Shampiyona y’Icyiciro cya Mbere mu Rwanda igiye kugaruka nyuma y’iminsi 266

Yanditswe na Eric Tony Ukurikiyimfura
Kuya 13 Ukwakira 2020 saa 09:07
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA) ryemeje ko Shampiyona y’Icyiciro cya Mbere izatangira tariki ya 4 Ukuboza 2020.

Kuri uyu wa Kabiri nibwo FERWAFA yashyize ahagaragara ingengabihe nshya y’amarushanwa yayo mu mwaka w’imikino wa 2020/21.

FERWAFA yatangaje ko Shampiyona y’Icyiciro cya Mbere izagaruka tariki ya 4 Ukuboza, ni ukuvuga nyuma y’iminsi 266 (amezi umunani n’iminsi 21) uhereye tariki ya 14 Werurwe ubwo imikino yasubikwaga kubera icyorezo cya Coronavirus.

Iyi Shampiyona yegukanywe na APR FC mu mwaka w’imikino ushize, imikino yayo ibanza irangira tariki ya 12 Werurwe hamaze gukinwa imikino 23 mu gihe yagombaga gushyirwaho akadomo nyuma y’imikino 30 ku wa 10 Nyakanga 2020.

Shampiyona y’Icyiciro cya Kabiri niyo izasubukurwa mbere, aho amakipe umunani ahataniye kuvamo abiri azazamuka mu cya Mbere, azakina hagati ya tariki ya 13 n’iya 21 Ugushyingo.

Muri iki Cyiciro cya Kabiri, umwaka mushya w’imikino wa 2020/21, uzatangira tariki ya 19 Ukuboza 2020, uzasozwe tariki ya 12 Kamena 2021.

Gusa ntihigeze hagaragazwa igihe Shampiyona z’Abagore zizongera gusubukurirwa.

FERWAFA yagaragaje ko Igikombe cy’Intwari gihuza amakipe ane ya mbere, kizaba hagati ya tariki ya 25 Mutarama n’iya 1 Gashyantare 2021.

Igikombe cy’Amahoro kizatangira tariki ya 2 Werurwe naho umukino wa nyuma wacyo ube tariki ya 4 Nyakanga 2021.

Kugeza ubu amakipe y’umupira w’amaguru mu Cyiciro cya Mbere n’icya Kabiri mu bagabo, akomeje kwipimisha COVID-19 kugira ngo atangire kwitegura umwaka mushya w’imikino.

APR FC, AS Kigali, Sunrise FC, Espoir FC n’Amagaju niyo makipe yamaze gupimisha abakozi bayo mu gihe andi nka Gasogi United, Rayon Sports, Police FC na Kiyovu Sports byitezwe ko abikora muri iki cyumweru.

Shampiyona y’Icyiciro cya Mbere mu Rwanda igiye kugaruka nyuma y’iminsi 266

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .