Rayon Sports yishyuye Bugesera FC ku munota wa nyuma (Amafoto + Video)

Yanditswe na Eric Tony Ukurikiyimfura
Kuya 25 Ugushyingo 2020 saa 09:16
Yasuwe :
0 0

Igitego cya Drissa Dagnogo cyatsinzwe mu minota y’inyongera, cyafashije Rayon Sports kunganya na Bugesera FC 2-2 mu mukino wa gicuti wabereye kuri Stade ya Bugesera kuri uyu wa Gatatu.

Uyu mukino wa gicuti ugamije gutegura Shampiyona ya 2020/21 izatangira ku wa 4 Ukuboza, wari uwa kane kuri Bugesera FC iheruka gutsindwa na APR FC 3-0 mu gihe wari uwa kabiri kuri Rayon Sports yatsinze Alpha igitego 1-0 mu ntangiriro z’uku kwezi.

Bugesera FC yagaragaje kumenyerana kw’abakinnyi bayo ndetse isatira Rayon Sports binyuze mu basore nka Kwitonda Alain na Rucogoza Djihad babonye amahirwe ku munota wa 10 n’uwa 15 ariko umunyezamu Bashunga Abouba abyitwaramo neza.

Rayon Sports itari yageze ku izamu rya Bugesera FC inshuro nyinshi, yabonye igitego ku munota wa 23 gitsinzwe na Sugira Ernest ku mupira yari ahawe neza na Ndizeye Samuel.

Ku munota wa 30, Bashunga Abouba yakoze akazi gakomeye akuramo umupira wa Mujyanama Fidèle washakaga gukiza izamu, bikarangira werekeje mu izamu rye, ariko uyu munyezamu akozaho ikiganza ujya muri koruneri unyuze hejuru y’izamu.

Ku munota wa 34, Gisa wa Bugesera FC yacitse Mujyanama na Niyonkuru Sadjate ahindura umupira ukomeye imbere y’izamu, Bashunga arirambura awutanga ba rutahizamu.

Ku munota wa 36, Manace Mutatu yateye ishoti rikomeye mu izamu rya Bugesera FC, umunyezamu Twagirayezu Amani akuramo uyu mupira.

Bugesera FC yakomeje gushaka igitego, yabigezeho ku munota wa 45, aho Rucogoza Djihad yacunze uko umunyezamu Bashunga ahagaze maze amutera umupira arawumurenza, uruhukira mu rushundura.

Umutoza Guy Bukasa yatangiye igice cya kabiri akora impinduka; Mudacumura Jackson bita Rambo aha umwanya Oumar Sidibé, Mujyanama Fidèle asimburwa na Niyibizi Emmanuel.

Ku munota wa 57, Rugwiro Hervé na we yinjiye asimbura Habimana Hussein, Sunday Jimoh asimbura Sugira mu gihe Niyonkuru Sadjate yahaye umwanya Ciza Hussein ku munota wa 65.

Mu gice cya kabiri nta mahirwe menshi yabonetsemo umupira wakinirwaga hagati mu kibuga.

Ku munota wa 67 Manace yahushije igitego ku mupira wari uhinduwe na Niyibizi Emmanuel mbere y’uko Nshimiyimana Amran yinjira mu kibuga ku munota wa 75 asimbuye Jean Vital Ourega.

Ku munota wa 79, Ntwari Jacques yatsindiye Bugesera FC igitego cya kabiri n’umutwe ku mupira wari uhinduwe n’Umurundi Désiré winjiye mu kibuga asimbura Kwitonda Alain.

Rutahizamu Drissa Dagnogo wasimbuye Sunday Jimoh habura iminota itanu ngo umukino urangire, ni we wishyuriye Rayon Sports ku gitego cyabonetse ku munota wa gatatu w’inyongera, ku mupira wari uvuye muri koruneri, uhinduwe na Manace Mutatu.

Rayon Sports izahura na Bugesera FC ku munsi wa kabiri wa Shampiyona, izakina undi mukino wa gicuti na Police FC ku wa Gatanu mu gitondo kuri Stade ya Kigali.

Abakinnyi ba Bugesera FC babanje mu kibuga
Abakinnyi ba Rayon Sports babanje mu kibuga
Ba kapiteni b'amakipe yombi: Rucogoza Djihad (uwa kabiri ibumoso) na Habimana Hussein bifotozanya n'abasifuzi bayobowe na Harindintwari Jonathan
Manace Mutatu agerageza gucenga myugariro wa Bugesera FC
Nishimwe Blaise ni umwe mu bakinnyi bitwaye neza ku ruhande rwa Rayon Sports
Sugira Ernest yatsindiye Rayon Sports mu gice cya mbere
Abakinnyi ba Bugesera FC bishimira igitego cya kabiri cyatsinzwe na Ntwali Jacques
Drissa Dagnogo yishimira igitego yatsindiye Rayon Sports mu minota ya nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .