komisiyo ishinzwe Amarushanwa ni yo igomba kubikoraho, ni ukuvuga ngo nitugira Shampiyona y’Icyiciro cya Mbere, ikipe imwe igiye guhura n’iyindi saa Kumi, tuzagira n’umukino nk’uwo mu batarengeje imyaka 20.

Tugomba gushyira ku murongo ibijyanye n’amakipe y’Igihugu, za shampiyona, umupira w’abagore, byose tukabishyira ku murongo kuko tubaye tutabifite ntabwo twakwemererwa gukora amahugurwa y’ubutoza ya CAF na CAF B.

Umupira w’u Rwanda wawubonye ku ruhe rwego?

Ku bijyanye n’urwego, nabonye ibintu bibiri. Abatoza benshi b’amakipe y’Icyiciro cya Mbere n’icya Kabiri twarabonanye kugira ngo tuganire umupira n’ibindi, kugira ngo menye uko bimeze.

Nabonye ko bafite urwego rwiza, 90% bose bahagaze neza, icyo ni icya mbere. Urukundo n’ubwitange bw’umukino, burya iyo wumva kuri radio abantu bavuga ngo ese turagana he n’ibindi, ni uko baba bakunze umukino.

Shampiyona y’Icyiciro cya Mbere irakora neza, hari imikino myinshi. Ndatekereza uburyo ikinwamo bukwiye.

Intego yanjye ubu ni ukureba uburyo umupira w’amaguru rusange n’uw’abakuru ndetse n’amakipe y’Igihugu, mu myaka itanu, itandatu cyangwa 10, sinzi uko nabivuga, abakinnyi b’Abanyarwanda baba bakina muri Shampiyona zikomeye muri Afurika ya Ruguru, cyangwa n’i Burayi nubwo haba atari muri Shampiyona eshanu zikomeye, ariko wenda mu Bubiligi, mu Busuwisi n’ahandi. Bizaba ari byiza kuko bizaba bigaragaza ko Shampiyona yacu yazamuye urwego.

Nabonye Ikipe y’Igihugu, ifite abakinnyi beza, ariko 98% byabo bakina hano, ni byiza. Ubu niba ushaka kuzamura Sjhampiyona y’Icyiciro cya Mbere, iy’icya Kabiri n’Ikipe y’Igihugu, ni ngombwa kugira Ikipe y’Igihugu y’abakuru batarengeje imyaka 20, mu bakiri bato hari gahunda ihamye kuko mu myaka ine cyangwa itanu, abana bafite imyaka 14 cyangwa 15 baba bari ku rwego rwiza babaye barateguwe neza.

Ni he wabonye hari ibyuho muri Ruhago y’u Rwanda?

Nk’uko nabikubwiye, nabyizeho ukwezi kose, nasanze hari shampiyona ebyiri: iy’abatarengeje imyaka 15 na 17, Shampiyona y’Abatarengeje imyaka 13 ntayari ihari kimwe n’iy’abatarengeje imyaka 20.

Iy’abatarengeje imyaka 13 yari ihari ariko mu mashuri, iy’abatarengeje 15 na 17, ni byiza kuko bakinira mu bice bitandatu babarizwamo, ni ngombwa ko abana bose b’u Rwanda bakina.

Gusa ku rundi ruhande, nta Shampiyona y’Abatarengeje imyaka 20 yari ihari kandi ni ingenzi kuko ni yo ibimburira ko abakinnyi babigira umwuga. Abo baba bagomba gukina imyaka itatu kuva bavuye muri U-17.

Ni uvuga ngo mu gihe ufite Shampiyona ya U1-3, U-15 na U-17 ariko ntugira iya U-20 n’Ikipe y’Igihugu yayo, abakinnyi beza bari muri ibyo byiciro bamara imyaka itatu badakina kubera ko bakiri bato. Biba ari ikibazo.

Byaba byaramaze kwemezwa ko Shampiyona ya U-20 igomba gutangira, nta gisibya?

Umushinga urahari, ni komisiyo ishinzwe shampiyona ibifite mu nshingano. Amakipe yose yo mu Cyiciro cya Mbere asabwa kugira ikipe y’abatarengeje imyaka 20. Ni uko gahunda iteye.

Nyuma yaho ni bwo tuzareba niba bishoboka no ku makipe y’Icyiciro cya Kabiri kuko agorwa n’amikoro. Tuzareba niba yo ashobora gutangira muri Nzeri 2024.

Amakipe akunze kugira ibibazo by’amikoro ni yo mpamvu atagira amakipe y’abato arimo U-20 na U-17, ariko ubwo ibyo byiciro bindi biri mu mashuri, abana bose b’u Rwanda bakinnye aho binyuze mu bufatanye twagiranye byatanga umusaruro.

Si njye ubishyiraho, ndi Umuyobozi ushinzwe Tekinike ariko umuyobozi wanjye ni FERWAFA na komite yayo, hejuru hakaba FIFA na CAF.

Nagiranye inama n’abayobozi ba Minisiteri ya Siporo, bashaka guteza imbere siporo muri rusange, hari n’abayobozi ba FERWAFA, ndabizi ko bisaba ubushobozi [amikoro] ariko mu mashyirahamwe yose yo ku Isi baba bafite za shampiyona mu byiciro bitandukanye.

Amakipe y’Igihugu mu bakiri bato ntakunze guhabwa agaciro mu kwitabira amarushanwa mpuzamahanga, ibyo murabinyuranamo gute na FERWAFA?

Neretse Perezida wa FERWAFA na komite ye uburyo amakipe y’Igihugu agomba kuba akurikirana, hari abatoza ba U-20, aba U-17, aba U-15, ab’abagore bakuru n’abo muri icyo cyiciro batarengeje imyaka 20.

Ayo makipe yose ni FIFA na CAF bambwiye ko agomba kugira abatoza bayo. Nanjye nabishyizeho, nagaragaje uko byagenda n’amazina y’ababikora, ntegereje igisubizo.

Nashyizeho kandi gahunda y’umwiherero ku buryo buri kipe y’Igihugu ikora impuzandengo y’umwiherero kabiri cyangwa gatatu mu mwaka, iminsi umunani cyangwa irindwi, kongeraho kwitabira amarushanwa Nyafurika nka CECAFA no gushaka itike ya CAN [Igikombe cya Afurika].

Nateganyije ko U-20 yakora umwiherero muri Mata, mu cyumweru cya tariki ya 10-15, hari umwiherero w’Ikipe y’Abagore mu cyumweru cya mbere hagati ya tariki ya 3 n’iya 8 Mata kuko icyo gihe bazaba bitegura CECAFA ndetse n’Abatarengeje imyaka 17. Ibyo ni iby’uyu mwaka kugeza muri Kamena.

Muri Nzeri, nateganyije ko Abatarengeje imyaka 15, U-17, U-20, abakobwa bakuru n’abatarengeje imyaka 20, bose bagomba kugira umwiherero w’icyumweru iminsi ine cyangwa itanu.

Ni ngombwa ko hatangwa ubushobozi kuko njye si ndi umunyamafaranga ukomeye, nshinzwe tekinike. Ariko nzi ko Minisiteri na FERWAFA niba baranzanye nk’Umuyobozi wa Tekinike, ni uko bafite ubushobozi [amikoro].

Natoje muri Tunisia, nabaye Umuyobozi wa Tekinike muri Mauritanie, baba bafite amakipe mu byiciro byose haba muri shampiyona no mu ikipe y’igihugu. Abo buri mezi abiri, amakipe yabo akora umwiherero akanakina imikino ibiri.

Kugira ngo ibyo tubigereho birasaba ubushobozi, si njye ubigena, ariko ni uko bimeze. Kugira ngo ugire Ikipe y’Igihugu ikomeye bisaba gutegura mu byiciro bitandukanye kandi abato bagakina imikino myinshi kugira ngo bamenyere. Gukinira igihugu si ibintu byoroshye.

Mauritanie yari insina ngufi ku Rwanda mu myaka 15 ishize, birashoboka ko umupira wacu wazamuka nk’uko byagenze muri icyo gihugu?

Nzi neza ibyo nkora, natoje ahantu hatandukanye, natoje muri Tunisia, nari muri Mauritanie, hari amakipe yaho ya U-17 na U-20 yabonye itike y’imikino ya nyuma y’Igikombe cya Afurika agera muri ½, atsindwa n’arimo Mali na Sénégal.

No mu Rwanda birashoboka, hakenewe kugira ukwihangana, twateguye imishinga, buri kimwe kiri mu murongo. Shampiyona irahari, ubu ni ugukora, ni ugushyiramo amikoro.

Ibyo ntabwo mbizi cyane [ibijyanye n’amafaranga] ariko ni ngombwa ko FERWAFA na Minisiteri batanga ubushobozi bwo guhugura ibyiciro bitandukanye, bwo gukora umwiherero ku makipe y’Igihugu inshuro eshatu ku mwaka, simvuga ikipe ya Carlos [Amavubi makuru atozwa na Carlos Alós Ferrer], ndavuga abato barimo U-13, U-15, U-17 na U-20.

Nubikora gutya, uzaba ufite indi sura itandukanye mu myaka ibiri kuko abana bazaba bamaze kumenyera. Ntiwatsinda ikipe iyo ari yo yose kuri buri mukino, ariko mu myaka ibiri cyangwa itatu uba ugeze ku rwego rwiza.

Ugiye gukina n’indi kipe witoje iminsi ine, nta mahirwe uba ufite. Natuye muri Tunisia, narahatoje, ndabizi uko bategura. Biragoye ko wabatsinda utariteguye bihagije nubwo waba ufite abakinnyi beza. Nta gihugu kitagira abakinnyi beza, ikinyuranyo kiva mu mikorere.

Mu mpera z’umwaka ushize wa 2022 wasuye amarerero atandukanye ya ruhago mu Rwanda, abana bayabamo wababonye gute?

Ni byo, nasuye amarerero n’ibigo byigisha umupira bitandukanye mu bakiri bato haba abahungu n’abakobwa barimo abazahagararira u Rwanda mu marushanwa y’amashuri y’Abatarengeje imyaka 15.

Nabonye hari impano, igikenewe ni ugufasha abatoza babo umunsi umwe cyangwa ibiri kugira ngo bazamure urwego.

Ni ngombwa kubashyigikira mu bushobozi, mu bikoresho no kubahugura nubwo bifata igihe.

Njye nzi ibyo ngomba gukora ni yo mpamvu nasinye imyaka ibiri, iziyongeraho indi ibiri. Ibiri ya mbere ishize mbona nta buryo buzima buhari bwo kuzamura ibintu, njye ubwanjye nzagenda kuko sinzaba nkibashije kuzuza inshingano.

Ese abana b’Abanyarwanda bafite impano ya Ruhago cyangwa ni ukuyishakamo gusa?

Oya ntuvuge gutyo, umupira w’amaguru mu Rwanda umeze nk’uw’ahandi hose. Hari abantu bafite ubushobozi, ariko ubushobozi ni ukumenya ngo ni iki ngomba gukora kugira ngo umukinnyi agere ku rwego rwo hejuru. Ni icyo kiba itandukaniro.

Ndaguha urugero. Ninkuha ibuye, wowe urabona ari ibuye, ariko undi naribona, ashobora kuribyazamo ikindi cy’agaciro, ni uko bimeze.

Ku wa Gatandatu ushize nabonye umwana ukinisha imoso akina, ukabona ni umuhanga, ariko hari ibyo abura. Ni ngombwa kuzamura urwego muri tekinike no mu mbaraga ariko bihereye mu byiciro byo hasi. Ntiwazamura urwego rwawe urebeye kuri ‘playstation’.

Ukinira amakipe arimo Nantes wari rutahizamu, ariko mu Rwanda hari icyo kibazo ugereranyije n’indi myanya mu kibuga. Ubona habura iki?

Ikibazo ni uko guhera ku myaka 10, nta byinshi umukinnyi aba yarahuguweho, amarerero ntahe ibihagije umukinnyi.

Nta mishinga ihari, nta shampiyona, aho bisaba ko mu mupira w’amaguru rusange uhereye ku myaka 8 cyangwa 10, abana bahabwa byose kuko ni urugendo rumara imyaka ine cyangwa itanu.

Mu Rwanda hari ba myugariro beza, hari abakinnyi beza bo hagati bakina bugarira, ariko ab’imbere no mu mpande z’aho, nta batsinda ibitego.

Kugira umuntu utsinda ibitego biragoye kuko bisaba kumutegura haba mu gukinisha ukuguru runaka, ukuryo cyangwa imoso, kumwigisha gutsinda ku giti cy’izamu cya mbere cyangwa icya kabiri, uko yacika abandi bakinnyi n’ibindi.

Ikindi utamwigisha ni ugutsinda ibitego. Ushobora kuzamura urwego rwawe, ariko ntacyo wakora ku gutsinda ibitego. Ibyo ntabwo babyiga, bisaba ko uba warabihereye hasi cyangwa warabivukanye.

Nkiri muto natsindaga ibitego, ku myaka 6 natsindaga ibitego 20, ku myaka irindwi natsindaga ibitego 30, ku myaka 10 natsindaga ibitego 40. Ntawanyigishije, naratsindaga. Iyigishe, nyuma uzashaka uko uzamura tekinike zawe n’amayeri mu kibuga.

Umuntu utsinda ibitego 25 wamufasha kuzamura urwego ariko we aba asanzwe arufite ubwe.

Mu gice cya kabiri cy’uyu mushinga biri mu bintu tuzibandaho guhera mu 2024 aho tuzajya dufata nk’abakinnyi 40 beza mu byiciro bitandukanye birimo U-13, U-15 na U-17 tukagerageza kubazamurira urwego.

Ibyo bisaba igihe. Ese hari amikoro? Ese abantu bashobora kwihangana? Ese hari uguhozaho mu mikorere? Kuko iyo uhinduye umutoza, iyo uhinduye umuyobozi wa tekinike, iyo uhinduye perezida buri myaka ibiri, ntacyo wageraho muri ubwo buryo.

Urwego rw’abatoza rwo ntirwaba rugira uruhare mu gutuma u Rwanda rutagira abakinnyi beza?

Ikosa ni irya nde? Utarakoze amahugurwa mu myaka 10, watanga iki? Ni byo bibabaho. Kugeza ubu abatoza bari aho bonyine.

Ndaguha urugero, ubu mu Rwanda mufite abatoza 15 bafite CAF A, abatoza batandatu cyangwa barindwi bafite CAF B, hari abatoza 13 bashobora guhugura abandi…Muri Mauritanie abo nta bahari. Bafite abatoza babiri bafite CAF A n’ababahugura babiri barimo Umunya-Mauritanie na njye.

Mufite abatoza beza, mufite abafite CAF A, CAF B, gusa habayeho kurekera kurema abatoza kuva mu 2017 ariko ni byo tugiye gutangira gukora muri Kamena.

Gusa nabonye hari abazi agaciro k’akazi kabo, hari uwo nabonye yiyishyurira ajya kwiga muri Tanzania. Ni ngombwa kubafasha.

Ikibazo cy’ibibuga n’ibikorwaremezo cyo urakivugaho iki?

Ni ngombwa ko habaho ibibuga byinshi, stade, ibikorwaremezo n’ibikoresho ariko bizaza. Biri mu murongo, stade [Amahoro] iri kubakwa, nasabye icyumba kinini cyo gukoresherezamo amahugurwa, ariko bizaza.

Hariya hafi na hoteli hashobora kujya ikibuga n’icyumba cyo kwifashisha mu mahugurwa, i Nyamirambo hari ikibuga kigomba kuboneka mu mezi atatu, urumva ntibigoye. Bisaba igihe, ariko urabyumva, hari umupira w’amaguru ariko hari n’igihugu, hari umuco, hari siporo, hari igisirikare n’ubuzima busanzwe bw’abantu.

Kubaka ibibuga n’ibindi bintu bisaba amafaranga kandi hari imikino myinshi itandukanye irimo Basketball, Volleyball, Judo n’iyindi. Leta iba igomba gutwarira byose hamwe.

Nk’Umuyobozi wa Tekinike, ni ubuhe buryo bw’imikinire ushaka ko u Rwanda rwakwimakaza?

Ntiwavuga gutyo, uri umutoza w’ikipe runaka wakora iki? Ureba ubushobozi bw’abakinnyi ufite, ugakina ibijyanye n’uburyo bakina.

Buri mutoza agira uburyo yubaka umukino we, abatoza bagira uko bakina, ni ha handi usanga abantu bavuga ibyo bashaka, nko mu Bufararansa bati ‘Deschamps’,…Ariko yakinnye umukino wa nyuma w’Igikombe cy’Isi inshuro ebyiri, atsindamo umwe. Yatwaye UEFA Nations League, anakina umukino wa nyuma wa EURO.

Iyo ukina umupira w’ababigize umwuga, icya ngombwa ni ugutsinda. Buri mutoza hano ni we ugena ibyamufasha.

Mu mupira w’amaguru rusange, nifuza ko abana b’u Rwanda bazamuka bafite byose kugeza bageze ku rwego rwo hejuru, bashobora gukina ibyo umutoza wese yabasaba.

Guardiola yari afite uburyo bw’imikinire muri Barcelone, ariko yageze mu Bwongereza yongeramo abakinnyi bamufasha gukina umupira wihuta kandi mbere ntiyabikoraga.

Ni nko mu gihe kingana iki mwumva ko umupira w’u Rwanda waba ugeze ku rwego mwifuza?

Ntabwo nzi urwego ugomba kugeraho, mu myaka itatu cyangwa ine tuzaba tumaze kubona abakinnyi 15 cyangwa 20 beza bashobora gukina mu Cyiciro cya Mbere kuko ubu bafite mu myaka 17 bageze kure.

Nkeka ko nko mu myaka itatu, nihashyirwaho uburyo bw’imikorere, tuzabona abakinnyi nka 40 cyangwa 50 beza batarengeje imyaka 20, 2o muri bo bakaba bakina mu Cyiciro cya Mbere.

Hari Umutoza w’Ikipe y’Igihugu, Carlos Alós Ferrer, mukorana gute?

Carlos tubanye neza. Ntabwo dufite inshingano zimwe, Carlos afite Ikipe y’Igihugu Nkuru n’iya CHAN, we intego afite ni ugutsinda byihuse kuko ni wo mukino uhanzwe amaso.

Njye mfite guhera ku myaka ibiri kugera kuri ine. Ntabwo wanenga umusaruro wanjye mu myaka ibiri.

Hari igihe yaje kudufasha guhugura abatoza bo mu makipe y’Icyiciro cya Mbere, atanga isomo ku buryo bajya bakora isesengura ry’umukino.

Ni umutoza mwiza, ni ngombwa kumufasha no kumushyigikira.

Graphique: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .