Real Madrid yatsinze FC Barcelone, Ansu Fati akora amateka muri El Clàsico (Amafoto)

Yanditswe na Eric Tony Ukurikiyimfura
Kuya 24 Ukwakira 2020 saa 07:16
Yasuwe :
0 0

Ibitego byo mu gice cya kabiri byatsinzwe na Sergio Ramos na Luka Modrić byafashije Real Madrid gutsinda FC Barcelone 3-1 mu mukino w’umunsi wa karindwi wa Shampiyona y’Icyiciro cya Mbere muri Espagne, La Liga, wabereye i Camp Nou kuri uyu wa Gatandatu.

Muri uyu mukino uzwi nka El Clàsico wabereye mu muhezo ku kibuga cya FC Barcelone, Real Madrid yafunguye amazamu ku gitego cyatsinzwe na Federico Valverde ku munota wa gatanu w’umukino, ku mupira yari aherejwe na Karim Benzema.

Real Madrid yashoboraga kubona igitego cya kabiri nyuma yo gukina neza kwabaye hagati ya Benzama na Vinícius Júnior, ariko uyu rutahizamu w’Umunya-Brésil atera umupira ku ruhande rw’izamu ryari ririnzwe na Neto.

Bidatinze, ku munota wa munani gusa, Ansu Fati w’imyaka 17, yishyuriye FC Barcelone ku mupira wahinduwe na Jordi Alba, aba umukinnyi ukiri muto utsinze igitego mu mateka y’uyu mukino wa El Clàsico uhuza amakipe yombi.

Nyuma y’uburyo butandukanye bwabonetse ku mpande zombi, Real Madrid yatsinze igitego cya kabiri ku munota wa 63 kuri penaliti yatanzwe nyuma yo kwifashisha ikoranabuhanga rya VAR, bikagaragara ko uyu kapiteni w’ikipe y’i Madrid yakiniwe nabi na Clément Lenglet.

Luka Modrić winjiye asimbuye Federico Valverde ku munota wa 69, yatsinze igitego cya gatatu nyuma yo gucenga umunyezamu Neto wari wasohotse akegera imbere, ku munota wa 90.

Gutsinda uyu mukino byafashije Real Madrid gufata umwanya wa mbere muri La Liga n’amanota 13 mu mikino itandatu, irusha FC Barcelone atandatu nubwo yo imaze gukina imikino itanu.

Umutoza wa Real Madrid, Zinedine Zidane, ntaratsindirwa ku kibuga cya FC Barcelone, aho yatsinze imikino itatu, akanganya indi itatu.

Ni ku nshuro ya mbere aya makipe yombi abonye ibitego mu minota umunani ibanza y’umukino wa Shampiyona kuva mu 1940.

Ubwo Real Madrid yaherukaga kumara imikino itatu yikurikiranya ya El Clàsico idatsindwa ni mbere y’umwaka w’imikino wa 2012-13.

FC Barcelone yari yakiriye Real Madrid mu mukino wabereye i Camp Nou mu muhezo
Abatoza bombi: Zinedine Zidane wa Real Madrid na Ronald Koeman wa FC Barcelone, basuhuzanya mbere y'umukino
Federico Valverde yatsinze igitego cya mbere cya Real Madrid hakiri kare
FC Barcelone yishyuye nyuma y'iminota itatu ku gitego yatsindiwe na Ansu Fati
Ansu Fati w'imyaka 17, yaciye agahigo ko kuba umukinnyi ukiri muto utsinze igitego mu mukino wa El Clàsico
Real Madrid yahawe penaliti mu gice cya kabiri ku ikosa Clement Lenglet yakoreye kuri Ramos
Kapiteni wa Real Madrid, Sergio Ramos, yishimira igitego cya kabiri yatsinze kuri penaliti
Ramos mu bicu ubwo yasanganirwaga na Lucas Vasquez
Luka Modrić yatsinze igitego cya gatatu nyuma yo gucenga umunyezamu Neto mu minota ya nyuma
Lionel Messi akomeje kugorwa n'uyu mwaka w'imikino mu gihe mbere y'uko utangira yari yagaragaje ko ashaka kuva muri FC Barcelone
Myugariro Gerard Pique yabuze uko yifata nyuma y'uko FC Barcelone yongeye gutsindirwa mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .