Rayon Sports yavuze igihe izaba yakemuye ikibazo cya Minnaert

Yanditswe na Eric Tony Ukurikiyimfura
Kuya 26 Gashyantare 2021 saa 12:54
Yasuwe :
0 0

Ubuyobozi bwa Rayon Sports bwatangaje ko bitarenze ku wa Mbere w’icyumweru gitaha buzaba bwakemuye ikibazo bufitanye n’uwigeze kuyitoza, Ivan Minnaert, uyishyuza $6,184.

Mu Ukuboza 2019, FERWAFA yategetse Rayon Sports kwishyura Ivan Minnaert agera kuri miliyoni 13.8 Frw kubera ko yirukanywe binyuranyije n’amategeko.

Umuhesha w’Inkiko w’Umwuga, Me Ange Ntirushwa Diogène, aherutse gusaba ubuyobozi bwa Rayon Sports kwerekana umutungo uzatezwa cyamunara kugira ngo hamenyekana ahazava amafaranga yo kwishyura Ivan Minnaert.

Mu mafaranga yasigaye yasabwaga harimo $3148 n’ibihumbi 250 Frw yagombaga kwishyurwa tariki 31 Mutarama 2021 n’andi $3000 hamwe n’ibihumbi 250 Frw yagombaga kwishyurwa tariki 31 Werurwe 2021.

Mu kiganiro n’abanyamakuru cyabaye kuri uyu wa Gatanu, Umuyobozi w’Umuryango wa Rayon Sports, Uwayezu Jean Fidèle, yavuze ko mu mikoranire bafitanye n’uruganda rwa SKOL, bemeranyije gukemura iki kibazo bitarenze ku wa Mbere.

Ati “Mu mikoranire myiza ituranga n’umufatanyabikorwa SKOL twumvikanye ko mu mafaranga bazajya baduha havamo aya Minnaert, bitarinze kugera ku wa 31 Werurwe 2021. Uyu munsi cyangwa ku wa Mbere bitewe n’imikorere ya za banki amafaranga ye araba yamugezeho."

Umubiligi Ivan Minnaert yasinyanye na Rayon Sports amasezerano y’imyaka ibiri tariki ya 27 Mata 2018, ariko aza gusezererwa nta nteguza tariki ya 20 Nyakanga 2018, ashinjwa gusagarira Hakizimana Corneille wari ushinzwe kongerera ingufu abakinnyi.

Uyu mutoza yareze Rayon Sports ndetse umwanzuro w’Akanama ka Ferwafa gashinzwe gukemura amakimbirane wemeza ko ubusabe bwa Ivan Minnaert bufite ishingiro, gategeka Rayon Sports kumwishyura ibihumbi $35,535.

Nyuma yo kujurira, FERWAFA yemeje ko Rayon Sports izishyura Ivan Minnaert ibihumbi $14,320 bingana na miliyoni 13.673 Frw, aho kuba miliyoni 32.5 Frw nk’uko byari byemejwe n’Akanama nkemurampaka muri Nyakanga 2019. Aya yiyongeraho kandi ibihumbi 500 Frw y’igihembo cya avoka. Rayon Sports yari yagiye yishyura mu byiciro hasigara $6,184.

Perezida wa Rayon Sports, Uwayezu Jean Fidèle, yavuze ko bitarenze ku wa Mbere bazaba bakemuye ikibazo cya Ivan Minnaert
Ivan Minnaert yareze Rayon Sports ayishinja kumwirukana binyuranyije n'amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .