Ruboneka, Sibomana na Niyomugabo mu Amavubi yatangiye umwiherero

Yanditswe na Eric Tony Ukurikiyimfura
Kuya 23 Ukuboza 2020 saa 06:29
Yasuwe :
0 0

Ikipe y’Igihugu y’Umupira w’Amaguru ‘Amavubi’ yatangiye umwiherero kuri uyu wa Gatatu yitegura Shampiyona Nyafurika ihuza abakinnyi bakina imbere mu bihugu byabo (CHAN 2020) izabera muri Cameroun mu 2021.

CHAN 2020 yari kuba muri Mata igasubikwa kubera COVID-19, izaba hagati ya tariki ya 16 Mutarama n’iya 7 Gashyantare 2021.

Nyuma y’uko umutoza Mashami Vincent ahamagaye abakinnyi 31 bo kwitegura iyi mikino ya nyuma ku wa Kabiri, Amavubi yerekeje mu mwiherero mu Bugesera mu gitondo cyo kuri uyu wa Gatatu nyuma yo gupimwa COVID-19.

Mu bakinnyi bitabiriye umwiherero harimo Ruboneka Jean Bosco na Niyomugabo Claude bakinira APR FC ndetse na Sibomana Patrick ukinira Police FC, bose bari bahamagawe ku rutonde rwo gutegereza.

Aba bakinnyi uko ari batatu bitabajwe mu mwiherero w’Ikipe y’Igihugu nyuma y’uko Mashami Vincent agomba kugeza mu ntangiriro za Mutarama 2021 atarakira abakinnyi ba AS Kigali iri muri CAF Confederation Cup.

Ikipe y’Umujyi wa Kigali yari gukina na KCCA FC mu mukino ubanza w’ijonjora rya kabiri wari uteganyijwe kuri uyu wa Gatatu, ariko wakuweho kubera ko iyi kipe yo muri Uganda itari ifite abakinnyi bahagije, iterwa mpaga.

Mu bakinnyi Mashami yahamagaye harimo batandatu ba AS Kigali biteganyijwe ko bazitabira umwiherero nyuma ya tariki ya 6 Mutarama 2021 ubwo izaba imaze gukina umukino wo kwishyura na KCCA FC i Kampala.

Muri CHAN 2020, u Rwanda ruri mu itsinda C hamwe na Uganda, Maroc na Togo.

U Rwanda rwakiriye CHAN 2016, rugiye gukina iri rushanwa rihuza abakinnyi bakina imbere muri za shampiyona zabo ku nshuro ya gatatu yikurikiranya n’iya kane muri rusange nyuma yo kwitabira CHAN 2011 yabereye muri Sudani.

Abakinnyi 31 bahamagariwe kwitegura CHAN 2020

Abanyezamu: Kimenyi Yves (Kiyovu Sports), Ndayishimiye Eric ‘Bakame’ (AS Kigali), Kwizera Olivier (Rayon Sports) na Rwabugiri Umar (APR FC).

Ba myugariro: Manzi Thierry (APR FC), Mutsinzi Ange (APR FC), Rugwiro Hervé (Rayon Sports), Nsabimana Aimable (Police FC), Fitina Omborenga (APR FC), Imanishimwe Emmanuel (APR FC), Rutanga Eric (Police FC), Usengimana Faustin (Police FC), Bayisenge Emery (AS Kigali), Rusheshangoga Michel (AS Kigali) na Serumogo Ally (Kiyovu Sports).

Abakina hagati: Niyonzima Olivier ‘Seif’ (APR FC), Ngendahimana Eric (Kiyovu Sports), Twizeyimana Martin Fabrice (Police FC), Nsabimana Eric (AS Kigali), Manishimwe Djabel (APR FC), Nshuti Dominique Savio (Police FC) na Kalisa Rachid (AS Kigali).

Ba rutahizamu: Byiringiro Lague (APR FC), Sugira Ernest (Rayon Sports), Usengimana Danny (APR FC), Iradukunda Bertrand (Gasogi United), Iyabivuze Osée (Police FC), Mico Justin (Police FC), Tuyisenge Jacques (APR FC), Hakizimana Muhadjiri (AS Kigali) na Twizerimana Onesme wa Musanze FC.

Sibomana Patrick na we ari mu bakinnyi batangiranye n'abandi umwiherero nubwo yari mu bari ku rutonde rwo gutegereza
Ruboneka Jean Bosco yahamagawe bwa mbere mu Amavubi
Niyomugabo Jean Claude na we yongeye kwitabira umwiherero w'Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .