Ruswa nigaragara mu makipe yo mu Rwanda tuzabyinjiramo - Urwego rw’Umuvunyi

Yanditswe na Eric Tony Ukurikiyimfura
Kuya 30 Ugushyingo 2019 saa 10:15
Yasuwe :
0 0

Umuyobozi w’ishami rishinzwe gukumira no kurwanya ruswa mu Rwego rw’Umuvunyi, Gashumba Jeanne Pauline, yavuze ko bashobora kwinjira mu mupira w’u Rwanda mu gihe cyose bizaba bigaragaye ko habamo ruswa mu makipe.

Ntabwo ari bishya kumva ko mu Rwanda haba ruswa mu mupira w’amaguru, aho havugwa kugurisha imikino ku makipe amwe, abatoza cyangwa abakinnyi cyangwa imisifurire mibi na yo igashingira kuri ibi.

Urwego rw’Umuvunyi rwemeza ko narwo rubizi ko mu mupira w’u Rwanda bivugwamo nk’uko byemejwe na Gashumba Jeanne Pauline uyobora ishami rishinzwe gukumira no kurwanya ruswa ndetse ngo ni yo mpamvu hategurwa amarushanwa y’umupira w’amaguru atangirwamo ubutumwa bwo kuyikumira no kuyirwanya.

Ati’’ No mu bijyanye n’umupira, mu makipe, mu micungire yayo no mu mikorere, ruswa iravugwa turayumva nk’Abanyarwanda bose. Mu kubyumva ntabwo twacecetse nk’Urwego rw’Umuvunyi, nabo tubazana muri rwa rugamba rwo kurwanya ruswa. Niho ujya kubona tuzanye irushanwa cyangwa tukanyuza ubutumwa mu mupira w’amaguru kuko bivugwamo kugira ngo abakinnyi n’abayobozi b’amakipe babikurikire bumve ingaruka ruswa ishobora kubagiraho.’’

Ku mukino w’umunsi wa 11 wa Shampiyona uzahuza Kiyovu Sports na Rayon Sports kuri iki Cyumweru tariki ya 1 Ukuboza, hazatangirwamo ubutumwa bugamije kurwanya ruswa.

Ni igikorwa cyateguwe muri gahunda y’ubukangurambaga bugamijwe mu cyumweru cyahariwe kurwanya ruswa cyatangiye kuwa 17 Ugushyingo 2019 kikazasozwa tariki 9 Ukuboza 2019.

Gashumba avuga ko mu rwego rwo gusuzuma koko niba ruswa iba mu mupira w’amaguru hari amasuzuma bagenda bakora mu makipe atandukanye mu Rwanda ku buryo aho bazasanga yarabayeho, hazakorwa iperereza ryimbitse.

Ati’’ Mu makipe naho tujyamo, iyo dusanze harimo ibyuho bya ruswa dutanga inama, ariko na none iyo dusanze hari ibyaha byakozwemo biri mu nshingano z’Urwego rw’Umuvunyi, dukora iperereza ryimbitse. Twasuye amakipe atandukanye, twatangiriye kuri AS Kigali y’abakobwa n’abahungu, twagiye muri Sunrise FC, twagiye muri Mukura, tuzajya no mu yandi atandukanye. Abo twabakoreye raporo ndetse aho bishobora kugaragara ko habayemo ruswa dushobora kubyinjiramo.’’

Urwego rw’Umuvunyi rusanzwe rutegura amarushanwa atandukanye y’umupira w’amaguru agamije kurwanya ruswa, ariko uyu mwaka ubutumwa buzanyuzwa mu mukino wa Kiyovu Sports na Rayon Sports uzabera kuri Stade ya Kigali i Nyamirambo kuri iki Cyumweru saa 18:00.

Insanganyamatsiko y’uyu mwaka igira iti “Duhuze Imbaraga Turwanya Ruswa”.

Urwego rw'Umuvunyi rwemeza ko na rwo rwumva ko mu mupira w'u Rwanda habamo ruswa
Madamu Gashumba Jeanne Pauline, Umuyobozi w'ishami rishinzwe gukumira no kurwanya ruswa n'ibindi byaha biyishamikiyeho, yavuze ko mu isuzuma bakora mu makipe, aho bazasanga harabaye ibyaha bya ruswa bashobora kubyinjiramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .