00:00:00 IGIHE NETWORK KN KINYARWANDA EN ENGLISH FR FRANCAIS

Seninga amaze amezi umunani adasoma ‘agatama’ yemeza ko kari kamugeze habi

Yanditswe na Byiringiro Osée Elvis
Kuya 7 Mutarama 2023 saa 08:02
Yasuwe :

Umutoza wa Sunrise FC, Seninga Innocent, yatangaje ko umusaruro mwiza afite muri iyi minsi mu ikipe ye, awukesha icyemezo yafashe cyo kuva ku nzoga avuga ko zamwiciraga akazi.

Uyu mutoza umaze iminsi yumvikana mu itangazamakuru ahamya ko icyemezo cyo kuva ku nzoga yafashe mu mezi umunani ashize, kiri mu bituma ari kwitwara muri Sunrise FC.

Ibi aherutse kubitangariza kuri B&B Fm ndetse yongeye kubishimangira kuri uyu wa Gatandatu, tariki 7 Mutarama 2023, kuri Televiziyo Rwanda mu kiganiro ‘RTV Kick-Off’.

Seninga wavugwagaho kuba kazizi, yahamije ko amaze amezi umunani aretse inzoga.

Yagize ati “Nyuma y’inzira nise iy’umusaraba naciyemo i Musanze, nafashe umwanya nitekerezaho maze mfata icyemezo cyo kureka manyinya, ubu maze amezi umunani ntanywa inzoga. Ngira ngo ni wo musaruro mwiza mubona mfite kuko ubu nitaye ku kazi ndetse n’umuryango wanjye.”

Yakomeje avuga ko umusaruro w’icyemezo yafashe ari kuwubona.

Ati “Baca umugani ngo aho kwica gitera uzice ikibimutera, rero nyuma yo kwitekerezaho nafashe icyo cyemezo kandi mbona umusaruro ari mwiza ndetse ndi mu murongo mwiza. Mfite n’icyizere ko ahazaza hanjye hazaba heza no kurusha mbere.”

Uyu mutoza umaze gutoza amakipe menshi mu Rwanda, benshi mu bakunzi b’umupira w’amaguru mu Rwanda ntibashidikanya ku bushobozi bwe ahubwo bagaruka ku myitwarire ye ahanini yo hanze y’ikibuga yiganjemo ubusinzi bwabaga intandaro yo gutandukana nayo.

Uyu mutoza ari mu bagarutsweho cyane mu bihe bya Guma mu rugo kuko yafashwe inshuro zirenze imwe na Polisi yo mu Karere ka Musanze yarenze ku mabwiriza yo kwirinda Covid-19, yagiye kunywa ka manyinya.

Uyu mugabo udahwema kugaruka ku bihe bibi yagize mu Ikipe ya Musanze FC, yewe yise inzira y’umusaraba, avuga ko ubugambanyi ariyo ntandaro y’umusaruro mubi yagize yatumye yirukanirwa ku kibuga.

Icyo gihe akimara kwirukanwa, uyu mutoza yanditse kuri Twutter asobanura ko umukino batsinzwemo na Gasogi United ndetse n’indi yawubanjirije, habayemo ubugambanyi na ruswa yahawe abakinnyi ba Musanze FC.

Icyo yagize ati “Perezida wa Musanze FC, nyuma yo gusoma Twitter y’ikipe yanyu yemeza isezererwa ryanjye ku mirimo nari nshinzwe, ntabwo mbasaba kungarura mu kazi, ariko mu rwego rwo kwirinda gusebya umukozi mu kazi, ndasaba ko mwabanza gukurikirana Team Manager wahishiriye abakinnyi yasanze banywa inzoga ntabibwire ababishinzwe bikatuviramo umusaruro mubi."

Yakomeje agira ati "Ndetse na perezida w’abafana watanze ruswa kuri bamwe mu bakinnyi mbere y’umukino kugira ngo bitsindishe hirukanwe umutoza. Murakoze.”

Seninga yageze muri Sunrise FC mu mwaka ushize w’imikino iri mu Cyiciro cya Kabiri, ayizamura mu cya Mbere idatsinzwe umukino n’umwe.

Kugeza ubu mu gice cya mbere cya Shampiyona, Sunrise FC iri ku mwanya wa munani n’amanota 22.

Uyu mutoza kandi yatoje amakipe arimo Isonga, Etincelles FC, Police FC na Musanze FC. Yanabaye Umutoza wungirije mu Ikipe y’Igihugu "Amavubi".

Seninga Innocent yavuze ko amaze amezi umunani adasoma ku nzoga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .