’La Liga’ igiye gutangiza ishuri ry’umupira w’amaguru muri Afurika y’Iburasirazuba

Yanditswe na Muvunyi Arsène
Kuya 6 Ukuboza 2018 saa 11:15
Yasuwe :
0 0

Shampiyona y’icyiciro cya mbere mu mupira w’amaguru muri Espagne izwi nka La Liga, ifite umugambi wo gutangiza ishuri ryigisha umupira muri Afurika y’Iburasirazuba, rishobora kuzubakwa muri Kenya.

Ibi byatangarijwe mu kiganiro n’itangazamakuru kuri uyu wa Gatatu i Nairobi, na Oliver Dodd uhagarariye La Liga muri Afurika y’Iburasirazuba.

Yagize ati “Abashinzwe kudushakira abakinnyi bari inaha kandi batubwiye ko babonye impano zitangaje. Turashaka gushyiraho gahunda igamije kuzikuza.”

Dodd yongeyeho ko barimo gukorana n’Ikigo cy’Itumanaho cya Safaricom mu gufasha abanyempano mu mupira w’amaguru, bagaragajwe n’irushanwa ngarukamwaka ry’abatarengeje imyaka 20 rya Chapa Dimba na Safaricom.

Yagize ati “Tuzatoranya abahungu 16 n’abakobwa 16 bavuye mu irushanwa ry’uyu mwaka, aho bazajya muri Espagne hafi na Barcelona mu mwiherero, aho bazaba bari kumwe n’abatoza bacu beza. Bazanakina n’andi makipe yo mu gihugu.”

Igihagange Lionel Messi umaze gutwara Ballon D’or 5, Francesc Fabregas, Sergio Ramos, Sergio Busquets, Fernando Torres na Andreas Iniesta ni bamwe mu banyempano bubakiye izina muri Espagne.

La Liga imaze iminsi yiyegereza igihugu cya Kenya, igamije guteza imbere umupira w’amaguru no gukundisha abanya-Kenya iyi shampiyona.

Ubwo Oliver Dodd uhagarariye La Liga muri Afurika y'Iburasirazuba yagaragazaga imigambi yayo kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza