00:00:00 IGIHE NETWORK KN KINYARWANDA EN ENGLISH FR FRANCAIS

Rutahizamu w’Amavubi Gérard Bi Gohou yatandukanye n’ikipe ye

Yanditswe na Iradukunda Olivier
Kuya 17 Mutarama 2023 saa 09:57
Yasuwe :

Rutahizamu w’Ikipe y’Igihugu ‘Amavubi’, Gérard Bi Goua Gohou, yatandukanye na FC Aktobe yo mu Cyiciro cya Mbere muri Kazakhstan nyuma y’umwaka umwe ayikinira.

Andi makuru yo gusohoka muri iyi kipe, avuga ko uyu mugabo w’imyaka 34 y’amavuko, yagonzwe n’itegeko ribuza amakipe yo muri Kazakhstan Premier League gukinisha umunyamahanga uri hejuru y’imyaka 34.

Uyu mukinnyi umaze gukinira ikipe y’u Rwanda imikino ine gusa, yemejwe nk’umukinnyi wahawe ubwenegihugu muri Nzeri kugira ngo aze kuziba icyuho cyari mu kubona ibitego.

Akimara kwemezwa, benshi bashidikanyije ku bushobozi bwe, gusa budashidakanywaho n’umutoza Carlos Alós Ferrer wamugiriye icyizere. Gohou yabyerekanye ku mukino wa gicuti u Rwanda rwakinnye na Sudani ubwo yabonaga igitego cye cya mbere.

Impamvu nyamukuru yatumaga benshi bamwibazaho, yari imyaka cyane ko n’abo u Rwanda rwakinishaga mbere imyaka yarimo ibajyana. Byongeye kumukomerana ubwo kubona aho yerekeza bigiye kumugora kubera imyaka.

Uyu mugabo yari amaze igihe cy’umwaka umwe akinira FC Aktobe aho yarayigezemo avuye muri Kasımpaşa SK yo muri Turikiya, yamusezereye akamara amezi atandatu adakina.

Mu gihe yamaze akinira FC Aktob, Bi Gohou yagaragaye mu kibuga mu mikino 24, agira uruhare mu bitego 11, harimo umunani yatsinze ndetse na bitatu yatanze imipira bivamo.

Mu itangazo ikipe yashyize ku mbuga nkoranyambaga zayo, yamushimiye mu gihe bamaranye, ndetse itangaza ko agiye ku mpamvu zo kutongererwa amasezerano.

Ati “Aktobe Football Club, irabashimira mu gihe mumaranye na yo twatangaje, ndetse no mu mwaka w’imikino wa 2022, ku bw’umuhate n’ubufatanye bwabo. Turabifuriza amahirwe mu rugendo rushya mutangiye.”

Gérard Bi Gohou yasezerewe hamwe n’abandi bakinnyi babiri barimo ukomoka muri icyo gihugu Temirlan Erlanov n’Umunya-Brésil Rogerio Alves "Sheena".

Gérard Bi Gohou yagaragayeho kudatinda mu makipe cyane kuko yanyuze muri menshi kuva agitangira gukina nk’uwabigize umwuga. Yakiniye JC Abidjan yo muri Côte d’Ivoire, akinira na Hassania Agadir yo muri Maroc.

Yayivuyemo ajya ku mugabane w’i Burayi mu Busuwisi muri Neuchâtel Xamax, ayimaramo umwaka umwe gusa, ahita yerekeza muri Denizlispor yo muri Turukiya.

Nyuma y’umwaka umwe yahinduye ikipe yerekeza muri Kayseri Erciyesspor nayo yo muri Turukiya, ahita ajya muri Krasnodar yo mu Burusiya, nyuma y’igihe gito ahita asinya muri FC Kairet yo muri Kazakhstan.

Iyi ni yo kipe ya mbere uyu mugabo yongereyemo amasezerano yamugejeje mu 2017. Gérard yakomereje mu Bushinwa mu ikipe ya Beijing Enterprises Group, nayo ayimaramo umwaka umwe gusa.

Ntiyongeye kuhatinda, yahise yerekeza mu ikipe ya Kasimpaşa yo muri Turukiya mu gihe cy’umwaka umwe, ahava ajya muri FC Aktobe na yo yamazemo umwaka umwe.

Rutahizamu w'Amavubi Gérard Bi Gohou yatandukanye n'ikipe yakiniraga
Gérard Bi Gohou yari amaze igihe gito yemeye gukinira Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .