00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports y’inyabibazo yatsinzwe na Rutsiro FC, AS Muhanga isatira gusubira mu Cyiciro cya Kabiri

Yanditswe na Habimana Sadi
Kuya 22 Kamena 2021 saa 10:48
Yasuwe :
0 0

Mu mikino y’ibirarane ya Shampiyona yabaye kuri uyu wa Kabiri, Rutsiro FC yatsindiye Rayon Sports mu Bugesera ibitego 2-0 mu gihe AS Muhanga yanyagiwe na Etincelles FC ibitego 4-0, igasatira gusubira mu Cyiciro cya Kabiri.

Kuri uyu wa Kabiri nibwo hakinwaga imikino ibiri y’ibirarane mu makipe umunani ya mbere ahataniye igikombe cya Shampiyona n’umunani ya nyuma ahataniye kutajya mu cyiciro cya Kabiri.

Umukino wabanje ni uwahuje Etincelles FC na AS Muhanga ziri mu makipe umunani ahataniye kuguma mu Cyiciro cya Mbere, zombi zikaba zitarakinnye ku wa Kane w’icyumweru gishize kubera ingamba zijyanye no kwirinda COVID-19 mu Karere ka Rubavu.

Iyi kipe y’i Rubavu yari yakiriye umukino mu Bugesera, yabonye igitego cya mbere hakiri kare, cyatsinzwe na Muganza Isaac ku munota wa 10 gusa. Umunya-Tchad Brahim Hassan Djibrine yatsinze ibindi bitego bitatu ku minota ya 45, 54 na 61.

Umukino warangiye Etincelles FC ibonye amanota atatu yuzuye nyuma yo gutsinda ibitego 4-1 ndetse igira amanota icyenda ku mwanya wa gatatu w’amakipe umunani ahataniye kuguma mu Cyiciro cya Mbere.

Gutsindwa kwa AS Muhanga bivuze ko itarabona inota na rimwe mu mikino itanu imaze gukinwa ndetse yasatiriye gusubira mu Cyiciro cya Kabiri kuko irushwa amanota atanu na Mukura Victory Sports ndetse n’atandatu n’amakipe ya Sunrise FC na Gasogi United ayiri imbere.

Kugira ngo AS Muhanga ifite umwenda w’ibitego 13, igume mu Cyiciro cya Mbere, bizayisaba gutsinda imikino ibiri isigaye ku kinyuranyo cy’ibitego byinshi mu gihe amakipe atatu ayiri imbere yaba yatsinzwe imikino yayo.

Nyuma y’uyu mukino, hakurikiyeho uwa Rutsiro FC yakiriye Rayon Sports FC i Bugesera kubera ko Akarere ka Rubavu kari muri Guma Mu Karere kubera ubwiyongere bw’icyorezo cya Covid-19.

Ni umukino woroheye Rutsiro FC kuko ku munota wa 15 gusa iyi kipe yari ibonye penaliti yahise itsindwa neza na Ndarusanze Jean Claude uzwi ku izina rya Lambalamba.

Rayon Sports ikunzwe na benshi mu Rwanda, yatojwe na Kayiranga Baptiste bwa mbere nyuma y’iyegura rya Guy Bukasa, yakinnye idafite bamwe mu bakinnyi bayo ngenderwaho nka Héritier Nzinga Luvumbu, Manace Mutatu (wagiyemo asimbuye) na Jean Vital Ourega.

Iminota 45 y’igice cya mbere yarangiye Rutsiro FC iri imbere n’igitego 1-0, ariko ku munota wa 54, Ndarusanze Jean Claude atsindira ikipe ye igitego cya kabiri.

Mu gice cya kabiri, umutoza wa Rayon Sports FC, Kayiranga Baptiste yakoze impinduka akuramo abakinnyi nka Idrissa Dagnogo, Nshimiyimana Amran na Ciza Hussein, basimburwa na Manace Mutatu, Mudacumura Jackson na Rudasingwa Prince.

Rutsiro FC yakomeje gucunga ibitego byayo, iminota 90 irangira yegukanye amanota atatu yuzuye.

Gutsindwa uyu mukino byatumye Rayon Sports FC ijya ku mwanya wa gatanu n’amanota atanu mu mikino itandatu mu gihe Rutsiro FC yafashe umwanya wa kane n’amanota atandatu mu mikino itandatu.

Rutsiro FC yahise ifata umwanya wa kane mu makipe umunani ahatanira igikombe cya shampiyona
Rayon Sports FC ikomeje kugorwa n'ibibazo bitandukanye muri uyu mwaka
Ikirenge kimwe cya AS Muhanga cyamaze kugera mu Cyiciro cya Kabiri mu gihe hasigaye imikino ibiri mu makipe arwana no kutamanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .