Shampiyona ya Espagne yahagaritswe kubera Coronavirus, abakinnyi ba Real Madrid bashyirwa mu kato

Yanditswe na Eric Tony Ukurikiyimfura
Kuya 12 Werurwe 2020 saa 05:09
Yasuwe :
0 0

Shampiyona y’icyiciro cya mbere muri Espagne, La Liga, yabaye ihagaritswe mu byumweru bibiri biri, nyuma y’uko ikipe yose ya Real Madrid yashyizwe mu kato kubera icyorezo cya coronavirus.

Ibi byatewe n’uko umwe mu bakinnyi ba Real Madrid ikina Basketball, isangira ibibuga na Real Madrid y’umupira w’amaguru, agaragayeho icyorezo cya coronavirus.

Real Madrid ifite umukino wa UEFA Champions League izahuramo na Manchester City ku wa Kabiri w’icyumweru gitaha muri 1/8, ubu haribazwa niba uzaba mu gihe iminsi 14 ibarwa ngo umuntu abe yagaragaje ibimenyetso byose izaba itarashira.

Iyi kipe yo muri Espagne yabaye ifunze ibibuga byose bihereye mu gace ikoreramo imyitozo.

Itangazo ryashyizwe ahagaragara na Real Madrid rigira riti “Icyemezo cyafashwe ni ugushyira mu kato ikipe ya mbere ya Basketball n’iya mbere y’umupira w’amaguru, bitewe n’uko abakinnyi b’amakipe yombi basangira ibibuga muri Ciuadad Real Madrid.”

Uretse La Liga, icyiciro cya kabiri muri Espagne ‘Segunda division” nacyo cyahagaritswe, aho La Liga yavuze ko izongera gukora igenzura nyuma y’aka kato ku makipe yagizweho ingaruka ndetse n’ahandi bishobora kugaragara.

Real Madrid ya kabiri muri La Liga, yagombaga kwakira Eibar mu mukino wa Shampiyona ku wa Gatanu, yamaze gukuraho ibiganiro byose yari kugirana n’abanyamakuru.

Icyorezo cy’indwara ya coronavirus gikomeje kuvugwa hose, cyagize ingaruka zikomeye ku bikorwa bya siporo bikomeje guhagarikwa mu bice byose by’Isi.

Mu Butaliyani, ibikorwa byose bya siporo birimo Shampiyona ya Serie A, byabaye bihagaritswe kugeza tariki ya 3 Mata 2020. Nyuma y’uko myugariro wa Juventus n’u Butaliyani, Daniele Rugani bigaragajwe ko arwaye coronavirus, Ibiro ntaramakuru by’Abongereza (Reuters) byatangaje ko ikipe yose ya Juventus izamara ibyumweru bibiri iri mu kato.

Imikino ibiri ya Europa League yagombaga kuba kuri uyu wa Kane, yasubitswe mu gihe indi iza kubera mu muhezo.

Shampiyona ya Basketball muri Amerika, NBA, nayo yabaye ihagaritswe mu gihe ikipe ya McLaren yikuye mu isiganwa ry’imodoka rya Australian Grand Prix ryagombaga kuba mu mpera z’icyumweru, bitewe n’uko umwe mu bayigize yanduye coronavirus.

Shampiyona ya Espagne, La Liga, yahagaritswe kubera coronavirus
Ikipe yose ya Real Madrid yashyizwe mu kato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .