Scandinavia yigaranzuye AS Kigali WFC iyinyagirira i Nyamirambo (Amafoto)

Yanditswe na Eric Tony Ukurikiyimfura
Kuya 22 Mata 2019 saa 09:58
Yasuwe :
0 0

Mu mukino w’umunsi wa cyenda wa shampiyona y’icyiciro cya mbere mu bagore wari utegerejwe na benshi, Scandinavia WFC yasanze AS Kigali WFC kuri Stade ya Kigali i Nyamirambo, iyinyagira ibitego 3-0, iyobora shampiyona n’amanota 24.

Uyu mukino wahuje amakipe abiri akomeye muri iyi shampiyona, wagombaga kuba ku wa Gatandatu w’icyumweru gishize, ariko nyuma yo guhurirana n’uwa Rayon Sports na APR FC, Komisiyo ishinzwe amarushanwa mu Ishyirahamwe ry’Umupira w’Amaguru mu Rwanda, FERWAFA, iwushyira kuri uyu wa Mbere.

Imvura nyinshi yaguye mu bice bitandukanye by’igihugu, yatumye utangira ukereweho iminota 42 (15:42). Scandinavia iri gukina icyira cya mbere ku nshuro ya kabiri, yashakaga kwihorera kuri AS Kigali yayitsinze ku mukino usoza shampiyona ishize, ikayitwariraho igikombe cya 10 cya shampiyona yikuriranya.

Iyi kipe y’i Rubavu, yakinnye umukino mwiza wiganjemo guhanahana no gusatira cyane, aho yabonye uburyo bwa Uwimana Zawadi mu minota ya mbere, ariko umupira watewe n’uyu mwari ujya hanze mu gihe Umwaliwase Dudja na we yabonye uburyo bwiza ku ruhande rwa AS Kigali, agaruye umupira mu rubuga rw’amahina ufatwa n’umunyezamu wa Scandinvia WFC mbere y’uko Irakunda Callixte agerageza ishoti rya kure rikajya hanze.

Nyuma y’iminota 22 umukino utangiye, umutoza wa AS Kigali, Mbarushimana Shaban, yakoze impinduka ya mbere nyuma yo kubona ko ikipe ye iri kurushwa mu kibuga hagati, Nyiramwiza Marthe asimburwa na Kalimba Alice. Scandinavia WFC yafunguye amazamu ku munota wa 31, ku mupira wahinduwe na Uwimana Zawadi usanga Ukwinkunda Jeannette ahagaze neza, ahita awohereza mu rushundura.

Mu minota ya nyuma y’igice cya mbere, AS Kigali yashoboraga kwishyura iki gitego ku mupira wahinduwe na kapiteni wayo Ibangarye Anne-Marie, ariko bagenzi be, Umwaliwase Dudja na Iradukunda Callixte bananirwa gukora kuri uyu mupira waciye mu maguru y’abakinnyi bose ukarenga.

Ku ikosa ry’umunyezamu Uwizeyimana Hélène wafatiye umupira hanze y’urubuga rwe, Scandinavia WFC yabonye igitego cya kabiri ku munota wa 60, gitsinzwe na Mukandayisenga Nadine wateye uyu mupira w’umuterekano ukajya mu izamu nta wundi muntu uwukozeho.

AS Kigali yakomeje gushaka uburyo ibona igitego, Iradukunda Callixte ahusha uburyo bw’umupira yateye n’umutwe ashaka kuroba umunyezamu Itangishaka Claudine, umupira uramutenguha ujya hanze. Iyi kipe y’abanyamujyi yahise ikora impinduka ya kabiri, Ibangarye asimburwa na Imanizabayo Florence.

Habura iminota 23 ngo umukino urangire, Maniraguha Marie Louise wa AS Kigali WFC yakiniye nabi Ukwinkunda Jeannette wari umucitse, umusifuzi atanga coup-franc yatewe na Mukandayisenga Nadine, na none umupira uruhukira mu rushundura nta wundi muntu uwukozeho, abanya-Rubavu bishimira igitego cya gatatu.

Kalimba Alice wahushije uburyo bwabonetse ku ruhande rw’ikipe ye mu rubuga rw’amahina, yahawe ikarita y’umuhondo akiniye nabi mugenzi we wa Scandinavia WFC mbere y’uko na Imanizabayo Florence ananirwa gutsinda igitego cyari kuba impozamarira ku munota wa 80, ubwo yateraga ishoti rikomeye umupira ugashyirwa muri koruneri n’umunyezamu Itangishaka Claudine.

Muri iyi minota ya nyuma, umutoza wa Scandinavia, Bizumuremyi Radjabu yakoze impinduka ebyiri, Uwamariya Diane asimburwa na Kankindi Fatuma mu gihe Nyirahafashimana Marie Jeanne yasimbuwe na Abimana Djamila. Uwimana Zawadi yabonye uburyo bwashoboraga guhesha Scandinavia igitego cya kane ku munota wa 89, umupira awutera hanze.

Umukino warangiye Scandinavia itsinze ibitego 3-0, iyobora shampiyona y’icyiciro cya mbere mu bagore n’amanota 24 mu gihe AS Kigali yo yagumye ku mwanya wa kabiri, amakipe yombi afite umukino w’ikirarane wagombaga gukinwa mu kwezi gushize ukaza gusubikwa bitewe n’uko Ikipe y’igihugu ‘She-Amavubi’ yari ifitanye umukino na Repubulika Iharanira Demokarasi ya Congo.

Umutoza wa AS Kigali, Mbarushimana Shaban yavuze ko mu byatumye batsindwa harimo ibiyemezo by’abasifuzi atemeranya na byo, aho ku gitego cya kabiri, asanga Scandinavia itagombaga guhabwa coup-franc.

Ati” Umusifuzi ni we ufata icyemezo cya nyuma njye niko nabibonaga [ko ritari ikosa], ntacyo narenzaho. Ndacyafite icyizere ko gutwara igikombe bishoboka. “

Bizumuremyi Radjabu yavuze ko byari bigoye ko Scandinavia WFC yatwara igikombe aribwo ikiva mu cyiciro cya kabiri, yemeza ko muri uyu mwaka bishoboka kuko abakinnyi bamaze gutinyuka.

AS Kigali WFC: Uwizeyimana Hélène, Mukantaganira Joselyne, Uwamahoro Marie Claire, Umwizerwa Angelique, Maniraguha Marie Louise, Nibagwire Sifa Gloria, Nibagwire Liberée, Nyiramwiza Marthe, Iradukunda Callixte, Umwaliwase Dudja na Ibangarye Anne Marie.

Scandinavia WFC: Itangishaka Claudine, Nyirabahimana A.Marie, Umuziranenge Irera, Muhawenimana Constance, Uwineza Jazira, Mukandayisenga Nadine, Uwimana Zawadi, Uwihirwe Kevine, Nyirahafashimana M. Jeanne, Uwamariya Diane na Ukwinkunda Jeannette.

Uko amakipe yatsindanye ku munsi wa 9 (usoza imikino ibanza)

Kuwa Gatandatu tariki ya 21 Mata

Kamonyi WFC 6-0 Gakenke WFC
Rugende WFC 0-4 ES Mutunda WFC
Inyemera WFC 1-1 AS Kabuye WFC
Rambura WFC 1-1 Bugesera WFC

Kuwa Mbere tariki ya 22 Mata

AS Kigali WFC 0-3 Scandinavia WFC

Abakinnyi bamaze gutsinda ibitego byinshi

1. Ibangarye Anne Marie (AS Kigali WFC) –12
2. Iradukunda Callixte (AS Kigali WFC) -11
3. Uwimana Zawadi (Scandinavia WFC) – 6
4. Mukandayisenga Nadine (Scandinavia WFC) – 5
5. Dukuzumuremyi Marie Claire (ES Mutunda WFC) – 4
6. Nibagwire Libelle (AS Kigali WFC) – 4
7. Nyirahafashimana Marie Jeanne (Scandinavia WFC) - 4

Abakinnyi ba Scandinavia WFC bahise bajya kwishimira igitego imbere y'abafana baje babaherekeje
Abakinnyi ba Scandinavia WFC bishimiye igitego bagenda nk'abakecuru
Abatoza ba Scandinavia WFC bashimira abakinnyi
AS Kigali WFC ntibumvaga ibiri kubabaho
Byari ibyishimo ku bafana baturutse i Rubavu
Byari ibyishimo ku munyezamu wa Scandinavia WFC
Ibikoresho birimo ingoma za kizungu bari babikozeho
Igitego cya kabiri cya Scandinavia WFC cyabonetse kuri coup-franc
Iradukunda Callixte nyuma yo guhusha uburyo bwari guhesha AS Kigali igitego
Iradukunda Callixte yagowe n'ubwugarizi bwa Scandinavia WFC
Kalimba Alice na Nibagwire Sifa Gloria bombi babonye amakarita y'umuhondo muri uyu mukino
Kapiteni wa Scandinavia WFC Uwineza Jazira
Lomami Marcel utoza Gasogi United yaje kureba uyu mukino
Mukandayisenga Nadine watsinze ibitego bibri ku mipira y'imiterekano
Na wo waruhukiye mu izamu
Scandinavia bishimira igitego cya gatatu
Scandinavia WFC ishyigikirwa n'abaturutse mu mahanga
Ubwo umukino wari urangiye
Ubwugarizi bwa Scandinavia WFC bwari buhagaze neza
Ukwinkunda Jeannette atsinda igitego cya mbere
Umunyezamu wa Scandinavia Itangishaka Claudine yabereye ibamba AS Kigali WFC
Umunyezamu wa Scandinavia WFC yagize ikibazo mu mukino hagati yitabwaho n'umuganga
Umupira waruhukiye mu rushundura
Umusifuzi Mukansanga Salma yaje kureba uyu mukino
Umutoza wa AS Kigali WFC Mbarushimana Shaban ntiyishimiye imisifurire kuri uyu mukino
Umutoza w'ikipe y'igihugu y'abagore 'She' Amavubi , Habimana Sosthene yaje kureba uyu mukino
Uwizeyimana Hélène ntiyabashije kugarura umupira watewe na Jeannette
Uwizeyimana Hélène ntiyashoboye kandi kugarura umupira w'igitego cya gatatu
Uyu ati 'bibaye bibiri ejo utazabihakana' gusa hagiyemo n'icya gatatu

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza