Real Madrid na Juventus zasezerewe muri UEFA Champions League (Amafoto)

Yanditswe na Eric Tony Ukurikiyimfura
Kuya 8 Kanama 2020 saa 07:30
Yasuwe :
0 0

Ibitego bya Raheem Sterling na Gabriel Jesus byafashije Manchester City gusezerera Real Madrid muri 1/8 cya UEFA Champions League, ni nyuma yo kuyitsinda ibitego 2-1 mu mukino wo kwishyura wabereye mu Bwongereza ku wa Gatanu, bikaba ibitego 4-2 mu mikino yombi.

Irushanwa rya UEFA Champions League rihuza amakipe yabaye aya mbere iwayo i Burayi, ryari ryongeye kugaruka nyuma y’igihe gisaga amezi atanu (iminsi 163) rihagaritswe n’icyorezo cya Coronavirus.

Manchester City yaburaga bamwe mu bakinnyi barimo na rutahizamu Sergio Kun Agüero, yari yakiriye Real Madrid itari ifite myugariro wayo ngenderwaho, akaba na kapiteni wayo, Sergio Ramos wari waje kureba uyu mukino kuko yabonye ikarita itukura muri Werurwe.

Amakosa yakozwe na Raphaël Varane mu bwugarizi, yahesheje Manchester City kuyobora umukino hakiri kare, aho yambuwe umupira na Gabriel Jesus wahise atanga umupira kuri Raheem Sterling, aroba umunyezamu Thibaut Courtois ku munota wa cyenda.

Manchester City yakomeje gusatira ndetse yashoboga kubona igitego cya kabiri ku ishoti ryatewe na Raheem Sterling nyuma y’iminota itandatu, umupira uca hejuru gato y’izamu.

Byasabye Real Madrid gutegereza umunota wa 28, itsindirwa igitego cyo kwishyura na Karim Benzema ku mupira wahinduwe na Rodrygo.

Irindi kosa rya Varane ku mupira yasubije inyuma n’umutwe umunyezamu Thibaut Courtois akananirwa kuwufata, ryavuyemo igitego cya kabiri cyatsinzwe na Gabriel Jeus ku munota wa 68, bishyira akadomo ku rugendo rwa Real Madrid muri UEFA Champions League y’uyu mwaka.

Ni ku nshuro ya gatatu Pep Guardiola kuri ubu utoza Manchester City, asezereye Real Madrid muri iri rushanwa mu gihe ari ubwa mbere Zinedine Zidane asezerewe hakiri kare kuva abaye umutoza w’iyi kipe yo muri Espagne.

Undi mukino wabaye ku wa Gatanu, wasize Juventus isezerewe na Lyon ku bitego 2-2 (hitabajwe itegeko ry’igitego cyo hanze) nubwo yari yihagazeho mu rugo, igatsinda ibitego 2-1.

Lyon yari yatsinze igitego 1-0 mu mukino ubanza, yafunguye amazamu hakiri kare ku gitego cyatsinzwe na Memphis Depay kuri penaliti mu gihe Cristiano Ronaldo yishyuriye Juventus ku munota wa 43, na we kuri penaliti.

Icyizere cy’abafana ba Juventus cyiyongereye guhera ku munota wa 60 ubwo Cristiano Ronaldo yatsindaga igitego cyiza ku mupira yaherejwe na Federico Bernadeschi, ariko birangira itabonye ikindi kimwe yasabwaga ngo ikomeze.

Manchester City izahura na Lyon muri ¼ kizatangira gukinwa guhera ku wa Gatatu w’icyumweru gitaha.

Kuri uyu wa Gatandatu hateganyijwe indi mikino ibiri ya 1/8 yasubitswe muri Werurwe, aho FC Barcelone yakira Napoli zari zanganyije igitego 1-1 mu gihe Bayern Munich yakira Chelsea yari yatsinze ibitego 3-0 mu mukino ubanza. Yombi iratangira saa 21:00.

Raheem Staerling afungura amazamu ku mupira wari umaze gutakazwa na Raphael Varane
Rutahizamu ukiri muto, Phil Foden wari wagiriwe icyizere cyo kubanzamo, ahanganiye umupira na ba myugariro ba Real Madrid barimo Eder Militao na Dani Carvajal
Karim Benzema yishyuriye Real Madrid ku mupira yateresheje umutwe
Karim Benzema na Eden Hazard nyuma yo kwishimira igitego cyo kwishyura
Sergio Ramos yishimira igitego cya Karim Benzema cyatangaga icyizere kuri Real Madrid
Irindi kosa ryakozwe na Varane ryatumye Thibaut Courtois yongera kwisanga ahanganiye umupira na Gabriel Jesus
Gabriel Jesus yishimira igitego cya kabiri yatsindiye Manchester City
Manchester City yakomeje muri 1/4 cya UEFA Champions League aho izahura na Lyon

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .