Real Madrid yegukanye igikombe cya Super Coupe ya Espagne kuri penaliti (Amafoto)

Yanditswe na Eric Tony Ukurikiyimfura
Kuya 13 Mutarama 2020 saa 07:13
Yasuwe :
0 0

Sergio Ramos yateye penaliti ya nyuma yashimangiye intsinzi ya Real Madrid kuri penaliti 4-1 ndetse yegukana igikombe kiruta ibindi muri Espagne ‘’Super Coupe’’ itsinze mukeba Atlètico Madrid ku mukino wa nyuma wabereye muri Arabia Saoudite kuri iki Cyumweru.

Real Madrid yageze ku mukino wa nyuma isezereye Valence CF muri ½ mu gihe Atlètico Madrid yatsinze FC Barcelone.

Muri uyu mukino wa nyuma, Real Madrid yari hejuru cyane ya Atlètico Madrid yageze ku munota wa 79 nta shoti rikomeye iratera rigana mu izamu ry’abakeba bayo.

Real Madrid yashoboraga gufungura amazamu ku munota wa 67 ubwo Dani Carvajal yateraga umupira mu rubuga rw’amahina, ariko Federico Valverde wawushyikiriye mu rubuga rw’amahina ntiyawuhamya neza.

Umunyezamu Thibaut Courtois yatabaye Real Madrid ku buryo bumwe Atlètico Madrid yabonye mu minota 90, akuramo umupira watewe na Alvaro Morata.

Nyuma yo kunganya ubusa ku busa mu minota isanzwe, hongereweho iminota 30 y’inyongera maze ku munota wa wa 110, Real Madrid ibona uburyo bwiza ubwo Luka Modrić yateraga ishoti rikomeye umunyezamu Jan Oblak akarikuramo, umupira ugarukiye Mariano Diaz awusubizamo nabwo uyu munyezamu atabara ikipe ye.

Habura iminota itanu ngo umukino urangire, Atlètico Madrid yashoboraga gufungura amazamu ku mupira wazamukanwe na Morata wari wasize abakinnyi bose ba Real Madrid, Federico Valverde amutegera inyuma, ahabwa ikarita itukura.

Muri penaliti zatewe, Saul Niguez na Thomas Partey bahushije ebyiri za mbere za Atlètico Madrid mu gihe iya gatatu yinjiwe na Kieran Trippier naho Carvajal, Rodrygo, Luka Modrić na Sergio Ramos batsinda iza Real Madrid yegukanye igikombe cya 11 cya Super Coupe.

Kubera iki Super Coupe y’amakipe ane?

Igikombe cya Super Coupe muri Espagne cyakinwaga mu buryo bumwe kuva mu 1982 kugeza mu mwaka ushize, aho cyahuzaga ikipe yatwaye Shampiyona ya La Liga n’iyatwaye igikombe cy’igihugu, Copa del Rey.

Mu myaka ya mbere, ikipe yegukanaga ibikombe byombi mu mwaka umwe, yahitaga ihabwa Super Coupe mu gihe mu myaka yakurikiyeho, iyatwaye Shampiyona yahuraga n’iyatsindiwe ku mukino wa nyuma mu gikombe cy’igihugu.

Mu mwaka ushize, FC Barcelone yatwaye ibikombe byombi, yahuye na Seville yatsindiye ku mukino wa nyuma wa Copa del Rey, inayitwara Super Coupe iyitsinze ibitego 2-1 mu mukino wabereye mu Mujyi wa Tangier muri Maroc.

Guhera uyu mwaka kugeza mu myaka ibiri iri imbere (ni ukuvuga imyaka itatu hamwe), uburyo iki gikombe cyahatanirwagamo byarahindutse.

Irushanwa rizajya riba muri Mutarama, ribere muri Arabia Saoudite ndetse rihuze amakipe ane arimo abiri ya mbere muri Shampiyona iheruka, n’abiri yageze ku mukino wa nyuma wa Copa del Rey.

Ayo makipe naba ari amwe, haziyongeramo indi yaje hafi muri Shampiyona. Uyu mwaka iri rushanwa riri gukinirwa kuri King Abdullah Sports City Stadium iri mu Mujyi wa Jeddah, ifite ubushobozi bwo kwakira abantu ibihumbi 62, rikaba rihuje amakipe ya FC Barcelone, Real Madrid, Atlètico Madrid na Valence.

Kubera iki ryajyanwe muri Arabia Soudite kandi rikaba mu kwa mbere?

Ishyirahamwe ry’Umupira w’Amaguru muri Espagne ryirinze kuvuga amafaranga ryishyuwe n’Abarabu kugira ngo iyi mikino ijyanwe muri Asia, ariko itangazamakuru ryaho rivuga ko ari hafi miliyoni 120 z’amayero mu myaka itatu (ni ukuvuga miliyoni 40€ ku mwaka).

Iki ni cyo gikorwa cya siporo gikomeye kibereye muri Arabia Saoudite nyuma y’umurwano uheruka guhuza Anthony Joshua na Andy Ruiz Jr bakina iteramakofe.

Haheruka kubera kandi umukino wa Super Coupe y’u Butaliyani wahuje Juventus na Lazio mu kwezi gushize kimwe n’umukino wa gicuti wahuje Brésil na Argentine.

Ubwami bwa Arabia Saoudite bwiyemeje kumenyekanisha isura y’igihugu mu mikino n’imyidagaduro kugira ngo Isi yibuke ko ari igihugu gikungahaye ku bikomoka kuri peteroli.

Super Coupe ya Espagne yashyizwe muri uku kwezi kwa mbere, aho kuba mu mpeshyi kugira ngo itabangamira gahunda y’imikino yo kwitegura umwaka mushya w’imikino.

Ntibyashimishije benshi

Ibigo bitandukanye n’abaturage ba Espagne ntabwo bishimiye kuba iyi mikino yarajyanwe muri Arabia Saoudite dore ko kugira ngo impande zombi zigirane aya masezerano, Arabia Saoudite yabanje kwemera ko abagore bazareba iyi mikino (muri iki gihugu ntibyari byemewe).

Mu kwitegura iyi mikino Ikipe ya Valence yahawe miliyoni ebyiri, Atlètico Madrid ihabwe eshatu mu gihe FC Barcelone na Real Madrid buri imwe izahabwa miliyoni 6€.

Saul Niguez agerageza gutera umupira mu izamu yigaramye muri uyu mukino wa nyuma wa nyuma wa Super Coupe
Jovic yananiwe gutsindira Real Madrid mu gice cya mbere
Thibaut Courtois yatabaye Real Madrid kenshi
Valverde yakoze ikosa ryatabaye ikipe ye ubwo yategaga Alvaro Morata
Federico Valverde ahabwa ikarita itukura ubwo haburaga iminota itanu ngo umukino urangire
Kapiteni wa Real Madrid, Sergio Ramos asoma igikombe cya Super Coupe ikipe ye yegukanye ku nshuro ya 11
Abakinnyi ba Real Madrid n'abatoza bifotozanya igikombe bari bamaze kwegukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza