00:00:00 IGIHE NETWORK KN KINYARWANDA EN ENGLISH FR FRANCAIS

Rayon sports yihoreye kuri Marine naho Kiyovu itsindirwa mu rugo

Yanditswe na Byiringiro Osée Elvis
Kuya 1 Ukwakira 2022 saa 08:28
Yasuwe :

Rayon sports yatsinze Marine ibitego 3-2, Kiyovu itsindirwa mu rugo na Sunrise mu mikino y’umunsi wa kane wa shampiyona yabaye ku wa Gatandatu tariki 1 Ukwakira 2022.

Umukino wa Rayon Sports na Marine Fc watangiye utuje ariko amakipe yombi asatirana gake gake, Marine yiba umugono Rayon ku munota wa 12 ubwo umuzamu Hakizimana Adolphe yasuzuguraga umupira maze rutahizamu wa Marine, Mugisha Desire akawumutwara bikarangira ashyizemo igitego cya mbere.

Ku munota wa 22, Rutahizamu Mussa Esenu yagerageje gutsinda ariko ishoti yateye rijya hejuru y’izamu.
Nyuma yo gukomeza kotsa igitutu ikipe ya Marine, Mbirizi Eric yishyuye igitego ku munota wa 28 aba-Rayon benshi bari baherekeje ikipe yabo bariruhutsa.

Rayon sports yakomeje gusatira bikomeye ishaka igitego cya kabiri ariko uburyo Willy Onana na Paul Were bagerageje ba myugariro ba Marine bakayibera ibamba.

Ku munota wa 37 Onana yatsinze igitego cya kabiri cya Rayon sports ariko umusifuzi w’igitambaro avuga ko yaraririye. Mugisha Desire watsinze igitego cya mbere cya Marine yeretswe ikarita y’umutuku nyuma yo gukinira nabi myugariro Ndizeye Samuel.

Mbere y’uko amakipe ajya mu karuhuko k’igice cya mbere, Onana wari watsinze igitego bakacyanga yatsinze igitego cya kabiri, igice cya mbere kirangira Rayon Sports itsinze Marine ibitego 2-1.

Rayon sports yagarutse mu gice cya kabiri n’ubundi isatira, maze Onana wigaragaje muri uyu mukino ku munota wa 60 atsinda igitego cya gatatu ari cyo cye cya kabiri muri uyu mukino.

Rayon yakomeje gusatira Ndekwe azamukana umupira neza acenga cyane ariko umupira uwuteye mu izamu Hertier asohoka neza umupira arawufata.
Marine na yo yanyuzagamo igasatira ariko abasore b’inyuma ba Rayon bakayibera ibamba.

Rayon sports yakomeje kugerageza uburyo bwinshi imbere y’izamu ariko imipira ya nyuma Tuyisenge Arsene yateraga hakabura uyirangiriza mu izamu.

Nyuma y’iminota Rayon sports isatira bikomeye Marine yafashe umupira izamuka yihuta cyane Tuyisenge akora ikosa batanga coup franc. Marine yayiteye neza maze rutahizamu ukiri muto wa Marine, Gitego Arthur atsinda igitego cya kabiri cy’iyi kipe.

Ku munota wa 88 Onana yacomekeye umupira mwiza Nishimwe Blaise ariko umupira awuteye ujya hejuru y’izamu. Mu minota itatu y’inyongera Marine yihariye umupira ari mako igerageza uburyo bwo gushotera kure ariko Rayon sports ikabyitwaramo neza.

Umukino warangiye Rayon Sports intsinze Marine ibitego 3-2 uba umukino wa kane wikurikiranya Marine itabona intsinzi.

Undi mukino wari kuri Stade ya Kigali i Nyamirambo wahuzaga Kiyovu Sports na Sunrise. Amatsiko yari yose ku bakunzi b’umupira w’amaguru bashaka kureba yose uko Kiyovu Sports iza kwitwara nyuma y’amakuru atari meza ayimazemo iminsi.

Umukino waje kurangira n’ubundi bikomeje kuba nabi kuko yatsinzwe na Sunrise ibitego 2-1, uba umukino wa mbere itakaje muri uyu mwaka.

Mu wundi mukino wabaye kuri uyu wa Gatandatu, Bugesera yatsinze Etincelles ibitego 3-1,Gorilla itsinda Mukura ibitego 3-2.

Imikino iteganyijwe ku Cyumweru tariki 2 Ukwakira 2022 (15:00)

Police Fc vs Gasogi United

Rutsiro vs AS Kigali

Rwamagana vs APR FC

Musanze vs Espoir Fc

Abakinnyi 11 ba Marine babanje mu kibuga
Abakinnyi 11 ba Rayon Sports babanje mu kibuga
Marine izwiho kuzamura abakinnyi bakiri bato
Marine ntirabona intsinzi muri uyu mwaka
Musa Essenu yashatse igitego kirabura
Paul Were akumbagaza umukinnyi wa Marine
Umuzamu Turatsinze ashima Imana nyuma yo kubanza Rayon Sports igitego

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .