Athletic Bilbao yageze kuri uyu mukino wa nyuma isezereye Atlético Madrid mu gihe Real Madrid yakuyemo FC Barcelone.

Ku Cyumweru, ibifashijwemo n’abakinnyi bayo b’imbere barimo Rodrygo, Real Madrid yasatiriye cyane mu minota 10 ya mbere, ariko ibura aho imenera mu bwugarizi bwa Athletic Bilbao.

Uburyo bwa mbere bukomeye bwabonetse ni aho ku munota wa 16, Rodrygo yahaye umupira Karim Benzema, ashatse gutsinda uramutenguha ujya ku ruhande. Nyuma yaho, Casemiro yagerageje ishoti ryakuwemo n’umunyezamu Unai Simón.

Habura iminota umunani ngo igice cya mbere kirangire, Rodrygo yongeye kwinjirana umupira mu rubuga rw’amahina, awusubiza inyuma gato aho wahuye na Luka Modrić atera ishoti ryaruhukiye mu izamu rya Athletic Bilbao.

Oihan Sancet yashoboraga kwishyurira Athletic Bilbao mbere y’uko amakipe yombi ajya kuruhuka, ariko ishoti yatereye mu rubuga rw’amahina rica hejuru y’izamu ryari ririnzwe na Thibaut Courtois.

Nyuma y’iminota itandatu igice cya kabiri gitangiye, Benzema yahawe umupira ari mu rubuga rw’amahina, ashatse kuwutera mu izamu myugariro Yeray Alvarez aritambika ashyiraho ukuboko, hemezwa penaliti nyuma yo kwifashisha amashusho ya VAR. Iyi penaliti yinjijwe neza n’uyu Kapiteni wa Real Madrid washimangiye intsinzi hakiri kare.

Athletic Bilbao yasatiriye cyane mu minota yakurikiyeho, ariko nta buryo bukomeye bugana mu izamu yabonye ku buryo bwari kuyihesha kwishyura ibitego yatsinzwe.

Habura iminota itatu ngo umukino urangire, Eder Miltao wa Real Madrid yahawe ikarita itukura ubwo yatangiraga umupira n’ukuboko, penaliti yatewe na Raul García ikurwamo na Thibaut Courtois akoresheje ikirenge.

Kwegukana iki gikombe byatumye Real Madrid igeza Supercopa de España 12, irushwa imwe na mukeba FC Barcelone imaze kuyegukana inshuro 13.

Carlos Casemiro agerageza ishoti ryashyizwe muri koruneri n'umunyezamu Unai Simon

Federico Valverde acenga umukinnyi wa Athletic Bilbao

Yeray Alvarez ahanganiye umupira na Ferland Mendy

Vinicius Jr na Luka Modric bishimira igitego cya mbere cya Real Madrid

Luka Modric ashimirwa na bagenzi be nyuma yo gufungura amazamu

Karim Benzema yatsinze igitego cya kabiri cya Real Madrid kuri penaliti

Benzema mu byishimo nyuma yo gutsinda penaliti

Thibaut Courtois akuramo penaliti yahawe Athletic Bilbao

Abakinnyi ba Real Madrid bishimira igikombe begukanye

Thibaut Courtois ateruye igikombe ubwo yacyishimiraga hamwe na bagenzi be