RBC ihangayikishijwe n’uko kwishimira intsinzi y’Amavubi byaba icyanzu cy’ubwiyongere bwa COVID-19 i Kigali

Yanditswe na Eric Tony Ukurikiyimfura
Kuya 27 Mutarama 2021 saa 10:16
Yasuwe :
0 0

Ikigo cy’Igihugu cy’Ubuzima (RBC) cyagaragaje ko hari impungenge z’uko ubwandu bwa COVID-19 bushobora kwiyongera i Kigali bitewe n’abiraye bakajya mu mihanda bishimira intsinzi Amavubi yabonye kuri Togo ku wa Kabiri.

Ikipe y’Igihugu yatsinze iya Togo ibitego 3-2, ibona itike yo gukomeza muri ¼ cya Shampiyona Nyafurika ihuza abakinnyi bakina imbere mu bihugu byabo (CHAN 2020) iri kubera muri Cameroun.

Kuba ari intsinzi u Rwanda rwari rukeneye ngo rugume muri iri rushanwa ndetse Amavubi akaba yaherukaga gutsinda umukino uwo ari wo wose muri Nzeri 2019, byanejeje Abanyarwanda benshi mu buryo budasanzwe, birara mu muhanda, bica amabwiriza yo kwirinda COVID-19.

Mu bice bitandukanye by’Umujyi wa Kigali, bamwe bahuriye hamwe ari benshi batibuka guhana intera, abandi nta dupfukamunwa bambaye nyamara hashize iminsi umunani uyu Murwa mukuru w’u Rwanda ushyizwe muri gahunda ya Guma mu Rugo kubera ubwandu bwa COVID-19 bukomeje kwiyongera.

Nk’uko RBC yabitangaje kuri Twitter kuri uyu wa Gatatu, yavuze ko hari impungenge ko abagiye kwishimira iyi ntsinzi mu mihanda bashobora kuba imbarutso y’ubwiyongere bw’ubwandu bwa COVID-19 mu Mujyi wa Kigali, ubusanzwe bwari hejuru ya 5% y’ibipimo bifatwa.

Cyagize giti ”Tumaze iminsi dupima abaturage mu tugari twose tugize Umujyi wa Kigali kugira ngo tugire ishusho y’uko icyorezo cya COVID-19 gihagaze mu murwa. Ikigero cy’ubwandu ahenshi muri Kigali kiri hejuru ya 5%.”

“Birashoboka ko abantu benshi banduriye mu bikorwa byo kwizihiza intsinzi y’Amavubi. Birashoboka kandi ko hari abirinze, bakomeza kubahiriza amabwiriza ariko abasohotse bakaba baje babagemuriye uburwayi ubwo bagarukaga aho batuye.”

RBC yibukije Abanyarwanda kudakerensa amabwiriza yo kwirinda COVID-19 kuko iki cyorezo gikomeje gutwara ubuzima bw’abatari bake.

Iti “Nk’Abanyarwanda, uru rugamba ntituzarutsinda niba twiyemeje kururwana dukamira umwanzi. Kwirinda ni inshingano ya buri wese. Tuzirikane abahitanwa n’iki cyorezo kubera ko bacyandujwe n’abanze kubahiriza amabwiriza yo kwirinda.”

Imibare yashyizwe hanze na Minisiteri y’Ubuzima ku wa Kabiri, tariki ya 26 Mutarama 2021, igaragaza ko abasanzwemo COVID-19 mu Mujyi wa Kigali ari 440 muri 574 babonetse mu gihugu cyose mu bipimo 10,407 byafashwe.

Ikipe y’Igihugu izasubira mu kibuga ku Cyumweru, aho muri ¼, izakina n’ikipe iba iya mbere mu itsinda D hagati ya Guinea, Zambia na Tanzania.

Inkuru bifitanye isano: Bamwe byabarenze bibagirwa ko ari Guma mu Rugo! Uko Abanyarwanda bakiriye intsinzi y’Amavubi muri CHAN 2020

Hari impungenge ko abagiye mu mihanda kwishimira intsinzi y'Amavubi bashobora kuba baranduye COVID-19 bakayigemurira n'abo basize mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .