00:00:00 IGIHE NETWORK KN KINYARWANDA EN ENGLISH FR FRANCAIS

Umupfumu yashinze Ikipe y’Umupira w’Amaguru i Bugesera

Yanditswe na Habimana Sadi
Kuya 14 Kamena 2021 saa 02:08
Yasuwe :
0 0

Rurangirwa Wilson uzwi nka Salongo, ukunze guhamya ko ari umupfumu wa karahabutaka, yashinze Ikipe y’Umupira w’Amaguru ateganya kwandikisha mu Cyiciro cya Kabiri mu Rwanda.

Ku Cyumweru tariki ya 13 Kamena nibwo hamenyekanye amakuru ko Salongo agiye kuzana ikipe mu cyiciro cya kabiri. Ni ikipe isanzwe ihari ariko ikinamo abakiri bato.

Izaba yitwa Muyange FC isanzwe ibarizwa mu Murenge wa Nyamata.

Ku ikubitiro, Muyange FC yabanje kwegukana igikombe cy’irushanwa ryahuzaga amakipe yo muri uyu Mudugudu wa Muyange.

Mu kiganiro cyihariye IGIHE yagiranye na Salongo, yavuze ko yiteguye kuzana ikipe ye mu cyiciro cya kabiri kandi yiganjemo abakiri bato banafite uburere.

Ati “ Ikipe yitwa Muyange FC ikinamo abana bakiri bato. Tumaze ibyumweru bitatu twitoza ndetse hari n’irushanwa twakinnye ry’amakipe arindwi yo mu Murenge wa Nyamata, twegukana igikombe.”

Uyu mugabo yakomeje avuga ko ikiranga iyi kipe agiye kuzana mu cyiciro cya kabiri, ari ikinyabupfura abakinnyi bafite ndetse no kurwanya ibiyobyabwenge bigiye kumara urubyiruko rwacu.

Ati “Mfite abana bazi ubwenge batanywa ibiyobyabwenge. Ni abana bafite ikinyabupfura kuko nicyo cya mbere tubigisha. Ferwafa ikwiye kutwegera kugira ngo idushyigikire kuko turimo kubaka umupira w’amaguru mu Rwanda.”

Abajijwe aho gusaba kuba Umunyamuryango wa Ferwafa bigeze, Salongo yasubije ko hari ibyihutirwaga byabanje ariko nabyo biri mu nzira mu minsi iri imbere.

Ati “Twabanje kubanza kumenya ko twabona abakinnyi. None ubu twamaze kubabona, igikurikiyeho ni ugushaka ibyangombwa byose bisabwa tukabijyana muri Ferwafa dusaba kuba umunyamuryango w’iri shyirahamwe.”

Peter Otema wakiniye Rayon Sports FC, Police FC, Musanze FC n’izindi, niwe mutoza mukuru w’iyi Muyange FC, akaba ayimazemo amezi agera ku umunani.

Rurangirwa Wilson uzwi nka Salongo, yakunze kumvikana avuga ko afasha abakinnyi batandukanye hano mu Rwanda akaba imiti ituma batsinda ibitego, abandi bakabona amakipe meza ndetse yongeye gushimangira ko n’ubu hari abo bafitanye amasezerano yo kubafasha kuguma mu bihe byabo byiza.

Salongo arajwe inshinga no gufasha urubyiruko rw'i Muyange kurwanya ibiyobyabwenge no kurangwa n'ikinyabupfura
Peter Otema (uri ibumoso) niwe mutoza mukuru wa Muyange FC yashinzwe na Salongo bahagararanye
Peter Otema (wambaye ikoti ritukura) ari gufasha urubyiruko rwa Muyange kuzamura impano zabo
Amakipe yo mu Mudugudu wa Muyange yari yitariye irushanwa rigufi ryatewe inkunga na Salongo
Ikipe ya Salongo yabanje kwegukana irushanwa ryari ryahuje amakipe arindwi yo mu Mudugudu wa Muyange
Abasore ba Muyange bafite impano zo kubyazwa umusaruro
Salongo avuga ko yifuza gufasha urubyiruko rwo mu Mudugudu wa Muyange kuzamura impano zabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .