00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana City irwana no kutamanuka yasinyishije abakinnyi 5 bashya b’abanyamahanga

Yanditswe na Hakizimana Jean Paul
Kuya 19 Mutarama 2023 saa 08:27
Yasuwe :

Ikipe ya Rwamagana City yamaze gusinyisha abakinnyi batanu bashya b’abanyamahanga biganjemo abataha izamu, mu rwego rwo kongera imbaraga zayigumisha mu Cyiciro cya Mbere.

Aba bakinnyi bashyize umukono ku masezerano mu ntangiriro z’iki cyumweru bakaba biganjemo abataha izamu ngo kuko ariho ikipe yari ifite ikibazo.

Perezida wa Rwamagana City, Uwimana Néhémie, yabwiye IGIHE ko bongeyemo abakinnyi batanu kuko ari yo myanya bari barasize kugira ngo bizabafashe kongeramo imbaraga mu mikino yo kwishyura.

Yagize ati “Twasinyishije abakinnyi batanu, gusa amazina sinahita nyibuka neza ariko harimo Umurundi witwa Nduwimana Roméo utaha izamu, Abanye-Congo babiri, umwe ni rutahizamu undi ni umunyezamu, harimo umugabo utahizamu wo muri Sudani y’Epfo ndetse n’Umugande ukina hagati mu kibuga.”

Yakomeje avuga ko bamaze igihe kinini bafite ikibazo cy’abakinnyi babatsindira ibitego akaba ari yo mpamvu bashyize imbaraga mu gushaka abeza mu basatira izamu.

Indi mpamvu Rwamagana City yahisemo gusinyisha umunyezamu ngo ni ukugira ngo yongere imbaraga mu burinzi bwayo no kuzamurira urwego abo bari basanganywe.

Perezida Uwimana yanavuze ku nama bagiranye na Guverineri w’Intara y’Iburasirazuba, Gasana Emmanuel, bari kumwe n’ubuyobozi bw’Akarere, mu ntangiriro z’iki cyumweru, aho ngo bareberaga hamwe ibibazo bihari n’ibyafasha ikipe kwitwara neza.

Ati “Guverineri yatubazaga uko twiteguye kuko na we nk’umusportif ndetse n’umuyobozi ntabwo yifuza ko iyi kipe yamanuka.’’

“Twamweretse ko turi gushaka abakinnyi batwongereramo imbaraga, ubuyobozi bw’Akarere na bwo bugaragaza ko buri gushakisha amafaranga yo guhemba ku buryo ikipe nta bibazo yazagira.”

Muri iyi nama ngo hanzuwe ko Akarere kazakomeza gufasha ikipe ku buryo ibibazo byo guhemba bitazigera biba ingorabahizi kuri iyi kipe. Bwiyemeje kandi gushakisha abandi Banyarwamagana bakomeza kuyiba hafi byaba na ngombwa bakayitera inkunga ku buryo itamanuka mu Cyiciro cya Kabiri.

Uwimana yasabye abaturage b’i Rwamagana gukomeza gushyigikira ikipe, abizeza impinduka mu mikino yo kwishyura ngo kuko bakurikije abakinnyi bashya bongeyemo hari byinshi bazabafasha mu kibuga mu buryo bugaragara.

Rwamagana City yarangije imikino ibanza iri ku mwanya wa 14 n’amanota 10 ndetse n’umwenda w’ibitego 16. Biteganyijwe ko izatangira imikino yo kwishyura ikina na Espoir FC ku wa Gatandatu, tariki ya 21 Mutarama 2023.

Nduwimana Roméo ni umwe mu bakinnyi bashya Rwamagana City yasinyishije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .