Shampiyona y’u Buholandi ishobora guseswa kubera amabwiriza mashya ya Guverinoma

Yanditswe na Eric Tony Ukurikiyimfura
Kuya 22 Mata 2020 saa 03:17
Yasuwe :
0 0

Ishyirahamwe ry’Umupira w’Amaguru mu Buholandi, KNVB, ryatangaje ko Shampiyona y’Icyiciro cya mbere muri icyo gihugu ‘Eredivisie’ ishobora kudakomeza nyuma y’amabwiriza mashya yafashwe na guverinoma, avuga ko ibikorwa bihuza abantu benshi birimo imikino bihagaritswe kugeza tariki ya 1 Nzeri kubera Coronavirus.

Ubwo Eredivisie yahagararaga mu kwezi gushize, Ajax na AZ Alkmaar zanganyaga amanota 56 mu mikino 26 yari imaze gukinwa, Ajax izigamye ibitego byinshi.

Kuwa Kabiri tariki ya 21 Mata, Ishyirahamwe ry’Umupira w’Amaguru mu Buholandi, KNVB, ryasohoye itangazo rivuga ko bisa n’aho bigoranye gukomeza gukina uyu mwaka w’imikino, ariko ko rizagisha inama UEFA mbere yo gufata icyemezo cya nyuma.

Ryagize riti “Dushingiye ku cyemezo cya guverinoma, KNVB izagisha inama UEFA, nyuma hafatwe icyemezo. KNVB ntabwo irasesa amarushanwa yayo kubera ibibazo by’ihungabana ry’ubukungu mu mupira w’amaguru byatewe na Coronavirus.”

Abayobozi b’iri Shyirahamwe, bazahura kuwa Gatanu tariki ya 24 Mata kugira ngo baganire ku ngaruka zishobora gutezwa n’icyo cyemezo mu gihe ibibuga bizafungurwa hakurikijwe amategeko kugira ngo abakinnyi bongere bitoze.

Kuwa Kabiri, Minisitiri w’Intebe w’u Buholandi, Mark Rutte yavuze ko ibikorwa birimo amashuri abanza n’ay’incuke, bizafungura vuba guhera tariki ya 11 Gicurasi mu gihe ayisumbuye na za kaminuza, zizafungura guhera tariki ya 2 Kamena, hakubahirizwa intera ya metero 1.5.

Mark Rutte yavuze ko kandi ibikorwa bihuza abantu benshi birimo umupira w’amaguru, bihagaritswe kugeza tariki ya 1 Nzeri 2020.

Shampiyona y'u Buholandi 'Eredivisie' ishobora guseswa kubera amabwiriza mashya yatanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .