Rwatubyaye yatowe nk’umukinnyi w’umwaka n’abafana ba Switchbacks FC

Yanditswe na Eric Tony Ukurikiyimfura
Kuya 6 Ugushyingo 2019 saa 09:13
Yasuwe :
0 0

Myugariro w’Umunyarwanda Rwatubyaye Abdul, yatowe nk’umukinnyi mwiza w’umwaka wa 2019 n’abafana b’ikipe ya Colorado Springs Switchbacks FC ibarizwa mu cyiciro cya kabiri muri Leta zunze ubumwe za Amerika.

Ibinyujije ku mbuga nkoranyambaga zayo, Colorado Springs Switchbacks FC yatangaje ko Rwatubyaye yahigitse abandi bakinnyi 21 bakinira iyi kipe mu matora y’abafana yari agamije guhitamo umukinnyi mwiza w’umwaka wa 2019.

Rwatubyaye yakurikiwe na Jordan Schweitzer ukina mu kibuga hagati mu gihe ku mwanya wa gatatu haje Jordan Burt, na we ukina mu bwugarizi.

Aya matora y’umukinnyi mwiza w’umwaka muri iyi kipe, yakorewe ku rubuga rwayo rwa interineti guhera tariki ya 21 z’ukwezi gushize.

Tariki ya 8 Gicurasi 2019, ni bwo Rwatubyaye wakiniraga Sporting Kansas City, yaguranwe Benny Feilhaber wakiniraga Colorado Rapids mu kibuga hagati, ariko ntiyamwifashisha mu cyiciro cya mbere ahubwo imutiza mu ikipe bakorana yo mu cyiciro cya kabiri ya Colorado Springs Switchbacks FC nyuma y’iminsi 10 gusa.

Switchbacks FC yasoje Shampiyona ya USL Championship y’uyu mwaka, iri ku mwanya wa nyuma, wa 18, n’amanota 27 mu mikino 34.

Mu mimikino 17 Rwatubyaye yayikiniye mu gihe cy’amezi ane, yayitsindiye ibitego bibiri anatanga umupira umwe wavuyemo igitego kuri mugenzi we.

Kwitwara neza byatumye ikipe ya Colorado Rapids yiyemeza kongera kumugarura ndetse ahabwa amasezerano mashya y’umwaka umwe, aho ari mu bakinnyi izakoresha muri Shampiyona y’icyiciro cya mbere ya Major League Soccer mu mwaka utaha w’imikino.

Rwatubyaye Abdul w’imyaka 23, yagiye muri Amerika mu mpera za Mutarama uyu mwaka, avuye muri Rayon Sports, aho yatanzweho ibihumbi $50 na Sporting Kansas City.

Rwatubyaye yatowe nk'umukinnyi w'umwaka wa 2019 n'abafana ba Colorado Springs Switchbacks FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza