Ni itangazo ryashyizwe hanze mu ijoro ryo ku Cyumweru, tariki ya 29 Nzeri 2024 nyuma y’uko abasifuzi bari bahagaritse umukino warimo uhuza aya makipe kubera imvura nyinshi yaguye kuri Kigali Pelé Stadium igatuma umukino usubikwa.

Amategeko ya Rwanda Premier League avuga ko mu gihe umukino wahagaritswe n’ibihe by’umwihariko birimo imvura nyinshi, hakurikizwa ingingo ya 38 y’amategeko agenga amarushanwa ya FERWAFA.

Iyi ngingo ivuga ko umukino usubirwamo mbere y’amasaha 24 kandi hagakinwa iminota yari isigaye. Vision na Police FC byari bisigaje iminota 45 y’igice cya kabiri kuko imvura yaguye cyane mu karuhuko k’icya mbere.

Uyu mukino kandi uzakomeza gusifurwa n’abasifuzi bari bawuriho, abakinnyi bari mu kibuga abe aribo bagumamo, nta n’imwe yemerewe kugira undi yongeramo utari uri ku rupapuro rw’umukino.

Police FC iyoboye Shampiyona by’agateganyo kugeza ubu, yanganyaga 0-0 na Vision FC iri ku mwanya wa nyuma n’inota rimwe.

Vision FC na Police FC zahagaritse umukino zirakina iminota 45 yari isigaye

Umukino wahagaze kubera imvura nyinshi yatumye umupira udatembera neza mu kibuga

Amategeko yakurikijwe ku mukino wa mbere ni yo azagumaho