Rugwiro Hervé na Mugisha basubukuye imyitozo muri Rayon Sports yitegura Espoir FC (Amafoto)

Yanditswe na Eric Tony Ukurikiyimfura
Kuya 13 Mutarama 2020 saa 03:52
Yasuwe :
0 0

Myugariro wa Rayon Sports Rugwiro Hervé yasubukuye imyitozo muri iyi kipe nyuma y’igihe hafi ibyumweru bibiri arekuwe n’urukiko, aho yari yafashwe akekwaho ibyaha birimo kujya muri Repubulika ya Demokarasi ya Congo mu buryo bunyuranyije n’amategeko.

Rugwiro Hervé yatawe muri yombi tariki ya 17 Ukuboza 2019, arekurwa tariki ya 3 Mutarama 2020 nyuma yo gusanga nta mpamvu zifatika zatuma akomeza gufungwa.

Uyu mukinnyi ntabwo yakinnye imikino itatu iheruka Rayon Sports yakinnye harimo uwo yatsinzwemo na APR FC ibitego 2-0, uwo yatsinzemo Gasogi United igitego 1-0 n’uwo yanganyijemo na AS Kigali ubusa ku busa.

Mu gitondo cyo kuri uyu wa Mbere ni bwo Rugwiro yongeye gukora imyitozo na bagenzi be ndetse yagaragaye ameze neza, aseka.

Ni imyitozo yagaragayemo kandi Mugisha Gilbert utarakinnye imikino ibiri iheruka kubera imvune yagiriye mu mukino wa gicuti wahuje ikipe ye na Karisimbi FC yo muri Repubulika Iharanira Demokarasi ya Congo.

Rayon Sports iheruka gukina ku wa Gatandatu ubwo yanganyaga na AS Kigali, yatangiye kwitegura umukino w’umunsi wa 18 wa Shampiyona uzayihuza na Espoir FC ku wa Gatandatu tariki ya 18 Mutarama 2020.

Kapiteni wayo, Rutanga Eric, yavuze ko abakinnyi biteguye neza uyu mukino ndetse bashaka gutsinda imikino yabo yose kugira ngo bagaruke mu banyamahirwe ba mbere ku gikombe cya Shampiyona y’uyu mwaka.

Ati "Twanganyije na AS Kigali ariko turashaka gutsinda umukino utaha tuzahuramo na Espoir FC kuko ubu niyo turi kwitegura. Twifuza gutsinda buri mukino kugira ngo turebe ko twakwisubiza igikombe cya Shampiyona.’’

Iyi myitozo yakoreshejwe na Kirasa Alain wasigaranye Rayon Sports nk’umutoza w’agateganyo, ntabwo yagaragaye abakinnyi barimo Kimenyi Yves, Mazimpaka André, Sugira Ernest na Iranzi Jean Claude mu gihe Bizimana Yannick na Oumar Sidibé umwanya munini bawumaze bicaye hanze.

Myugariro Kayumba Soter wakinaga muri AFC Leopards yo muri Kenya na Drissa Dagnogo ukomoka muri Côte d’Ivoire, bombi Rayon Sports yaguze mu minsi ishize, bakoranye n’abandi dore ko umukino utaha bashobora kuwukina, aho isoko ry’abakinnyi bakina hanze rizafungurwa ku wa Gatatu tariki ya 15 Mutarama 2020.

Rayon Sports izajya gukina na Espoir FC iri ku mwanya wa kabiri n’amanota 35, irushwa amanota atandatu na APR FC ya mbere. Ikipe y’i Rusizi yo iri ku mwanya wa 14 n’amanota 15.

Rugwiro Hervé yagarutse mu myitozo ya Rayon Sports yitegura Espoir FC
Commodore Olokwei utarakinnye imikino ibiri iheruka, mu myitozo yo mu gitondo cyo kuri uyu wa Mbere
Irambona, Iragire, Ndizeye, Mugheni na Sekamana bari kumwe na Mugisha Gilbert inyuma yabo
Sekamana Maxime yabanje mu kibuga mu mikino ibiri Rayon Sports iheruka gukina
Mwiseneza Djamal ayoboye abakinnyi ba Rayon Sports ashinzwe kongerera ingufu, mu myitozo yo kuri uyu wa Mbere
Bizimana Yannick na Oumar Sidibe bakoze umwanya muto
Iradukunda Eric mu myitozo y'uyu munsi
Rugwiro Herve akata mu makona
Runanira Hamza na Rugwiro Herve mu myitozo
Nshimiyimana Amran mu myitozo hamwe na Rugwiro na Rutanga Eric
Tumushime Altidjan uvukana na Manishimwe Djabel ukinira APR FC
Kayumba Soter ntabwo aratangira gukina Rayon Sports
Ciza Hussein wasimbuye ku mukino uheruka, ari mu bakoze imyitozo kuri uyu wa Mbere
Drissa Dagnogo na we ntabwo aratangira gukinira Rayon Sports
Mugisha Gilbert (12) wari umaze igihe adakina kubera imvune, yatangiye imyitozo
Mugheni Fabrice ashoreye umupira mu myitozo
Myugariro Iragre Saidi yitegura gutera umupira
Nizeyimana Mirafa mu myitozo yo kuri uyu wa Mbere
Banyuzagamo bagakinisha n'amaboko, bahererekanya
Abakinnyi ba Rayon Sports baganira n'abatoza
Umutoza w'agateganyo wa Rayon Sports Kirasa Alain mu myitozo y'uyu munsi
Kayumba Soter na Nshimiyimana Amran mu myitozo yo kugorora ingingo
Kapiteni wa Rayon Sports, Rutanga Eric akurikiwe na Kayumba Soter mu myitozo

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza