Rayon Sports yongereye abanyamahanga batatu ku rutonde izakoresha muri CAF Champions League

Yanditswe na Eric Tony Ukurikiyimfura
Kuya 21 Nyakanga 2019 saa 07:37
Yasuwe :
0 0

Rayon Sports yamaze gutanga uruutonde rwa nyuma rw’abakinnyi izakoresha mu mikino Nyafurika ya CAF Champions League, aho muri 24 yari yatanze mbere, yakuyemo umukinnyi ikongeramo abandi bane barimo abanyamahanga batatu.

Kuri uyu wa Gatandatu ni wo wari umunsi wa nyuma wo kwemeza abakinnyi bazakina amarushanwa ya CAF mu mwaka utaha w’imikino ku makipe azahagarira ibihugu haba muri Champions League ihuza ayabaye aya mbere iwayo na Confederation Cup ihuza ayatwaye ibikombe by’igihugu.

Nyuma y’uko Rayon Sports yari yatanze urutonde rw’abakinnyi 24 ndetse ikaba itari yagafashe umwanzuro cyane ku bakinnyi bose izakoresha mu mwaka utaha w’imikino w’irushanwa nyafurika rya CAF Champions League, na yo iri mu makipe yasubiyemo urutonde yari yatanze.

Ubuyobozi bwa Rayon Sports bwahisemo kugarura rutahizamu Michael Sarpong wari umaze iminsi yifuzwa na Orlando Pirates, ariko iyi kipe yo muri Afurika y’Epfo ikagaragaza ubushake buke bwo kugura uyu munya-Ghana yifuzagamo ibihumbi $120.

Rayon Sports yari yahaye Orlando Pirates saa 12:00 zo ku wa Gatanu nk’isaha ya nyuma yo kuba yemeje ko izafata uyu mukinnyi cyangwa na bo bakamutanga ku rutonde rwo muri CAF.

Abanya-Afurika y’Epfo ntibigeze basubiza ubusabe bwa Rayon Sports maze na yo yisubiza uyu rutahizamu wayitsindiye ibitego 16 muri shampiyona y’umwaka ushize.

Undi wiyongereye kuri uru rutonde ni myugariro w’umunyarwanda ukina inyuma ku ruhande rw’iburyo, Nyandwi Saddam wari mu bashobora kwirukanwa, ariko nyuma yo kubura umusimbura we, yumvikanye n’ikipe ko yongera amasezerano ku wa Gatanu.

Rayon Sports yatanze kandi abanya-Mali babiri bataha izamu; Oumar Sidibé na Mohamed N’Diaye mu rutonde rwa 27 izifashisha muri CAF Champions League n’ubwo aba bakinnyi bombi bazagera mu Rwanda kuri uyu wa Mbere.

Oumar Sidibé w’imyaka 29 yari mu bakinnyi baguzwe na AS Vita Club yo muri Repubulika Iharanira Demokarasi ya Congo mu 2016 hamwe na rutahizamu w’umunyarwanda Sugira Ernest.

Uyu mukinnyi yerekeje muri Hatayspor FC yo mu cyiciro cya kabiri muri Turukiya mu mwaka ushize, ahava yerekeza muri Djoliba Athletic Club yo muri Mali mu ntangiriro z’uyu mwaka.

Mohamed N’Diaye w’imyaka 25, yakiniraga Association Sportive Mangasport de Moanda yo muri Gabon guhera mu 2015, akaba yarazamukiye muri Stade Malien de Bamako.

Rutahizamu mushya w’Umunya-Nigeria, Samuel Ifeanyi Nwosu Chukwudi Rayon Sports yari yasinyishije ntabwo yongeye gutangwa ku rutonde mu gihe umunyezamu wa kane ukiri muto, Nsengiyumva Emmanuel we yakuwe ku rutonde n’ubwo yari yagaragaye ku rwatanzwe mbere.

Rayon Sports yagaruye umutoza Robertinho uzagera i Kigali ku wa Gatatu, izamenya ikipe izahura na yo muri CAF Champions League tariki ya 27 z’uku kwezi mu gihe imikino yombi y’ijonjora ribanza izaba hagati ya tariki 9 n’iya 24 Kanama 2019.

Urutonde rw’abakinnyi na numero bazambara muri CAF Champions League

  1. Kimenyi Yves (1)
  2. Iragire Saidi (2)
  3. Rutanga Eric (3)
  4. Rugwiro Hervé (4)
  5. Nshimiyimana Amran (5)
  6. Runanira Hamza (6)
  7. Ulimwengu Jules (7)
  8. Nizeyimana Mirafa (8)
  9. Mohamed N’Diaye (9)
  10. Ciza Hussein (10)
  11. Commodor Olokwei (11)
  12. Mugisha Gilbert (12)
  13. Irakoze Saidi (13)
  14. Iradukunda Eric (14)
  15. Nyandwi Saddam (16)
  16. Irambona Eric (17)
  17. Sarpong Michael (19)
  18. Habimana Hussein (20)
  19. Iranzi Jean Claude (21)
  20. Bikorimana Gérard (22)
  21. Bizimana Yannick (23)
  22. Sekamana Maxime (24)
  23. Ndizeye Samuel (25)
  24. Niyomwungeri Mike (26)
  25. Mugheni Fabrice (27)
  26. Oumar Sidibe (29)
  27. Mazimpaka André (30)
Oumar Sidibé na Mohamed N’Diaye mu rutonde rwa 27 Rayon Sports izifashisha muri CAF Champions League
Rayon Sports yisubije Michael Sarpong wifuzwaga na Orlando Pirates
Nyandwi Saddam yongerewe amasezerano, ashyirwa mu bazakina CAF Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza