Robert Lewandowski yatowe nk’Umukinnyi mwiza w’Umwaka wa 2020 ku Isi

Yanditswe na Eric Tony Ukurikiyimfura
Kuya 18 Ukuboza 2020 saa 07:57
Yasuwe :
0 0

Rutahizamu w’Umunya-Pologne ukinira Bayern Munich yo mu Budage, Robert Lewandowski, ni we watowe nk’Umukinnyi mwiza w’Umwaka wa 2020 mu bihembo by’umwaka by’Ishyirahamwe ry’Umupira w’Amaguru ku Isi (FIFA) byatangiwe i Zurich ku wa Kane tariki ya 17 Ukuboza 2020.

Lewandowski yegukanye iki gihembo ahigitse Lionel Messi ukinira FC Barcelone na Argentine ndetse na Cristiano Ronaldo wa Juventus na Portugal.

Uyu Munya-Pologne yatsinze ibitego 55 mu mikino 47 mu mwaka ushize w’imikino, afasha Bayern Munich kwegukana ibikombe bitatu.

Lewandowski w’imyaka 32, yabaye umukinnyi watsinze ibitego byinshi muri shampiyona, mu gikombe cy’igihugu no muri UEFA Champions League.

Yatowe ku majwi 52, akurikirwa na Cristiano Ronaldo wagize 38 mu gihe Lionel Messi yagize 35.

Mu bagore, iki gihembo cyegukanywe n’Umwongereza Lucy Bronze ukinira Manchester City, wahigitse Pernille Harder na Wendie Renard.

Amajwi yabazwe ni ay’abatoza n’abakapiteni b’amakipe yose y’ibihugu, itora ryo kuri internet ry’abafana n’abanyamakuru 200 bo ku Isi.

Umutoza w’umwaka mu bagabo yabaye Jürgen Klopp utoza Liverpool naho mu bagore aba Sarina Wiegman utoza ikipe y’igihugu y’abagore y’u Buholandi.

Igitego Umunya-Koreya y’Epfo Heung-Min Son ukinira Tottenham yatsinze Burnley mu mwaka ushize ni cyo cyatowe nk’icy’umwaka wa 2020.

Abakinnyi bagize ikipe ya FIFA mu mwaka wa 2020 mu bagabo

Umunyezamu: Alisson (Liverpool)

Ba myugariro: Trent Alexander-Arnold (Liverpool), Virgil van Dijk (Liverpool), Sergio Ramos (Real Madrid), Alphonso Davies (Bayern Munich).

Abakina hagati Joshua Kimmich (Bayern Munich), Kevin de Bruyne (Manchester City), Thiago (Liverpool).

Abataha izamu: Lionel Messi (Barcelona), Robert Lewandowski (Bayern Munich), Cristiano Ronaldo (Juventus).

Perezida wa FIFA, Gianni Infantino, ashyikiriza Robert Lewandowski igihembo cy'Umukinnyi mwiza w'umwaka wa 2020 ku Isi
Lewandowski w'imyaka 32 yifotozanya igihembo yahawe ku wa Kane
Robert Lewandowski yifotoreza ku bikombe n'ibihembo yatwaye mu 2020
Yafashije Bayern Munich kwegukana UEFA Champions League muri uyu mwaka
Umutoza wa Liverpool, Jurgen Klopp, yatowe nk'uw'Umwaka wa 2020, ahigitse abandi
Lewandowski yari ahanganye na Messi na Cristiano Ronaldo
Lucy Bronze ni we watowe nk'Umukinnyi Mwiza w'Umwaka wa 2020 mu bagore
Heung-Min Son yahawe Puskas Award, igihembo kigenerwa igitego cyabaye cyiza kurusha ibindi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .