00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yatsinze Gorilla FC, ikomeza kuyobora shampiyona (Amafoto)

Yanditswe na Byiringiro Osée Elvis
Kuya 7 Ukuboza 2022 saa 11:14
Yasuwe :

Rayon Sports FC yatsinze Gorilla FC igitego 1-0 mu mukino w’ikirarane wabaye kuri uyu wa Gatatu tariki 7 Ukuboza 2022, ikomeza gushimangira umwanya wa mbere muri shampiyona.

Rayon Sports yinjiye mu mukino yagaruye Mbirizi Eric wari umaze igihe yaravunitse.

Umukino watangiye utuje, ariko ku mumota wa karindwi Aboubakar Traoré ahusha igitego cyari cyabazwe, ku mupira yahawe na Ndekwe Felix, awuburira mu maguru.

Umukino wakomeje gukinirwa hagati mu kibuga, ubona Gorilla FC iri hejuru ya Rayon Sports, ariko koruneri nyinshi yabonaga ntizigire icyo zibyara.

Rayon Sports yatangiye kwinjira mu mukino ku munota wa 30, ubwo Iraguha Hadji yazamukanye umupira yihuta cyane, abakinnyi ba Gorilla FC bakawushyira muri koruneri.

Iraguha yahise ayitera vuba, bamukorera ikosa, umusifuzi atanga penaliti. Yahise iterwa neza na Willy Essombe Onana ku munota wa 27, Rayon Sports ihita iyobora umukino.

Traoré wahushaga uburyo bwinshi, yongeye guhusha ubundi ku munota wa 37 aho Onana yamucomekeye umupira ariko umusifuzi akavuga ko yaraririye.

Igice cya mbere kitabonetsemo uburyo bwinshi cyarangiye Rayon Sports itsinze Gorilla FC igitego 1-0, cya Willy Essombe Onana.

Rayon sports yatangiye igice cya kabiri ikora impinduka, Musa Esenu asimbura Aboubakar Traoré.

Igice cya kabiri cyari gitandukanye n’icya mbere, kuko wabonaga umupira wihuta. Onana yongeye guhusha uburyo bwiza ubwo yateraga ishoti ariko umuzamu Matumbele Arnold akawufata neza.

Ku mumota wa 60 Nshimiyimana Tharcisse wa Gorilla FC yatunguye umunyezamu atera ishoti rikomeye, ariko umupira uca hanze gato y’izamu.

Rayon yakomeje gukora impinduka, Mbirizi Eric asimburwa na Nishimwe Blaise. Ku mumota wa 67 Musa Esenu yatsinze igitego cya kabiri ariko umusifuzi aracyanga avuga ko yabanje gukorera ikosa myugariro wa Gorilla FC.

Gorilla FC yahise ikora impinduka, Sindambiwe Protais asimbura Bobo Camara, Samba Cedric asimbura Kalema Eric.

Musa Esenu wahise avunika yasimbuwe na Paul Were, mu gihe Rudasingwa Prince yasimbuye Ndekwe Felix. Gorilla yakomeje gusatira ari nako yabonaga koruneri nyinshi, ariko ntizigire icyo zibyara.

Gorilla yakomeje gusatira bikomeye, ariko igitego kiranga kirabura. Onana wagize ikibazo cy’imvune yasimbuwe na Mucyo Didier Junior ku munota wa 89.

Iminota ine y’inyongera ntacyo yahinduye, umukino urangira Rayon Sports itsinze Gorilla FC igitego 1-0.

Gutsinda uyu mukino byahesheje Rayon Sports gukomeza kuyobora urutonde rwa shampiyona n’amanota 28, mu gihe Gorilla FC iri Ku mwanya wa cyenda n’amanota 17.

Ku munsi w’ejo kuwa Kane tariki 8 Ukuboza 2022 hazakinwa undi mukino w’ikirarane uzahuza AS Kigali na APR FC saa 18:00.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .